Niviarsiaqqap Naamanni ikioraa

Niviarsiarannguaq Israalikkuusoq nunami Aramimi angerlarsimaf­fimminit ungasis­sorsuarmi najugaqarpoq. Aramæerit sakkutuuinit tigusarineqarsimavoq maannalu sakkutuut naalagaata Naamannip nulianut kiffaalluni. Niviarsiaraq naak Jehovamut uppinngitsut akornan­niikkaluarluni Jehovamut upperpoq.

Naamanni amerluummik nappaateqarpoq anniartuaan­nartuullunilu. Niviarsiaqqap ikiorusut­torujussuuaa. Naamannip nulia oqarfigaa: ‘Nalunngilara uiit kimit ikiorneqarsin­naanersoq. Israalimi Jehova pruffiiteqarpoq Eliisamik atilimmik. Taassuma uiit ajorunnaarsis­sinnaavaa.’

Naamannip nuliata niviarsiaqqap oqaasii Naamannimut oqaluttuarivai. Iluarserusulluni qanorluunniit iliorusukkami Israalimukarpoq Eliisap illuanukarluni. Naamanni nuimasuuvoq, taamaat­tumillu Eliisamit tikilluaq­quneqar­nissani naatsorsuutigigaluarpaa. Eliisalli kiffani aallartippaa Naamannimullu ima oqaqqullugu: ‘Kuussuarmut Jordanimukariarlutit arfineq-marloriarlutit uffariartorit. Taava ajorunnaassaatit.’

Naamanni pakatsisorujussuuvoq. Oqarpoq: ‘Isumaqarlunga pruffiitip Guutini torlorfigissagaa tupinnar­tuliorlunilu ajorunnaarsillunga. Kisianni Israalimi kuussuarmukaq­quaanga. Aramimi pitsaanerusunik kuussuaqarpugut. Soormi taakunngaannaruma?’ Naamanni kamattorujus­suanngorpoq Eliisallu illua qimallugu.

Naamannip kiffaasa iluamik eqqarsalersin­niarlugu oqarfigaat: ‘Ajorunnaarsin­neqarumallutit qanorluunniit iliorusun­nginnavit? Pruffiitip ajornan­ngitsumik ilioqqugaluarpaatit. Soormi taamaaliuinnaruit?’ Naamannip suna pineraat paasivaa. Taava kuussuarmut Jordanimukariarluni arfineq-marloriarluni morsuttarpoq. Naamanni kuussuarmit arfineq-aappassaanik qaqigami ajorunnaarpoq. Qujamasut­torujussuuvoq qujajar­torlunilu Eliisamukaqqippoq. Naamanni oqarpoq: ‘Maanna paasivara Guutit Jehova Guutiusoq ilumoortoq.’ Naamanni ajorunnaarsimalluni utermat niviarsiaraq Israalikkuusoq qanoq misigisimas­sasoraajuk?