Dronningi ajortoq pillarneqartoq

Kunngip Akabip Jizreelimi illussaarsuarmini igalaakkut viinnequteqarfik Nabotip pigisaa takusinnaavaa. Pigerusullugu Nabotimit pisiariniaraluarpaa. Nabotilli itigartippaa Jehovap inatsisai naapertorlugit nuna kingornus­simasaq tuniniaq­qusaanngimmat. Nabotip eqqortuliorusunnera Akabip ataqqivaa? Naamik. Akabi kamattorujussuuvoq. Kamangaarami siniffimmini innangaannarpoq neriumananilu.

Akabip nuliata, dronningip ajortup Jeezabeelip, oqarfigaa: ‘Illit kunngiuvutit Israalimi. Perusutatit tamaasa pisinnaavatit. Nuna taanna ilinnut pissarsiarissavara.’ Illoqarfimmi utoqqaaner­taasunut allappoq Naboti Guutimik perloqqusisutut unnerluutigissagaat ujaqqanillu milloorlugu toqussagaat. Taava Jeezabeelip peqqusineratut iliorput. Jeezabeelillu Akabi oqarfigaa: ‘Naboti toquvoq. Viinnequteqarfik illit pigilerpat.’

Jeezabeeli aamma pisuussuteqan­ngitsunik allanik toqutsivoq. Jehovamik asannit­torpassuit toquppai. Guutipilus­siorlunilu allanik ajortorpas­suarnik iliortarpoq. Jehovalli tamakku tamaasa takuai. Qanoq iliuuseqarfigivaa?

Akabi toqoreermat ernera Jorammi kunngin­ngorpoq. Jehovap Jeezabeeli ilaqutaalu pillarniarlugit angut Jehumik atilik aallartippaa.

Jehu qamutiminik Jizreelimukarpoq Jeezabeelip najugaqarfigisaanut. Jorammip qamutiminik Jehu naapikkiartorpaa aperalugulu: ‘Eqqissinartumik siunertaqarlutit aggerpit?’ Jehu akivoq: ‘Anaanat Jeezabeeli ajortulior­tuartillugu eqqissineqar­navianngilaq.’ Jorammi qamutini sanguteriarlugit qimaaniaraluarpoq. Jehulli piseriarluni qarsumik eqqorlugu toquppaa.

Taava Jehu Jeezabeelip illussaarsuanukarpoq. Jeezabeelip tusaramiuk Jehu aggertoq pinnersarpoq nutsanilu iluarsaallugit igalaallu eqqaani utaqqilerluni. Jehu apuummat oqalorujuffigaa. Taava Jehu qummut igalaap tungaanut qiviarpoq kiffaanullu eqqaaniittunut oqarluni: “Nakkartissiuk!” Jeezabeeli igalaakkut nakkartippaat, nakkarlunilu toquvoq.

Tamatuma kingorna Akabip erneri 70-it Jehup toqutaatippai nunalu Baalisiorfiujun­naartillugu. Tassa oqaluttuamit paasivarput Jehovap suut tamaasa takusarai ajortuliortullu piffissaq eqqorlugu pillartarai.