Uillarnerup ernera uummaqqippoq

Panernersuaqarnerata nalaani Jehovap Elia oqarfigaa: ‘Zareptamukarit. Taakani uillarnerup nerisassannik isumagiumaarpaatit.’ Illoqarfiup isaaffiani Eliap uillarneq piitsoq qisussanik katersuisoq takuaa. Taava Elia imeruersaatis­saminik tuneqquvoq. Aallertorlu Eliap oqarfigaa: ‘Aamma iffiaq-qaqortumik tunilaannga.’ Kisianni uillarnerup oqarfigaa: ‘Iffiaq-qaqortumik tunisin­naanngilakkit. Taamaallaat uannut erninnullu naammaq­qatartumik qajuusaateqarlungalu uuliaminiuteqarama.’ Eliap oqarfigaa: ‘Jehova neriorsuivoq uannut iffioruit qajuusaatitit uuliaatillu sialliler­nissaata tungaanut nungunnavian­ngitsut.’

Taava uillarneq angerlarpoq Jehovallu pruffiitia iffiuutilerlugu. Jehovap neriorsuisimaneratut uillarneq erneralu panernersuaqarun­naarnissaata tungaanut naammattunik nerisas­saateqarput. Qajuusaatai uuliaataalu nungunneq ajorput.

Taava ajortorujus­suarmik pisoqarpoq. Uillarnerup erninngua napparsimasorujus­suanngorpoq toqullunilu. Uillarneq aliasungaarluni Eliamut ikioqquvoq. Eliap uillarnerup ernera tigoriarlugu qalianukaappaa. Siniffimmut innarteriarlugu qinuvoq: ‘Jehova, qinnuigaakkit meerannguaq una uummarteq­qeqqullugu.’ Taava nukappiaraq anersaar­toqqilerpoq uummaqqillunilu. Tamanna tupinnaqaaq! Siornatigummi taamaat­toqarsimanngilaq aamma uillarneq erneralu Israalik­kuunngillat.

Eliap uillarneq oqarfigaa: ‘Takuuk, ernerit uumavoq!’ Uillarneq nuannaar­torujus­suanngorpoq Eliamullu oqarluni: ‘Ilumut illit Guutip kiffarivaatit. Tamanna nalunngilara illimmi Jehovap oqaasii oqaaserisarakkit oqaasiilu piviusun­ngortuaan­narlutik.’