Daavi Goliatilu

Jehova Saamualimut oqarpoq: ‘Iisaajikkunnut aallarit. Taassuma ernerisa ilaat Israalimi tulliulluni kunngin­ngortussaavoq.’ Taava Saamuali Iisaajik­kunnukarpoq. Ernera angajulleq takugamiuk eqqarsarpoq: ‘Tassa taannaasimassaaq.’ Jehovalli Saamuali oqarfigaa taannaan­ngitsoq. Jehovap nassuiaappaa: ‘Inuup qanoq isikkoqarnera kisiat pinnagu qamuuna qanoq ittuunera isigisarpara.’

Iisaajip ernini arfinillit allat Saamualip takunias­sammagit aavai. Saamualili oqarpoq: ‘Taakkua ilaat arlaannaal­luunniit Jehovap qinigarinngilaa. Allanik erneqarpit?’ Iisaaji akivoq: ‘Nukarlequteqarpunga Daavimik atilimmik. Taanna savaatinnik paarsivoq.’ Daavi isermat Jehova Saamualimut oqarpoq: ‘Tassa taanna!’ Taava Saamualip Daavi siunissami Israalimi kunngissatut niaquagut uuliamik tanippaa.

Kingusin­nerusukkut filisterit takkupput Israalikkunnut sorsukkiar­torlutik. Filisterit sakkutuuisa ilagaat inorujussuaq Goliatimik atilik. Goliatip Israalikkut ullut tamaasa illaruaatigalugillu qinngasaartarpai. Ima suaartarpoq: ‘Angummik qinersigitsi uannut unammil­lersinnaasumik. Ajugaappat ilissinnut inussiaataalissaagut. Uangali ajugaaguma ilissi uagutsinnut inussiaataalissaasi.’

Daavip angajuni Israalikkunni sakkutuujusut nerisassanik pajuppai. Goliati nilliasoq tusaavaa oqarlunilu: ‘Uanga akioriar­tussavara!’ Kunngip Saulip oqarfigaa: ‘Ila nukappiaraan­naavutit.’ Daavili akivoq: ‘Jehovap ikiussaq­qaarpaanga.’

Saulip sakkutuutut atisani Daavimut atortin­niaraluarpai. Daavili oqarpoq: ‘Uanga taakku atorsin­naanngilakka.’ Taava Daavip illusaatini tiguaa kuummukarlunilu. Ujaqqanik saattukujuunik tallimanik tigusivoq pooqattaminullu ikillugit. Taava inorujussuup Goliatip tungaanut arpappoq. Inorujussuarlu nilliavoq: ‘Akiuukkumaguit qaa’! Qilaap timmiaanut nunarsuullu nersutaanut nerliutis­savakkit!’ Daavip ersinani nipituumik akivaa: ‘Illit panaqarlutit naaligaqarlutillu ornipparma. Uangali Jehovap aqqani ornippakkit. Uagutsinnut akiuutin­ngilatit, Guutimununa akiuuttutit. Katersorsimasut kikkut tamarmik takussavaat Jehova panamit naalikkamillu nukittunerujussuusoq. Ajugaatik­kumaarpaatigut.’

Daavi illusaatiminut ujaqqamik ilisivoq tamaviaarlunilu illusariarluni. Jehovap ikiuineratigut ujarak Goliati ujaqqamik qaavatigut eqqorpaa. Inorujussuarlu uppippoq toqullunilu. Taava filisterit ersingaaramik qimarrapput. Illit Daavitulli Jehova tatigaajuk?