Inuit tamarmik qaquguluunniit asaqatigiissinnaalissappat?

INATSISINIK ilisimasup oqaatigeqqammerpaa ’inuuneq naassaanngitsoq’ anguniaraanni uummatikkut iluunngarluni Guuti asasariaqartoq tullerlu immisulli asallugu. Jesusip inatsisinik ilisimasoq nersualaarpaa oqarlunilu: ’Eqqortumik akivutit; ’taamaaliorit, taava inuussaatit.’ (Lúkarse 10:25-28; 3 Moses 19:18; 5 Moses 6:5) Kisianni angut imminut iluartuutinniartoq aperivoq: ’Kinami tulleraara?’

Qularnanngitsumik angutip ilimagigaluarpaa Jesus ima akissasoq: ’Juuteqatitit.’ Samariamiumilli tullerminik asannittumik naakkinnittumillu oqaluttuamini Jesusip takutippaa inuit qanorluunniit naggueqartut tamaasa aamma tullerigivut. (Lúkarse 10:29-37; Juánase 4:7-9) Jesusip kiffartornermini erseqqissartuarpaa Pinngortitsisup inatsisaani pingaarnerpaasut Guutimik asanninneq tullermillu asanninneq. — Matîuse 22:34-40.

Kisianni ilumoorlutik tullerminnik asannittunik immikkooqatigeeqarsimava? Inuit tamarmik asaqatigiilernissaannik neriuuteqassalluni piviusorsiornerua?

Ukiuni hundredelinni siullerni tupinnartuliaq

Jesus ajoqersukkaminut oqarsimavoq taakkua ilisarnaatigissagaat asanninneq naggueqatigiissutsimik, inuiaqatigiissutsimik killeqarfinnillu allanik tamanik qaangiisinnaasoq. Oqarpoq: ’Inassummik nutaamik tunivassi, asaqatigeeqqullusi; soorlu uanga asagissi, taamattaaq ilissi asaqatigiissaasi.’ Nangillunilu oqarpoq: ’Matumannga tamarmik ilisarissavaasi ajoqersugarigissi: asaqatigiikkussi.’ — Juánase 13:34, 35; 15:12, 13.

Ukiuni hundredelinni siullerni tupinnartuliaq Jesusip maligassiuinerata asanninnermillu ajoqersuutigisaata kinguneraa. Tupigusuutigineqaqisumik maluginiarneqartumilli ajoqersukkat Naalakkamik maligassiaa malillugu asaqatigiillutik inuupput. Atuakkiortoq Tertullian, ukiut hundredellit aappaanni pingajuannilu inuusoq, kristumiut pillugit kristumiuunngitsut oqaasii issuarpai: ’Takusigit asaqatigiissusii, aamma imminnut pilliutigeriaannaassusii.’

Apustili Johannes allappoq: ’Uaguttaaq inuunerput qatanngutivut pillugit iperassavarput.’ (1 Juánase 3:16) Jesusip ajoqersukkani ilinniartippai allaat akeqqatik asassagaat. (Matîuse 5:43-45) Jesusip tullermik asanninnissamik peqqussutaa inuit malikkaangassuk qanoq pisoqartarpa?

Naalakkersuinermik professoriusup tamanna eqqarsaatigeqqissaarsimavaa. Atuagasssiami The Christian Century-mi ima aperisimavoq: „Kia ilumoorullugu eqqarsaatigisinnaavaa Jesus akeqqaminut qaartartumik miloriuttakkamik miloriartoq, aallaammik eqqarasuartaammik atuisoq, innermik miloriuttakkamik atuisoq, atomimik qaartartulianik qaartitsisoq imaluunniit rakettimik aallarneqqortuumik anaananik meeqqanillu tuusintilippassuarnik toqutsillunilu aqqunaasinnaasumik igeriussisoq?“

Professori akivoq: „Apeqqut upperiuminaangaarami akinissaa pisariaqanngilarluunniit. Inuttut pissutsini suli ilumoorfigalugu Jesus taamaaliorsinnaanngippat, qanoq ililluta uagut taamaaliorsinnaassaagut sulilu taanna ilumoorfigalugu?“ Taamaattumik tupinnanngilaq Jesusip ajoqersugai siulliit politikkimut tunngassutilinnut akulerunnaveersaartuummata, taamaannerallu oqaluttuarisaaneq pillugu atuagarpassuit uppernarsarsinnaavaat. Assersuutitut marluinnaat taassavavut.

Atuakkami N. Plattip aamma M. J. Drummondip atuakkiaanni Our World Through the Ages-imi ima allassimasoqarpoq: „Kristumiut ileqqui malunnaatilimmik Romamiut ileqquinit allaanerulluinnarput. . . . Kristus eqqissinermik ajoqersuuteqarmat sakkutuujujumaneq ajorput.“ Edward Gibbon atuakkiamini Romamiut naalagaaffissuata aseroriartornera piuneerunneralu-mi allappoq: „[Kristumiut siulliit] . . . naalagaaffiup aqunneqarneranut sakkutooqarnikkullu illersorneranut peqataajumanngillat. . . . Kristumiut akisussaaffitik allat illernarnerusullu sumiginnarnagit taamaaliornissaat ajornarpoq.“

Ullumikkut qanoq ippa?

Kristusip asannittuliorneranik malinnittunik ullumikkut nassaassaqarpa? Qinerlerfissiami Encyclopedia Canadiana-mi allassimavoq: „Jehovap Nalunaajaasuisa suliaat kristumiussutsimik siullermik, Jesusip ajoqersugaasalu ingerlassimasaannik, ingerlatitseqqinneruvoq . . . Tamarmik qatanngutigiittut iliorfigeqatigiittarput.“

Tamanna qanoq malugineqarsinnaava? Taasinnaasatta ilagaat Jehovap nalunaajaasuisa naggueqatigiissuseq, inuiaqatigiissuseq inuiannulluuniit ikinnerussusilinnut ilaaneq pissutigalugu inoqatiminnik uumissuisannginnerat. Allanik toqutsiumanngillat, assersuutitut isumalimmik ’panatik saffiorsimagamikkik assallatserummut savissaliaralugit, qalugiusatillu saviliaralugit viinnequtilerissutitut’, Guutip kiffaasa ilumoortut iliuusissaattut Biibilimi siulittuutigineqartutut. — Jesaja 2:4

Tupinnanngitsumik Californiami aviisi Sacramento Union pingaarnertut allaaserisamini ima allassimavoq: „Oqaannarsinnaavugut nunarsuarmi inuit tamarmik Jehovap Nalunaajaasuisut upperisaqartuuppata aammik kuisisarneq uumissuinerlu atuunnavianngikkaluartut; asanninnerlu kunngitut naalagaassagaluarpoq.“

Atuakkiortoq Ungarnimiut atuagassiaanni Ring-imi ima allassimavoq: „Isummersimavunga Jehovap nalunaajaasui nunarsuarmi kisimiikkaluarpata sorsuuttoqartarnavianngikkaluartoq, politiillu suliassaat taamaallaat tassaassagaluartut angallattunik nakkutilliineq passiliornerlu.“

Italiami ilagiit atuagassiaataanni Andare alle genti-mi mattuttup arnap katuullip Jehovap nalunaajaasuinik nersorinninnini ima oqaatigisimavaa: „Nakuuserneq sunaluunniit iliuusererusunngilluinnarpaat upperisartillu pillugu atugarliortitaasarnerpassuatik naammagittarlutik atorpaat. . . . Silarsuaq qanoq allanngortigissagaluarpa ullaat ilaanni itertuugutta tamatta aalajangiulluinnarsimallugu kingorna sakkulersunngisaannassalluta, qanorluunniit akeqassagaluarpat, imaluunniit sunaluunniit tunngaviussagaluarpat, soorlu Jehovap nalunaajaasui taamaaliorsimasut!“

Jehovap nalunaajaasui siulliullutik inoqatiminnik ikiuisartutut ilisimaneqarput. (Galâsiamiut 6:10) Arnaq Letlandimiu atuakkiamini Women in Soviet Prisons-imi allappoq 60-ikkut qiteqqunneranni pillakkanut inissiisarfimmi Potmamiitilluni napparsimasorujussuanngorsimalluni. „Napparsimanera tamaat [Jehovap nalunaajaasui] napparsimasunut paarsisuupput aalaniartut. Najugarisatsinni pissutsit eqqarsaatigalugit pitsaanerusunik paarsisussaqanngilanga.“ Ima nangippoq: „Jehovap nalunaajaasuisa akisussaaffimmissut isigaat allat ikiussallugit qanorluunniit upperisaqaraluartut imaluunniit sumilluunniit naggueqaraluartut.“

Tigusanut inissiisarfinni Jehovap nalunaajaasuisa pissusii Tjekkiami nutaarsiassaqarfimmi sammineqaqqammerput. Piviusut tunngavigalugit filmiliaq „The Lost Home“ illoqarfimmi Brnomi filmiliarineqarsimasoq pillugu oqaaseqaatimini aviisi Seročský deník allappoq: „Pingaartuuvoq maluginiassallugu nalitsinni inuusut tatiginartut taakku [juutit Tjekkiamiut Slovakiamiullu aniguisimasut] malunnartumik nersorinnillutik tigusanik Jehovap nalunaajaasuisa akornanneersunik iluarinnillutik oqaaseqarnerat. Amerlasuut oqarput: ’Sapeeqaat, sapinngisartik tamaat ikiortarpaatigut, allaat toqutaassutigisinnaagaluarlugu. Ilaquttaminnut ilaasutut qinnuttarpaatigut, aamma kajumissaartarpaatigut tunniutiinnaqqunata.’“

Uumissortivummi? Ilumut asalersinnaavavut?

Asanninneq uumissuinermut ajugaasarpoq

Akeqqatsinnik asanninnissamik Jesusip inassutaa Biibilimi ussammut naleqquppoq: „Akeqqat kaappat nerleruk imerusuppallu immiguk.“ (Ussatit 25:21; Matîuse 5:44) Arnap qernertumik amillip nalunaajaasunngoqqammersup nassuiarpaa siullermik akeqqatut isigisimasanit asanninnermik takutitsivigineqarluni qanoq misigisimanarpoq: „Ilaanni killitsinnermik qiasarpunga Jehovap nalunaajaasuisa asanninnermik piviusumik takutitsivigigaangannga, inuit qanittukkut pikitsitsinerup aqqani nangaananga toqussinnaasaraluama.“

Frankrigimi Jehovap nalunaajaasuisa ilaat oqaluttuarpoq sorsunnersuup aappaata nalaani sanilimik anaanani Gestapomut killuutigisimagaa. „Tamanna pissutigalugu anaanaga ukiut marluk tyskit tigusanut inissiaaniittariaqarsimavoq, inuuneranik akeqangajalluinnartumik,“ nassuiaavoq. „Sorsunnerup kingorna franskit politiivisa arnaq taanna tyskinut suleqataasimanerarlugu uppernarsaammik anaanaga atsiortinniaraluarpaat. Anaanagali taamaaliorumanngilaq.“ Ukiualuit qaangiuttut sanileq taanna toqussutigisinnaasaminik kræfteqarluni napparsimalerpoq. Nalunaajaasup pania oqarpoq: „Inuunerata sinnera sapinngisamik atoruminartuutinniarlugu anaanama nalunaaquttap-akunnerpassui [atorpai]. Puiunngisaannassavara asanninnerup uumissuineq taamatut ajugaaffigisinnaammagu.“

Tassa inuit asanninnermik takutitsivigeqatigiinnissartik ilikkarsinnaavaat. Akerariissimagaluartut — tutsit hutullu, juutit Arabiamiullu, Armeniamiut Tyrkiamiullu, Japanimiut Amerikamiullu, tyskit russillu, naaggaartut katuullillu — Biibili ikiortigalugu ataasiussuseqalersimapput.

Ullumikkut inuit millionit arlallit akeqqaminnut asanninneq ilikkarsimammassuk, silarsuarmiut tamarmik taamaaliornissaat ajornartariaqanngikkaluarpoq. Kisianni inuit tamarmik asanninnermik sunnerneqassappata silarsuaq tamakkerlugu annertuumik allanngorneqaqqaartariaqarpoq. Allanngorneq tamanna qanoq piviusunngortinneqassava?

[Qupp. 7-mi assiliartat]

Afrika-kujallermi qaqortumik qernertumillu amillit

Juutit Arabiamiullu

Hutut tutsillu

Assersuutitut isumalimmik Jehovap nalunaajaasuisa ’panatik saffiorsimavaat assallatserummut savissaliaralugit’