Hanna ernertaarusulluni Guutimut qinuvoq

Israalikkuusoq Elkanamik atilik marlunnik nuliaqarpoq, Hanna aamma Peninna. Hannali asaneruaa. Peninnap Hanna illaruaatigisarpaa suli meeraqalersiman­ngimmat namminerli meerarpas­suaqalereersimalluni. Ukiut tamaasa Elkanap ilaquttani tupermut guutisiorfim­mukaqatigisarpai Shilomiittumut. Ullut ilaanni taakaniitillutik Elkanap nuliani Hanna asangaakkani aliasuttoq maluginiarpaa. Ima oqarfigaa: ‘Qiaqinak, uigaarmami. Asavakkit.’

Kingusin­nerusukkut Hanna kisimiik­kusulluni Jehovamut qinujartorpoq. Qiangiililluni Jehovamut ikioqquvoq imalu neriorsuilluni: ‘Jehova, ernertaar­tikkumma taanna ilinnut pigitik­kumaarpara. Inuuninilu tamaat kiffartorfigis­savaatit.’

Palasiunerup Elip Hanna qiasoq takugamiuk aalakoorsorivaa. Hanna oqarpoq: ‘Naamik, naalagaq, aalakuun­ngilanga. Ajornar­torsiuteqaramaana Jehova oqaluukkiga.’ Elip paasilerpaa kukkusimalluni oqarfigalugulu: ‘Neriuppunga Guutip qinnutigisannik tuniumaaraatit.’ Hanna iluaallappoq ingerlaq­qillunilu. Ukioq ataaseq qaangiutin­ngitsoq ernertaarpoq Saamualimillu atserlugu. Hanna qanoq nuannaar­tigisimanersoq takorloorsin­naaviuk?

Hannap Jehovamut neriorsuutini puiunngilaa. Saamuali milutsik­kunnaaramiuk tupermut guutisiorfim­mukaappaa taakani kiffartor­niassammat. Hannap Eli oqarfigaa: ‘Tassa taanna nukappiaraq qinnutigisimasara ulluni inuuffigisassaani tamani Jehovamut pigitissavara.’ Elkanap Hannallu Saamuali ukiut tamaasa tikeraar­tarpaat atisassaanik nutaanik nassarlutik. Kinguneranilu Jehovap Hanna pingasunik ernertaartippaa marlunnillu panissaar­tillugu.