Kunngeqarfik avinneqartoq

Saalumuup Jehovamut guutisiornerata nalaani Israalimi eqqissineqarpoq. Kisianni Saalumuut arnarpas­suarnut nunanit allanin­ngaanneersunut katippoq. Taakkulu guutipilus­siortuupput. Piffissap ingerlanerani Saalumuut allanngoriartorpoq namminerlu guutipilus­sioqataasalerluni. Jehovap tamanna kamaatigaa. Saalumuut oqarfigaa: ‘Israali ilaquttannit arsaarin­nissutigineqassaaq marlunngorlunilu avinneqarluni. Anginerpaartaa kiffavit ilaanut tunniutissavara, ilaquttatillu mikinertaanut aqutsisun­ngortillugit.’

Jehovap taamatut aalajangernini allatut aamma takutippaa. Saalumuup kiffaasa ilaata, Jeroboamip, angalatilluni pruffiiti Akija naapippaa. Akijap atisani aqqaneq-marlunngorlugu alittorpaa Jeroboamimullu oqarluni: ‘Jehovap Saalumuup ilaqutai Israalikkut kunngeqarfianik arsaassavai kunngeqarfillu marlunngorlugu avillugu. Aggornerit qulit tigukkit illimmi naggueqatigiinnut qulinut kunngin­ngussagavit.’ Kunngip Saalumuup tamanna tusaramiuk Jeroboami toqukkusulerpaa! Taava Jeroboami Egyptenimut qimaavoq. Saalumuut toqummat ernera Rehabeammi kunngin­ngorpoq. Jeroboamilu misigigami utersin­naanngorluni Israalimut uterpoq.

Utoqqaat Israalimiittut Rehabeammi oqarfigaat: ‘Inuit iluamik pigukkit taava naalallutit ilumoorfigis­savaatsit.’ Rehabeammilli ikinngutaasa inuusuttut oqarfigaat: ‘Inuit sakkortusaarfigisariaqarpatit, sakkortunerusumillu sulisillugit!’ Rehabeammip ikinngutimi inuusuttut siunnersuutaat malippaa. Inuit ajortorujus­suarmik pivai. Taamaattumik naggueqatigiit ilaasa qulit kunngigerusuk­kunnaarpaat Jeroboamilu kunngigerusun­nerulerlugu. Naggueqatigiit qulit taakku kunngeqarfin­ngorput Israalimik taaneqartumik. Naggueqatigiillu allat marluk kunngeqarfin­ngorput Juudamik taaguutilimmik. Taakkulu Rehabeammimut naalakkun­naanngillat. Maanna Israalip naggueqatigiissortai aqqaneq-marluk avillutik marlunnik kunngeqarfeqalerput.

Jeroboamip innuttani Jerusalemmimut, Rehabeammip kunngeqarfianiittumut, guutisioriar­tortarnissaat kissaatiginngilaa. Nalunngiliuk sooq? Jeroboamip inunnit tununneqar­nissani Rehabeam­mimillu illersuiler­nissaat annilaangagigamiuk. Taamaattumik marlunnik nersuteeraasaliorpoq kuultiusunik innuttaminullu oqarluni: ‘Jerusalemmi ungasip­pallaaqaaq. Maani guutisiorsin­naavusi.’ Taava inuit nersuteeraasaliat guutisiorfigisalerpaat Jehovalu puioqqillugu.