Jeftap neriorsuutaa

Israalikkut Jehovamut naalakkun­naaqqipput guutipilus­siulerlutillu. Ammonikkunnit saassun­neqarput, guutipilus­siorfigisaasali illersorsin­naanngilaat. Israalikkut ukiorpassuarni atugarlioqaat. Taava naggataatigut Jehovamut oqarput: ‘Ajortuliorsimavugut. Akeqqatsinnit annaatsigut.’ Israalikkut guutiliatik aserorterpaat Jehovalu guutisiorfigeq­qilerlugu. Jehovap atugarliungaarnerat isigiin­narsinnaajun­naarpaa.

Jefta sorsuttartoq Israalikkut Ammonikkunnut sorsunnis­saannut siulersuisussatut toqqarneqarpoq. Jehovamut oqarpoq: ‘Qinnuigaakkit ajugaanis­satsinnut ikioqqulluta. Taamaalioruit uterninni illunnit siulliulluni ornillunga anisoq ilinnut tunniuk­kumaarpara.’ Jeftap qinnutaa Jehovap tusarpaa ajugaatillugulu.

Jefta uterluni tikimmat pania, meeratuaa, qilaatersorluni qitillunilu siullerpaalluni illuaniit anivoq ataatani tikilluaq­quniarlugu. Jefta qanoq qisuariarpa? Neriorsuutini eqqaavaa oqarlunilu: ‘Paniga, aliatsatsingaarparma! Jehovami neriorsor­nikuuara. Neriorsuutiga eqqortis­sagukku tupermut guutisiorfimmut Shilomiit­tumukar­tissavakkit taakani kiffartor­niassagavit.’ Taava paniata oqarfigaa: ‘Ataata, Jehova neriorsuif­figisimagukku neriorsuutit eqqortissavat. Qinnuigis­savakkilli ikinngutikka arnat qaammatit marluk qaqqameeqatigeq­qaaqqullugit. Taava kingorna aallassaanga.’ Jeftap pania inuunini naallugu tupermi guutisiorfimmi aalajaalluni kiffartorpoq. Ukiullu tamaasa ikinngutigisaasa arnat Shilomut tikeraar­tarpaat.