Silatusaarneq eqqortulior­nissamut iluaqutigissavat

1-2. Qanoq silatusaartumik qisuariarsin­naavugut, aamma sooq silatusaar­tassaagut?

ATAQQIN­NINNGITSUMIK pineqar­nikuuit? Eqqunngitsuliorfigineqar­nikuuit? Imaluunniit qunugisaqar­nikuuit? Taava nalunngilat taama pisoqar­tillugu ajunngitsumik qisuariarneq qanoq ajornakusoor­tigisartoq. Qujanar­tumilli Biibilimi siunnersuuteqarpoq. Taakkulu silatusaartumik qisuariar­nissamut iluaqutigisin­naavagut.

² Iliuuseqar­tinnani eqqarsaq­qaarnerup pingaaruteqassusia Biibilimi erseqqis­sarneqarpoq. Takusagut kisiisa tunngavigalugit qisuariar­tassanngilagut, paasiniar­tassavarpulli sooq taama pisoqartoq imaluunniit sooq pineqartoq taamatut iliuuseqarsimasoq. Tamakku paasilluarutsigit silatusaartumik qisuariar­nissatsinnut iluaqutigis­savagut. Assersuutigalugu ‘oqaasis­satsinnik killiliisin­naavugut’ ‘nipangersimaan­narlutaluunniit’. (Uss 10:19; Tuss 4:4) Silatusaarutta ajuallatsin­neqaraluarluta kamannata isumakkeerfigin­nissinnaavugut. Aamma siunnersor­neqarutta naqqinneqarut­taluunniit maniguulluta siunnersor­neqarnitsitut iliorsin­naavugut. (Uss 19:20) Iliuusissagut oqaasis­sagullu eqqumaf­figiuarutsigit Jehova nuannaar­tissinnaavarput, aammali uagutsinnut allanullu iluaqutaassaaq. Silatusaarutta ingammik pissutsini artornartuni kamaammer­naraluartuni misigis­sutsigut aqussin­naavagut. Biibilimi oqaluttuat pingasut eqqarsaq­qaarnerup pingaaruteqas­susianik ersersitsisut maanna sammeriartigit. Taakku maniguulluta, eqqissilluta Jehovamillu tatigin­nilluta qisuariar­nissatsinnut iluaqutigis­savagut.

MAKITASUUJUNAK MANIGUUTTUUGIT

3. Naamanni kinaava?

³ Eqqortulius­sagutta makitanaveersaar­tuussaagut. (Pet 1. 5:5) Taamaaliorumalluta silatusaartumik eqqarsaq­qaartariaqarpugut. Sooq? Naamannip qisuariarnera assersuutigeriartigu. Nunami Israalip eqqaani, Aramimi, najugaqarpoq. Naamanni angutaavoq nuimasooq Aramæerit sakkutuuinut naalagaasoq. Kisianni amikkut amiilaar­nartumik nappaateqarpoq – pupissun­ngorsimavoq. – Kng 2. 5:1.

4. Niviarsiaqqap oqaasiinut Naamannip qisuariarnera qanoq ilinniarfigisin­naavarput?

⁴ Naamannip nulia kiffaminit niviarsiaqqamit oqarfigineqarpoq Israalimi pruffiiteqartoq napparsimasunik ajorunnaarsitsisin­naasumik. (Kng 2. 5:2, 3) Naamanni eqqarsarsimasin­naagaluarpoq: ‘Taanna tassaaginnarpoq kiffaq niviarsiaraq akeqqama nunaanneersoq. Sooq oqaasii soqutigis­savakka?’ Makitasaarsimasin­naagaluarpoq oqaasiilu tamaasa itigartillugit. Naamannili silatusaarpoq. Oqaasii maniguulluni tusarnaarpai eqqarsaatigalugillu. Aramip kunngia akuersimmat Naamanni ajorunnaarsitsisin­naasumik ujaasiniarluni Israalimukarpoq. – Kng 2. 5:4, 5.

5. Naamanni Israalimut apuummat qanoq pisoqarpa?

⁵ Naamannip neriuutigaa Israalip kunngianut Jorammimut apuukkuni ajorunnaarsin­neqarsin­naalluni. Jorammili isumaqarpoq Aramip kunngiata kamassaar­niaraani. Pruffiitip Eliisap tamanna tusaramiuk Jorammi qinnuigaa Naamanni imminut aallarteq­qullugu. (Kng 2. 5:6-9) Naamannilli ilimagin­ngisaanik pisoqarpoq. Eliisamit ilassineqarnanilu oqaluun­neqanngilaq. Ajorunnaarumalluni qanoq iliortariaqar­neranik Eliisap oqarfigiar­tortiinnarpaa. – Kng 2. 5:10.

6. (a) Sooq Naamanni ilitsersor­neqarnermisut iliorumanngila? (b) Naamannip kiffai qanoq silatusaartumik oqaaseqarpat, qanorlu kinguneqarpa? (Kunnginik 2. 5:13, 14)

⁶ Naamanni ilitsersor­neqarnermisut iliorumanngilaq. “Kamangaarluni utimut aallarpoq.” (Kng 2. 5:11, 12) Sooq? Sakkutuunut naalagaagami isumaqarunarpoq ataqqineqar­nerusariaqarluni. Isumaqarsin­naavorlu Eliisap ilitsersuutaa Aramimut ataqqin­ninngitsulior­nerusoq. Sunaluunniit pissutigigaluaruniuk ajorunnaarsin­neqanngik­kaluarluni angerlar­niarluni aalajangerpoq. Kiffaali silatusaarput. Paasivaat Eliisa ikiuerusuttoq, inussiar­nersumillu Naamannip eqqarsalis­sutigisaanik oqaaseqarput. Naamanni kamakkun­naarpoq, maniguullunilu Eliisa naalappaa. Tamatumalu kingunerisaanik ajorunnaarpoq! – Kunnginik 2. 5:13, 14 atuakkit.

7. Naamannip misigisaa qanoq ilinniarfigisin­naavarput? (Ussatit 18:12) (Aamma assit takukkit).

⁷ Oqaluttuaq qanoq ilinniarfigisin­naavarput? Kukkusumik misigisin­naallutalu isiginnit­taaseqarsin­naavugut. Taamaattumik iliuuseqan­nginnitsinni eqqarsaq­qaartariaqarpugut. Aalajangigas­saqaraangatta misigis­sutsitsinnit aqunneqar­tassanngilagut. Maniguulluta akueris­savarput suut tamaasa ilisimanagit. Ilaannikkut allanit, ingammik Jehovamit, ikiorneqar­tariaqarpugut. Naamanni Jehovamut kiffartor­tuunngik­kaluarluni silatusaarluni maniguullunilu allat siunnersuutaannut tusarnaarpoq. Assersuutigalugu nuliami kiffaa niviarsiaraq Israalikkuusoq, kiffani pingaar­nertullu Jehovap pruffiitia Eliisa tusarnaarpai. Naamanni ajuallas­simajun­naarluni makitasaarun­naarpoq. Naggataatigut silatusaarnera ajunngitsumik kinguneqarpoq. Taamaattumik oqaaseqan­nginnitsinni iliuuseqan­nginnitsinnilu eqqarsaq­qaartariaqarpugut. Assersuutigalugu Biibili tunngavigalugu uagutsinnik siunnersuisoq isumaqatigin­ngikkutsigu eqqarsaq­qaartariaqarpugut oqaatiginiakkagut iliuuseriniak­kagullu makitanermut maniguun­nermulluunniit ersiutaas­sanersut. – Ussatit 18:12 atuaruk.

KAMANNAK EQQISSISIMAGIT

8. Qaqugukkut eqqissisimaannarneq ajornakusoor­tissinnaavarput?

⁸ Ajuallatsin­neqarutta kamalersin­naavugut. Oqaaseqan­nginnitsinnili silatusaartumik eqqarsaq­qaarutta eqqissisimaan­narsinnaavugut. Kisianni eqqunngitsuliorfigineqarnerput pissutigalugu kamannissamut pissutis­saqaraluarluta eqqissisimanissaq ajornakusoor­tissinnaavarput. (Ef 4:26) Najummas­simanartumik pisoqar­tillugu Daavi Abigajililu qanoq silatusaarsimasut sammeriartigu.

9. Daavi Nabalimit qanoq pineqarpa?

⁹ Paranip inoqajuitsuani Daavi angutitaalu Saulimit qimaasutut inuupput. (Sam 1. 25:1) Angutip pisuup, Nabalimik atillip, savaatai savanillu paarsisui ajunngisaarfigalugit illersor­tarpaat. (Sam 1. 25:15, 16) Savanik kissaanerup nalaani Daavi Nabalimut oqariar­tortitsivoq. Oqariar­tortitallu Nabali inuummersoqquaat ataqqin­nittumillu nerisassanik qinnuigalugu. (Sam 1. 25:6-8) Nabalilli ajunngisaarfigineqarnini qujamasuutiginagu Daavi angutitaalu ajuallan­nartumik oqaaseqarluni sorraaffigai. – Sam 1. 25:10, 11.

10. Daavi Abigajililu qanoq silatusaartumik qisuariarpat? (Samuelimik 1. 25:32, 33) (Aamma asseq takuuk).

¹⁰ Illit Daaviugaluaruit qanoq qisuarias­sagaluarpit? Paasinarpoq Daavi kamangaalersimasoq. Daavi angutaavoq sakkortuumik misigis­suseqartoq, allaallu Nabali toqukkusuppaa! (Sam 1. 25:13, 21, 22) Kisianni Abigajili, Nabalip nulia silatooq, akuliuppoq Daavi angutitaalu toqutsiartortut unitsillugit. Sooq taamaaliorpa? Paasivaa Daavi angutaasoq ajunngitsoq aamma sooq kamattoq. Taamaattumik saammarsar­niarlugu silatusaartumik iliuuseqarpoq. Tukkorluni tunissuteqarfigaa ataqqin­nittumillu siunnersorlugu. (Sam 1. 25:18, 23-31) Daavip Abigajili tusarnaaq­qissaarpaa, paasivaalu oqaasii Jehovap eqqarsar­taasianut naapertuuttut. Daavi eqqissivoq isummani allanngor­tillugu. Taamaalillunilu kukkorujus­suarnissani pinngitsoortippaa. – Samuelimik 1. 25:32, 33 atuakkit.

11. Kamalis­sagutta qanoq silatusaarsin­naavugut? (Ussatit 19:11)

¹¹ Oqaluttuaq qanoq ilinniarfigisin­naavarput? Kamannissamut pissutis­saqarluaraluarut­taluunniit eqqarsaatigeq­qaartariaqarparput qanoq eqqissisimaan­narsinnaasugut. Oqaatiginiakkagut iliuuseriniak­kagullu qanoq kinguneqarsinnaasut eqqarsaatigigutsigu silatusaarsin­naavugut. (Ussatit 19:11 atuaruk). Daavi Jehovap eqqarsartaasia pillugu eqqaasin­neqarami kamakkun­naarpoq. Illit kamatsin­neqaruit qisuariarpiloor­naveersaarit. (Jaak 1:19) Jehova qinnuigiuk, taassumalu isiginnittaasia paasiniaruk. Taamaalioruit eqqissisimanissannut iluaqutigissavat.

12. Eqqissisimajuar­nissatsinnut silatusaar­tumillu aalajangiinis­satsinnut allat qanoq ikiorsin­naavaatigut?

¹² Soorlu Jehovap Abigajili aqqutigalugu Daavi ikioraa, taamatuttaaq uppeqatigut aqqutigalugit silatusaartumik qisuariar­nissatsinnut ikiorsin­naavaatigut. Taamaattumik kamaleruit uppeqativit ilaat anersaakkut inersimal­luartoq – pisimasumut eqqortumik isiginnit­taaseqaler­nissamut ikiuisinnaasoq – oqaloqatigiuk. (Uss 12:15; 20:18) Taavami illit ikinngutit kamappat? Abigajili ilaarlugu ikinngutit Jehovap pisimasumut isiginnit­taasiatut isiginnit­taaseqaq­qullugu ikiorsin­naaviuk? Silatusaar­nissamut eqqissisimanis­samullu allanik ikiuininni Jehovap naleqquttumik oqaaseqar­nissannut ikiussavaatit.

QUNUGISAQARNAK JEHOVA TATIGIUK

13. Annilaangagaangatta silatusaarnissaq qanoq iluaqutigisarsin­naavarput?

¹³ Ilaannikkut annilaanganartumik misigisaqar­tarpugut. Jehovap kikkunnit tamanit sunillu tamanit pissaaneqar­nerungaarnera eqqaamagutsigu silatusaarluta taassuma tatiginissaanut iluaqutigisin­naavarput. (Tuss 27:1) Ajornar­torsiutitsinnut aaqqiis­sutissaqarpasin­ngikkaluartoq Jehovap ikiorsin­naavaatigut. Tamanna Jonap misigisaanit erserpoq. Jehova asangaarpaa, imaannaan­ngitsumilli suliassin­neqarami annilaangalerluni Jehova tatigin­ngitsoorpaa.

14. Sooq Jona Jehovap suliassiis­sutaatut iliornis­saminut annilaangava?

¹⁴ Jehovap Jona qununarpasittumik suliassippaa: Ninevemiut oqarfigiar­tussavai Jehovamit toqumik pillarneqassasut. (Jon 1:1, 2) Illit taamatut suliassin­neqaraluaruit qanoq misigis­sagaluarpit? Jona qaammammi ataatsimi Israalimiit Assyriamiut illoqarfiannut Ninevemut pisuttussaavoq. Assyriamiut nakuusernermik nuannarisaqartutut ilisimaneqarput. Nineve allaat ‘aap illoqarfianik’ taaneqarpoq! (Nah 3:1, 7) Jona annilaangagami Jehovap suliassiis­sutaatut iliornani killup tungaanut qimaavoq. – Jon 1:3.

15. Jonap Jehovamik tatigin­ninneruler­nissaminut suna iluaqutigaa? (Jona 2:7-10)

¹⁵ Jona qimaatilluni Jehovap killeqan­ngitsumik pissaaneqar­neranik eqqaasin­neqarpoq. Jehovap nalissaqan­ngitsumik aniguisippaa. (Jon 1:15; 2:1) Jona pingaarutilimmik ilikkagaqarpoq. Paasivaa qanorluunniit navianar­torsioraluaruni Jehovamit illersor­neqarsin­naagami Ninevemukar­nissani annilaan­ngagisariaqarnagu. (Jona 2:7-10 atuakkit). Jehovap suliasseq­qimmani ilioqquneqar­nermisut ingerlaannaq iliorpoq. Ninevemukarpoq, oqaluus­sineralu kinguneqarluaqaaq. – Jon 3:5.

16. Annilaangagaangatta suna iluaqutigisin­naavarput? (Ussatit 29:25) (Aamma assit takukkit).

¹⁶ Oqaluttuaq qanoq ilinniarfigisin­naavarput? Sunaluunniit, aamma inunnik qunugisaqarneq, Jehovamut naalakkun­naassutiginavian­ngilarput. (Ussatit 29:25 atuaruk). Jonap pisimasut eqqarsaatigeq­qissaareerlugit paasivaa qanoq pisoqarsimasin­naagaluartoq isumakuluutigival­laarnagu Jehovap ikiuisin­naanera eqqarsaatiginerus­sallugu. Uaguttaaq annilaangas­sutigisagut eqqarsaatigival­laarnagit Jehovap siornatigut qanoq ikiorsimagaatigut eqqarsaatiginerus­savarput. Aamma qatanngutitta Jehova tatigil­luinnaramikku pissutsini imaannaan­ngitsuni qanoq aalajaat­tuarsimanerat eqqarsaatigeq­qissaarsin­naavarput.a (Hebr 13:6) Silatusaarluta Jehova tatigil­luinnarusupparput allallu Jehovamik tatigin­nilernis­saannut ikiorlugit.

SILATUSARNISSAQ SULISSUTIGIUARUK

17. Silatusaarneq qanoq ineriar­tortissin­naavarput?

¹⁷ Sammeriik­katsitut silatusaarutta pissutsini imaannaan­ngitsuni eqqortulior­tuarsin­naavugut. Silatusaarneq qanoq ineriar­tortissin­naavarput? Jehova ilisimas­suseqar­nerpaajuvoq, kiffanilu Oqaatsini anersaanilu aqqutigalugit ilisimas­susermik tunisarpai. (Neh 9:20; Tuss 32:8) Misigis­sutsitta aqunnis­saannut silatusaar­tumillu aalajangiinis­satsinnut ikiorumalluta siunnersor­tarpaatigut. (Tuss 119:97-101) Taamaattumik Biibilimi allassimasut eqqarsaatigeq­qissaarlugillu Jehova anersaaminik tuneqqulluta qinnuigisarparput. Taamaalior­nitsigut Jehovap eqqarsartaasia paasilluar­nerusin­naavarput iluarisaatullu iliorsin­naalluta. – Uss 21:11.

18. Suna aalajangiusimaviuk?

¹⁸ Jehova ilisimas­suseqar­tuaqqulluta qinnuigerusupparput. (Tuss 14:2) Jehovap ilisimassusia pingaar­tittuarutsigu ‘silatussutsip aqqutaanit tammarnavian­ngilagut’. (Uss 21:16) Sutigut tamatigut silatusaarusuppugut. Taamaalioruttalu eqqortulior­tuarsin­naavugut Jehovallu uummataa nuannaar­tillugu!