Jehovap Saamuali oqaluuppaa

Palasiuneq Eli marlunnik erneqarpoq tupermi guutisiorfimmi palasiusunik. Aappaa Hofnimik ateqarpoq aappaalu Pinehasimik ateqarluni. Jehovap inatsisai malinngilaat inuillu ajortorujus­suarmik pisarlugit. Israalikkut Jehovamut pilliutissanik aggiussigaangata Hofni Pinehasilu neqinik pitsaanersiuisarput namminneq pissaminnik. Elip ernini ajortumik iliortartut tusaraluarlugu iliuuseqarfigineq ajorpai. Tamanna Jehovap akueriin­nassavaa?

Naak Saamuali Hofnimit Pinehasimillu nukarliunerugaluarluni taakkunatut iliuuseqanngilaq. Jehovap Saamuali nuannareqaa. Unnuit ilaanni Saamuali iterpoq atini taagorneqartoq tusaallugu. Makippoq Elimullu arpalluni oqarluni: ‘Maaniippunga!’ Elilli oqarfigaa: ‘Qaaqqun­ngilakkit. Innariar­toqqiinnarit.’ Saamualilu innariar­toqqippoq. Taava taama pisoqaqqippoq. Pingajus­saanillu Saamualip nipi tusarmagu Elip paasilerpaa Jehovap Saamuali qaaqqugaa. Eli Saamualimut oqarpoq nipimik tusaqqikkuni ima oqassasoq: ‘Jehova, oqalugit. Kiffat tusaavoq.’

Saamuali innaqqippoq. Nipilu tusaqqippaa ima oqartoq: ‘Saamuali! Saamuali!’ Akivorlu: ‘Oqalugit, kiffat tusaavoq.’ Jehovap oqarfigaa: ‘Eli oqarfigissavat ilaqutai ilanngullugit pillarumaarikka. Nalunngilaami ernini tupermi guutisiorfimmi ajortuliortartut, iliuuseqarfiginaguli.’ Aqaguani ullaakkut Saamualip pisarnermisut guutisiorfiup matui ammarpai. Jehovap qanoq oqarsimaneranik Elimut oqaluttuar­nissani annilaan­ngatigaa. Elilli qaaqquaa aperalugulu: ‘Ernera Saamuali, Jehovap qanoq oqarfigaatit? Tamaasa oqaluttuarikkit.’ Taava Saamualip sunik tamanik Eli oqaluttuuppaa.

Saamuali alliartor­tillugu Jehovap ikiortuarpaa. Israalikkut nunamiittut tamarmik nalunngilaat Jehovap Saamuali pruffiitissatut eqqartuus­sisussatullu toqqarsimagaa.