Jehovap Elia nakussatsippaa

Baalip pruffiitiinut susoqarsimanersoq Jeezabeelip tusaramiuk kamattorujussuuvoq. Taava Eliamut oqariar­tortitsivoq: ‘Aqagu illit Baalip pruffiitii assigalugit toqussaatit!’ Elia annilaangasorujus­suanngorpoq inoqajuitsumullu qimaalluni. Qinuvoq: ‘Jehova, sapiliivippunga. Toqutiinnannga.’ Taava qasungaarami orpiup ataani sinilerpoq.

Inngilip itersarpaa sallaatsumillu oqarfigalugu: ‘Makigit nerillutillu.’ Eliap iffiaq-qaqortoq qalarlaaq kannilu imermik imalik takuaa. Nerillunilu imereerami sinileqqippoq. Inngilip itersaqqippaa oqarlunilu: ‘Neriniarit. Angalanissannut nukissaqar­niassaatit.’ Taava Elia nereqqilerpoq. Tamatuma kingorna ullut unnuallu 40-t angalavoq qaqqamut Horebimut apuunnissami tungaanut. Tassani qaarusuk iserfigaa unnuiffigalugulu. Kisianni Jehovap aperaa: ‘Elia, maani suniarpit?’ Elia akivoq: ‘Israalimiut ilinnut neriorsuutertik unioqqutis­simavaat. Pilliiviutitit aserortersimavaat pruffiititillu toqullugit. Maannalu uanga toqunniarsarivaannga.’

Jehovap oqarfigaa: ‘Qaarusummiit anillagit.’ Taava anorersualerpoq nunalu sajulluni inneqalerlunilu. Eliap nipi sallaatsoq tusaramiuk kiinnani atisaminik asserpaa qaarusuullu silataanukarluni. Taava Jehovap aperaa sooq qimaasimanersoq. Elia akivoq: ‘Uanga ilinnut kiffartortutut kiserngoruppunga.’ Jehovalli oqarfigaa: ‘Kisimiin­ngilatit. Suli Israalimi 7.000-t uannut kiffartorput. Ilinnut taarsiullutit Eliisa pruffiitin­ngortissavat.’ Taava ingerlaannaq Elia Jehovap peqqusineratut iliorpoq. Isumaqarpit aamma illit Jehovap piumasaatut iliornissannut ikiorneqarumaarlutit? Aap, Jehovap ikiorusuppaatit! Maanna panernersuaqarnerata nalaani susoqarsimanersoq paasiniariartigu.