Jehovap takutippaa Guutiulluni ilumoortoq

Naggueqatigiit quliusut kunngeqarfiat Israali ajortorpas­suarnik kunngeqarpoq, Akabili ajornerpaat ilagaat. Arnamut ajortumut Baalisior­tuusumut katippoq. Taanna Jeezabeelimik ateqarpoq. Akabip Jeezabeelillu Israalimi inuppassuit Baalisior­tartunngor­tippaat Jehovallu pruffiitii toqullugit. Jehova qanoq iliorpa? Pruffiiti Elia Akabimut oqaaseqariar­tortippaa.

Eliap kunngi Akabi oqarfigaa inuttut ajungaarmat Israalimi siallerun­naarumaartoq. Taava ukiut pingasut sinnerlugit nerisas­saminnik inerititsisin­naanerat ajornakusoormat kaannersuaqalerpoq. Kingusin­nerusukkut Jehovap Elia Akabimukar­teqqippaa. Kunngi oqarpoq: ‘Illit ajornar­torsiutinut pisuuvutit!’ Elia akivoq: ‘Uanga panernersuaqar­titsinngilanga. Illit Baali guutisiorfigigakku pisuuvutit. Takoriartigu kina Guutiunersoq ilumoortoq. Inuiaat Baalillu pruffiitii qaqqap Karmelip qaavanut katersortikkit.’

Taava inuit qaqqami katersuupput. Elia oqarpoq: ‘Aalajanger­tariaqarpusi. Jehova Guutiuppat ilumoortoq malinniarsiuk. Baalili ilumoor­tuuppat taava taanna malinniarsiuk. Unammil­lissavassi: Baalip pruffiitii 450-it pilliutis­saminnik piareersaassapput guutiminnullu saaffigin­nillutik. Taava aamma uanga pilliutissannik piareersaassaanga Jehovamullu saaffigin­nillunga. Inneq atorlugu akissuteqartoq taanna Guutiuvoq ilumoortoq.’ Inuillu tamanna akueraat.

Taava Baalip pruffiitii pilliutis­saminnik piareersaapput. Ulloq naallugu guutiminnut oqartarput: ‘Baali, akitigut!’ Baali akinngimmat Eliap illaruaatigaa. Oqarpoq: ‘Nipitoorsuarmik nillianiaritsi. Imaassinnaavoq sinilersimasoq itersar­neqartariaqarlunilu.’ Unnunngorpoq pruffiitillu suli Baali suaartarfigaat, akineqaratilli.

Eliap pilliutissani pilliiviup saavanut ilivaa imermillu kuillugu. Taava qinuvoq: ‘Jehova, qinnuigaakkit inunnut takuteq­qullugu Guutiusutit ilumoortoq.’ Taava ingerlaannaq Jehovap pilliutigineqartoq qilammiit innermik ikuallatsippaa. Inuit nipituumik oqarput: ‘Jehova Guutiuvoq ilumoortoq!’ Elia oqarpoq: ‘Baalip pruffiitii qimaatin­niaqinasigit!’ Ullorlu taanna Baalip pruffiitii 450-t toqutaapput.

Immami nuiamineq takussaalermat Eliap Akabi oqarfigaa: ‘Silarlun­nialeqaaq. Qamutitit piareersariarlugit angerlarniarit.’ Qilak nuisserluni taartorsuan­ngorpoq anorlilerlunilu siallersorsuan­ngorluni. Kiisami panernersuaqarun­naarpoq. Akabi qamutimini sukkasoorujus­suarmik ingerlavoq. Eliali Jehovamit pissatsin­neqarluni qamutinit sukkanerulluni arpappoq! Elia taava ajornar­torsiutaaruppa? Takoriartigu.