Biibili qanoq oqarpa?

Satan ajortuliornitsinnut pisuutissinnaavarput?

INUIT siulliit ajortulioqqaarmata Satan pisuutinneqarpoq. ’Pulateriaarsuup salloqittarmanga nerivunga,’ Eva oqarpoq. (1 Môrsase 3:13) Taamaneerniilli ’kuukkooriaasarsuaq angisooq, pulateriaarsutoqaq Diaavulumik Satanimillu taaneqartoq’ inuiannut kamattorsuusimavoq, ’isumaat tappiillisillugit’ ’inuillu najugaanni nunalinnik tamanik tammartitsiniarluni’. (sarĸúmersitat 12:9; 2 Korintumiut 4:4) Kialuunniit Satanimit tatineqarnissani pinngitsoortissinnaavaa, tamannali isumaqarpa sunniineri akiorsinnaanngikkivut? Tamatigullu taanna ajortuliatsinnut pisuutissinnaavarput?

Biibilimi nassuiarneqarpoq Satanip Eva salloqittarsimagaa. (1 Timûtiuse 2:14) Eva salloqittarneqarluni isumaqalersinneqarpoq Guutip inatsisaa unioqqutikkuniuk Guutisut ilisimasaqartigilerlunilu taassumunnga atasariaarutissalluni. (1 Moses 3:4, 5) Evap Satan upperaa, taamaattumillu ajortuliorluni. Guutilli Eva iliorsimaneranut akisussaatippaa toqumut eqqartuullugu. Sooq? Satan sallugaluartoq Evap Guutip peqqussutaa nalunngilluinnarpaa. Naalannginnissamut pinngitsaalineqanngilaq; tamatigut piumasaminik iliorsinnaassuseqarpoq, Satanillu sunniinera akiorluarsinnaagaluarlugu.

Diaavulu akioruk

Inuit Diaavulup akiornissaa sapinngilaat. Evfisumiunut agdlagkat 6:12-imi allassimavoq ’anersaat ajortut qilaap ataani paaniagassarigivut’. Guutip ersarissumik ilimagaa Satanimit sunnertikkumanata ilungersussasugut. Inuulli qanoq ililluni Satan inngilipiluilu inunnit pissaaneqarnerungaartut akiorsinnaavai? Tassaaginnanngila asuliinnaq akiuunneq ajugaaffigisinnaanngisarput? Naamik, Diaavulumut akiuunnitsinni Guutip kisimiitinngilaatigut. Diaavulup pilerisaarutaasa assortornissaannut misilinneqartarnitsinnilu ajugaasinnaanissatsinnik Jehovap arlalinnik periusissaqartippaatigut. Biibilimi takutinneqarpoq Diaavulu kinaanersoq, periaasii suusut qanorlu ililluta illersorneqarsinnaasugut. — Juánase 8:44; 2 Korintumiut 2:11; 11:14.

Qanoq ililluta ’Diaavulu akerartorsinnaagipput’

Biibilimi tikkuarneqarput iliuuserisassat marluk Diiavulup akiornissaanut pisariaqartut. Ima kajumissaarneqarpugut: ’Taamaattumik Guuti naalagarsiorfigisiuk; Diaavululi akerartorsiuk, qimassavaasilu.’ (Jâko 4:7) Guutimut naalatsigitissagutta taassuma inatsisai naalattariaqarpavut. Eqqaamajuarutsigu Guuteqartoq, taannalu ajunngitsuusoq ataqqinangaartumillu pissaaneqarlunilu oqartussaassuseqartoq, aammalu qutsissunik najoqqutassiaqartoq, Satanip akiornissaanut nakussatsinneqassaagut. Aamma qasusuilluni Guutimut qinusarneq pingaaruteqarluinnarpoq. — Evfisumiut 6:18.

Eqqaamajuk Jesus Diaavulumit usserniarneqarmat qanoq pisoqartoq. Aalajaannissaminut ilaatigut iluaqutigaa Guutip inatsisaasa ilaat arlallit eqqaamallugillu issuaramigit. Satanip Jesus ajortuliortissinnaannginnamiuk qimappaa. Usserniarneqarneq naammat Jehovap Jesus nakussatseqqippaa inngilini atorlugit. (Matîuse 4:1-11) Taamaattumik Jesusip isumalluarluni ajoqersukkani kajumissaarsinnaavai Guutimut qinoqqullugit ’ajortumit annannissaannut’. — Matîuse 6:13.

Guutip eqqornaveeqqummik illersorluta annaanavianngilaatigut. Akerlianilli kajumissaarpaatigut sallusuissummik, naapertuilluarnermik, eqqissinermik uppernermillu atiseqqulluta. Tamakku ’sakkutuussutitut’ atorlugit ’Diaavulup qoqassiiniarneranut aalajaassinnaavugut’. (Evfisumiut 6:11, 13-18) Aap, Guutip ikiuneratigut Diaavulup ussiiniarneri akiorsinnaavavut.

Iliuusereqqusat aappaat Jâko 4:7-imi eqqaaneqartoq tassa ’Diaavulu akerartussagipput’. Taamaaliussagutta sianilluta ajortumik sunniiniarnera qimarratigisariaqarparput. Pissaaneranit salloqittaasumit eqqorneqarnaveersaartariaqarpugut ullumikkut silamiut nunap piinik pingaartitsivallaartumik kanngunartuliortumillu eqqarsariaasiat assortorlugu. Satan akiuuffigissagutsigu taamaalilluta assortortariaqarparput, aammalu inuunitsinni pingaarnerpaatut Guutip iluarisaanik iliortariaqarluta. Kisianni ajortuliornerit tamarmik Diaavulup sunniinerata toqqaannartumik kingunerinerpai?

Ilutsinni akiuunneq

Biibilimik allattoq Jakob ima nassuiaavoq: ’Kinaluunniilli usserneqararaaq, nammineq piummatsiminit qiisagaangami uerillunilu, taavalu piummasia pilereeraangat ajorti pinngoraraaq.’ (Jâko 1:14, 15) Ajoraluartumik sanngiissuseq naammalluinnanngissuserlu inunnguuserisarput ajugaaffigivissinnaanngilarput. (Rûmamiut 5:12) Biibilimi allassimavoq: „Nunarsuarmi ima iluassuseqartigisumik inoqanngilaq ajunngitsuliuinnavilluni ajortulinngisaannarlunilu inuusumik.“ — Nalunaajaasup oqaasii 7:20.

Tamannali isumaqanngilaq ajortulioriartarneq aqunneqarsinnaanngivissoq. Ilaannikkut nammineq usseriarneqarnitsinnut pisuusarpugut eqqunngitsumik qinersisimagutta. Ilumoorpoq kissaatipiluit naammalluinnanngissutsitsinnik imaluunniit Satanip sunniineranik pissuteqartartut, namminerli aalajangersinnaavugut kissaatipiluit ineriartortissanerlugit imaluunniit akueriumanagit. Tamanna eqqarsaatigalugu apustili Paulus allassimavoq: ’Inuk siaruartikkani naapertorlugit katersuiumaarpoq.’ — Galâsiamiut 6:7.

Akissussaaffit akueriuk

Amerlanertigut sanngiissutivut, kukkunivut naammalluinnanngissutsivullu — aap, ajortuliavut — nassuerutigissallugit ajornakussortittarparput. (Tussiaat 36:3) Eqqarsaatigigutsigu Guutip maannakkut naammalluinnassutsimik piumaffiginngikkaatigut tamatuma ikiussavaatigut ajortuliorsimasatsinnut akisussaaffimmik akuerinninnissatsinnut. „Iliorfiginngilaatigut ajortuliatta nalissaannik, iluaatsuliatsinnillu akiniaaviginata,“ tussiaasiortoq David taama allassimavoq. (Tussiaat 103:10) Guuti isumakkeerfiginnittuugaluarpoq, taamaattorli ilimagaa tamaviaarluta imminut naalakkersussasugut Diaavulup pilerisaarutai namminerlu ajortulioriartarnerput assortorlugit. — 1 Korintumiut 9:27.

Guutip nalunngilaa Diaavulu suliatsinnut pingaartumik sunniuteqarsinnaasoq inuiaallu ajortiliusutut pissusiannut akisussaaffeqangaartoq, paasisariaqarparpulli taamaakkaluartoq nammineq inuttut akisussaaffeqartugut. Rûmamiut 14:12-imi allassimavoq: ’Taamaattumik nungulluta immitsinnik Guutimut nassuersussaajumaarpugut.’

’Ajortorli uumigigutsigu ajunngitsorlu aalajangerfigigutsigu’ ajugaasinnaavugut. (Rûmamiut 12:9, 21) Arnaq siulleq, Eva, taamaaliunngitsoorsimavoq, naalannginninilu pissutigalugu pillarneqarluni; aalajaassinnaagaluarpoq Guutilu naalallugu. (1 Moses 3:16) Guutilli salloqittaanermi tamatumani Diaavulup pisooqataanera sumiginnarsimanngilaa. Diaavulu perloqqusaavoq suujunnaarnissaminullu eqqartuunneqarluni. (1 Moses 3:14, 15; Rûmamiut 16:20; Eprîarit 2:14) Qanittukkut taassuma ajortumik sunniinera akiortariaqarunnaassavarput. — sarĸúmersitat 20:1-3, 10. (gE 8/8 98)

[Qupp. 28-mi suminngaanneernera]

Erich Lessing/Art Resource, NY