Jehovap Samsonni nukittuun­ngortippaa

Israalikkut amerlasuut guutipilus­sioqqilersimammata nunaataannik filisterit tiguaanissaat Jehovap akueraa. Israalikkulli ilaqarput Jehovamik asannittunik. Taakkua ilagaat Manoa. Manoa nulialu meeraqan­ngillat. Ullut ilaanni Jehovap inngilimi ilaat Manoap nulianut aallartippaa. Inngilip oqarfigaa: ‘Ernertaassaatit. Taassuma Israalikkut filisterinit annaatissavai. Nasiræeriussaaq.’ Nalunngiliuk nasiræerit kikkuunersut? Taakku Jehovamut immikkut kiffartor­tuupput. Nasiræerit nutsatik killoqqusaan­ngilaat.

Kingusin­nerusukkut Manoa ernertaarpoq Samsonnimillu atserlugu. Samsonni alliartor­tillugu Jehovap nukittoorsuan­ngortippaa. Assaannarminik løveq toqussinnaavaa. Taamaalluni Samsonnip kisimiilluni filisterit 30-t toquppai. Filisterit uumigaat qanorlu ilillutik toqussanerlugu periarfis­sarsiulerlutik. Unnuit ilaanni Samsonni illoqarfimmi Gaazami sinittoq filisterit illoqarfiup isaaffianukarput ullaakkullu toqunnias­sagamikku taakani utaqqillutik. Unnuakkulli Samsonni makippoq illoqarfiullu isaaffianukariarluni matorsui nusuppai. Matorsuit qaqqap Hebronip eqqaaniittup qaavanukaappai!

Kingusin­nerusukkut filisterit Samsonnip asannilerfigisimasaanut Dalilamukarput oqarlutillu: ‘Samsonni sooq taama nukittutiginersoq paasiniarukku sølverpas­suarnik akilissavatsigit. Tigusarerusupparput parnaarus­sivimmullu pisillugu.’ Dalilap aningaasarpassuit perusuk­kamigit akuersivoq. Samsonnip aallaqqaammut oqaluttuuk­kusunngik­kaluarpaa sooq taama nukittutiginerluni. Dalilali uteriingaarmat naggataatigut Samsonnip isertuk­kaminik oqaluttuuppaa. ‘Killortis­simanngisaan­narpunga, nasiræeriugamami,’ oqarfigaa. ‘Killortik­kaluaruma nukeerutissaanga.’ Samsonnip Dalila oqaluttuus­simasus­saanngik­kaluarpaa, ilaa?

Dalilap filisterit ingerlaannaq oqarfigai: ‘Isertugaataa paasivara!’ Dalilap Samsonni saamini sinilertippaa nujaalu killorlugit. Dalila nilliavoq: ‘Samsonni, filisterit maaniipput!’ Samsonni iterami nukeerus­simavoq. Filisterit tigusaraat, isaalu peeriarlugit parnaarus­sivimmut pisillugu.

Ullut ilaanni filisterit tuusintillit guutisiorfimminni guutertik Dagoni nalliut­torsiutiginiarlugu katersuupput. Ima nilliapput: ‘Guutitta Samsonni uagutsinnut tunnius­simavaa! Samsonni maanngaassiuk, illaruaatiginias­savarput.’ Sukarsuit marluk akorngannut inissippaat illaruaatigilerlugulu. Samsonni suaarpoq: ‘Jehova, qaa nukittor­teqqinnga.’ Tamatuma nalaani Samsonnip nujai talleqqis­simapput. Sukarsuit tamaviat ajappai, illorsuarlu tamarmi uppippoq guutisiorfim­miittullu tamarmik toqullutik, Samsonnilu aamma toquvoq.