Israalimi kunngi siulleq

Jehovap Israalikkut eqqartuus­sisunik siulersuisoqalersippai, kunngeqar­nissartilli kissaatigineruaat. Saamualimut oqarput: ‘Inuiaat allat tamarmik kunngeqarput. Aamma uagut kunngeqarusuppugut.’ Saamualip tamanna iluarin­nginnamiuk Jehovamut qinnutigaa. Taava Jehovap oqarfigaa: ‘Inuit illit narrugin­ngilaatsit. Uangaana narrugigaannga. Oqarfigis­savatit kunngeqarsinnaasut kunngiusussalli assigiin­ngitsorpas­suarnik piumasaqarfigiumaarai.’ Taamaak­kaluartorli inuit oqarput: ‘Soqutaanngilaq. Kunngeqarusuppugut!’

Jehovap Saamuali oqarfigaa angut Saulimik atilik kunngin­ngorumaartoq siulleq. Saulip Raamamut tikeraarmani Saamualip Sauli niaquatigut uuliamik kuillugu kunngissatut tanippaa.

Taava Saamualip Israalikkut katersortippai kunngitaartik takunias­sammassuk. Saulili tammaavaat. Nalunngiliuk sooq? Sakkutuut atortuisa akornanni toqqorsimagami. Kiisami nassaarigamikku inuit akornan­nukaappaat. Sauli kikkunnit tamanit angineruvoq isikkoris­suullunilu. Saamuali oqarpoq: ‘Aajuna Jehovap qinigaa.’ Inuillu nilliapput: ‘Kunngi inuummersorli!’

Aallaqqaammut kunngi Sauli Saamualimut tusaasarpoq Jehovamullu naalalluni. Taamaak­kunnaarporli. Assersuutigalugu pilliivimmi pilliivoq uffa taamaalioq­qusaanani. Saamualip aatsaat utereeruni pilliiumaar­nerarluni utaqqeq­qusimagaluarpaa. Ingerlaannarli utinngimmat Sauli utaqqikatalerami aalajangerpoq nammineq pilliiniarluni. Saamualip tamanna qanoq isumaqarfigaa? Saulimut oqarpoq: ‘Jehovamut naalanngis­simasus­saanngik­kaluarputit.’ Saulip kukkussutini ilinniutigaa?

Kingusin­nerusukkut Sauli Amalekikkunnut sorsukkiar­tulermat Saamualip peqquaa Amalekikkut tamaasa toqussagai. Kunngialli Agagi Saulip toqunngilaa. Jehova Saamualimut oqarpoq: ‘Saulip tunuppaanga tusaarusuk­kunnaarlungalu.’ Saamualip tamanna aliasuutigisorujussuuaa Saulimullu oqarluni: ‘Jehovamut naalakkun­naaravit kunngimik allamik toqqaassaaq.’ Saamuali qimagun­niarluni tunummat Saulip Saamuali qallersaataata isuatigut tigoriarlugu siillugu peerpaa. Taava Saamuali Saulimut oqarpoq: ‘Jehovap kunngiussuseq ilinnit peersippaa.’ Aap, Jehova allamik imminut asannittumik naalattumillu kunngin­ngortitsissaaq.