Inuit tamarmik asaqatigiilerpata

JESUS Kristusip qaqqami oqaluutsimini piffissaq inuit tamarmik asaqatigiilerfissaat tikkuarpaa. Tussiaat 37 issuarlugu ima oqarpoq: ’Pilluarput qanilaartut, nuna pigissagamikku.’ Tussiaammi allaatigineqarpoq qanoq pissutsit nuannersut tamakku piviusunngorumaartut: „Ajortummi piiagaasussaapput, Naalakkamulli neriuttut nuna kingornutissavaat.“ — Matîuse 5:5; Tussiaat 37:9.

Ajortut nunarsuarmit peerneqareerpata asaqatigiittullu kisimik inuulerpata allanngornersuussaaq. Jesusip qaqqami oqaluutsimini nangilluni takutippaa allanngornersuaq tamanna qanoq naammassineqarumaartoq. Ima qinunissatsinnik ilinniartippaatigut: ’Naalagaaffiit tikiulli; peqqusat qilammisut nunamissaaq pili.’ (Matîuse 6:10) Malugeriaruk Guutip peqqusaa qilammiinnaq pissanngitsoq. Tamanna The Christian Century-mi allaaserisami ima erseqqissarneqarpoq: „Guutip peqqussutaata qilammisut nunamissaaq pinissaa qinnutigisarparput.“

Guutip naalagaaffia Jesusip qinnutigeqqusaa suugami? Ersarissumik paasinarpoq tassaasoq naalakkersuineq piviusoq, qilammit aqutsisoq. Taamaattumik ’qilammiup naalagaaffianik’ taaneqarsimavoq. (Matîuse 10:7) Jesus Kristus, Guutip ernera, naalagaaffimmi tamatumani siuttutut toqqarneqarsimavoq.

Jesusip Mariamit erniunerata siunerujussuagut Jehovap pruffiitia Esajas tupinnartuliaq tamanna tamatumalu kingorna pisussat pillugit ima siulittuisimavoq: „Naalungiarmi uatsinnut erniuvoq, erneq uatsinnut tunniussaavoq. Taassuma naalagaassuseq tuimiugissavaa, aterissavaalu Siunnersuisoq nalissaqanngitsoq, Guuti Pissarsuaq, naassaanngitsumik Ataataasoq, Naalagaq eqqissisitsisoq. Naalagaaffia angissaqaaq eqqissinerlu ataavassalluni.“ (Jesaja 9:6, 7) Jesus toqunermi makinnermilu kingorna qilammi Ataatami saani issiasimavoq kunngitut naalagaalernissaminut peqqussut utaqqillugu. — Tussiaat 110:1, 2; Eprîarit 10:12, 13; sarĸúmersitat 11:15.

Silarsuaq uumissuinermik ulikkaartoq manna qanoq pineqassava? Malugeriaruk apeqqut tamanna Biibilimi qanoq akineqartoq. Guutip pruffiitia Daniel ima siulittuivoq: „Naalagaaffinnguit taakkua kunngii inuutillugit Guutip qilammiusup naalagaaffik qaqugumulluunniit atasussaq pilersikkumaarpaa, kingornalu inuiaat allat naalagaaffimmik pilersitsisinnaassanngillat. Guutip naalagaaffiata naalagaaffiit taakku tamaasa aserussavai sequmisillugit, namminerli soraajuitsumik atassaaq.“ — Daniel 2:44.

Siulittuutip tamatuma Biibilimeersup inuit atugaasa allanngorluinnarnissaat ersarissumik tikkuarpaa. Pissutsit aaqqissuussaanerat maanna atuuttoq tamarmi, inuit Guutip naalagaaffianut naalatsigitikkumanngitsut tamaasa ilanngullugit, nunarsuarmit peerneqassaaq. Suup taarsissavaa?

Silarsuassami nutaami naapertuilluarfiusumi inuuneq

Silarsuatoqaq nungutinneqarpat aniguisoqarumaarpoq. Biibili ima nassuiaavoq: ’Silarsuaq pilerinartuilu nungujartorput; Guutilli peqqusaanik naammassinnittoq naassaanngitsumik atassavoq.’ (1 Juánase 2:17) Guutip piumasaanik iliortut silarsuassami nutaami inuunissamut aniguissapput, soorluttaaq Noa ilaqutaalu silarsuup naliminni atuuttup suujunnaarnerani aniguisimasut. Apustili Peter ima allassimavoq: ’[Guutip] unnersuutaa naapertorlugu ilimagisaqarpugut qilassanik nutaanik nunassamillu nutaamik iluarsuseqarfissanik.’ — 2 Pîtruse 3:5-7, 11-13.

Silarsuassaq nutaaq Guutip neriorsuutigisaa pillugu Biibilimi allassimavoq: „Iluartut nuna kingornutissavaat najugaqassallutillu tassani naassaanngitsussamut.“ (Tussiaat 37:29) Inuit iluartut nunarsuarmi minguiarneqarsimasumi inuuneq nuannaarutigissavaat. Ilumut siunissaq nuannerunaq! Taamaalioreersimanngikkuit kajumissaarneqarputit pilluaqqussutissat Biibilimi neriorsuutigineqartut assini quppernerni siualianiittuni takutinneqartut misissoqqullugit.

Uummatikkut killinneqannginnerpit paasigakku Pinngortitsisorput pallorfiginnitsimi iluaqutissaannut taama nuannertigisunik neriorsuisoq? Tamannami Guutip siunertaraa aappariit siulliit pinngortikkamigit paratiisimilu nunamiittumi inuulersillugit. Malugiuk Guutip ima peqqummagit: „Kinguaassiorlusi amerliartoritsi nuna tamakkerlugu ilissinnullu naalatsigitillugu; naalagaagitsilu aalisakkanut immamiittunut timmissanullu qilaap ataaniittunut nersutinullu nunami aalasunut tamanut.“ — 1 Moses 1:27, 28.

Adam Evalu meeqqiortussaasimapput, meeqqallu taakkua alliartortillutik paratiisip nunamiittup nalerisimaarnartumik suliarinissaa peqataaffigissavaat. Eqqarsaatigiuk inuiaat amerliartortillugit Edenip naatsiivia allisinniassallugu qanoq nuannertigissasoq. Ersarippoq Guutip siunertarisimagaa nunarsuaq tamarmi paratiisinngortinneqassasoq. Siunertaa tamanna qaquguluunniit naammassineqassanerpa? Tamanna qularinngissinnaavarput, Guutimi taama neriorsuisimavoq. „Oqatsiaannaruma taamaalisissavara.“ — Jesaja 46:11; 55:11.

Nunami paratiisimi Biibilimi allaatigineqartumi quppernernilu siulianiittuni assiliartalersorneqartumi naassaanngitsumik inoorusuppit? Soorlu ilimagineqarsinnaasoq kinaluunniit oqaannarluni silarsuassami nutaami inuulersinnaanngilaq. Piumasaqaateqarpoq. Piumasaqaatit suut?

Naassaanngitsumik inuusussanut piumasaqaatit

Guutip silarsuassaani nutaami inuulerumagutta Guutimit ajoqersorneqarnitsitut asaqatigiinnissarput ilinniartariaqarparput. Biibilimi allasimavoq: ’Nammineq Guutimit ajoqersorneqarpusi asaqatigeeqqullusi.’ (1 Tásalûníkamiut 4:9) Qanoq ililluta Guutimit ajoqersorneqarpugut?

Pingaartumik oqaasia allanneqarsimasoq, Biibili, aqqutigalugu. Biibilimik atuaqqissaartartoq kangiamiu ima oqarsimavoq: „Biibilimi neriorsuutigineqartutut inuit tamarmik asaqatigiilernissaat qilanaareqaara.“

Ataataminut qinnutilluni Jesusip piumasaqaatit ilaat pingaaruteqarnerusoq eqqaavaa. Ima oqarpoq: ’Tassaavorli inuuneq naassaanngitsoq: illit ilisaralutit kisivit ilumut Guutiusutit, aallartitallu Jesus Kristus ilisaralugu.’ (Juánase 17:3) Atuagassiaaraq 32-nik quppernilik Guutip sumik piumaffigaatigut? ikiortigalugu taakku ilisarilersinnaavatit. Atuagassiaaraq tamanna piniarsinnaavat immersugassaq qupperneq 32-miittoq atorlugu, uungalu nassiullugu: Napasuliaq Alapernaarsuiffik, postbox 248, 3900 Nuuk, imaluunniit adressit qupperneq 5-imi allassimasut ilaat atorlugu. (gE 22/10 98)

[Qupp. 8-10-miungalusaq/assiliartat]

Guutip neriorsuutigisai

Nunarsuaq tamakkerlugu qatanngutigiit asaqatigiittut

’Inuup kinaassusia Guutip pinngilaa, kisianni inuiaqatigiinni tamani kinaluunniit mianerinnitsini iluarnermillu sulisoq nuannaraa.’ — apustilit suliait 10:​34, 35.

Pinerluttuliortoqassananilu sorsuuttoqassanngilaq

„Kisianni guutiitsut piiagaassapput.“ — Ussatit 2:22.

[Guutip] nunarsuarmi tamarmi sorsunnerit soraarsikkumaarpai.“ — Tussiaat 46:10.

Tamanut nerisassat pitsaasut naammangaartut

„Karrit naammangaartut nunami naasimassapput, qaqqat qaanni aalataarumaarput.“ — Tussiaat 72:16.

Inuit uumasullu eqqisseqatigiissapput

„Amaqqup najussavaa savaaraq, milakulaallu savaasaaraq aqupeqatigissavaa . . . nukappiarannguullu paariumaarpai.“ — Jesaja 11:6.

Nappaatit, utoqqalineq toqulu peqarunnaassapput

’[Guutip] qulliit tamaasa isaannit allarterumaarpai, toqulu peqarunnaassavoq, aliasuttoqarunnaarlunilu nilliasoqarunnaarlunilu anniartoqarunnaassavoq, siulliit peermata.’ — sarĸúmersitat 21:4.

Asasavut toqusimasut nunami inuunermut makitinneqassapput

’Ullut nalliukkumaarput, taava iliverniittut tamarmik [Jesusip] nipaa tusarumaarpaat; anillutillu makissapput.’ — Juánase 5:28, 29.