Biibili qanoq oqarpa?

Atisalersoriaaserput qallikkullu pikisimanerput Guutip soqutigaa?

„Soorlu atuakkap imarisaasa allattorsimaffiata takutikkaa atuakkap suna sammineraa, taamatulli angutip arnalluunniit isikkuata atisaatalu inuup taassuma qanoq isumaliortaaseqarneranik takorloortissinnaavaatigut.“ — Philip Massinger, tuluk isiginnaagassiortoq.

UKIUNI 200-kkunni ilagiinni atuakkiortoq Clemens Alexandriamiu atisalersoriaatsit qallikkullu pikisimaneq pillugit najoqqutassiarpassualiorsimavoq. Pinnersaatit atisallu akimarpalaartut qalipaatigissullu inerteqqutaalerput. Arnat nutsaminnik misutsitseqqusaanngillat imaluunniit „kiinnaminnik peqqusersusaartumik ajuutigeqqusaartumillu taniniissaat“ inerteqqutaavoq. Angutit naatsuararsuarnik nujaqarnissaat peqqussutaavoq, „naatsunik nujaqarnerata angut ilumoorsaartuunissaanik eqqaasissammagu“. Tallumili umiit attoqqusaanngillat, „kiinaq ataqqinarpasitsittarmassuk ataatatullu oqartussaassuseqarpasitsillugu“.a

Ukiut hundredellit arlallit tamatuma kingorna naaggaartut siulersuisuat Johannes Calvin inatsisiliorsimavoq ilagiimini ilaasortaasut qanoq atisalersortassanersut — atisat qalipaataat qanorlu ittuuneri allaatigineqarput. Pinnersaatit putoortuliartalersukkallu iluarineqanngillat, arnaq „kanngunartumik portusuumik“ nujalerisimasoq parnaarussaasinnaavoq.

Isummat ingasaassisut taamaattut ukiut ingerlanerini upperisarsiornikkut siulersuisut tapersersorsimasaat inuppassuarnik ilumoortunik eqqarsartitsisarsimapput qanoq isikkoqarnerput Guutip ilumut soqutigineraa. Mutiusut aalajangersimasut kiinnamulluunniit tarnutit pinnersaatit ajorai? Biibili qanoq ajoqersuuteqarpa?

Inuup nammineq aalajangigassaa

Juánase 8:31, 32 naapertorlugu Jesusip ajoqersukkaminut oqaasii soqutiginarput: ’Oqaatsikka attavigiuarussigik . . . sallusuissut ilisarissavarsi, sallusuissutillu inussiaajunnaarsissavaasi.’ Aap, Jesusip ajoqersuutaata kinguaariinnit oqaluttuarsianit ileqqunillu ajoqersuinerlunnernillu nanertuutaasunit inuit inussiaajunnaarsissavai. ’Erloqisut nanertugaasullu’ nukissaqaqqilersissavai. (Matîuse 11:28) Jesusip Ataataataluunniit, Jehova Guutip, kissaatiginngilaat inuit inuunerat ima aqutsigissallugu inuit ataasiakkaat nammineerlutik iliuuseqarsinnaajunnaartissallugit namminerisamullu tunngasunik silatusaartunik aalajangiisinnaajunnaartissallugit. Jehovap kissaatigaa inuit inersimalluartuulissasut ’misigisaqatarnermit sungiusagaasunik sianissutillit ajunngitsorlu ajortorlu immikkoorsusiisigut ilisarisinnaallugit’. — Eprîarit 5:14.

Tassa Biibili atisalersoriaaseq qallikkullu pikisimaneq kiinnamulluunniit tarnutinik pinnersaatitut atuineq pillugit sukumiisunik inatsisinik imaqanngilaq, taamaallaat juutinut Mosesip inatsisaata ataaniittunut immikkut ittunik piumasaqaateqarpoq inuiannit eqqaaniittunit ileqqorluttuunermillu sunniinerannit immikkoorutigisaannik. (4 Moses 15:38-41; 5 Moses 22:5) Kristumiut aaqqissuussaanerata ataani atisalersoriaatsit qallikkullu pikisimaneq ataasiakkaat namminneq aalajangigassaraat.

Oqaatiginiarneqanngilarli qanoq atisalersoriaaseqarnerput Guutimut soqutaanngitsoq suulluunniillu tamarmik akuerisaasut. Biibilimi atisalersoriaaseq qallikkullu pikisimaneq pillugit Guutip isiginnittaasianik ersersitsisumik silatusaartunik najoqqutassiaqarpoq.

’Ittoorajullutik piitaajuillutillu’

Apustili Paulus allassimavoq kristumiut arnat ’assuassasut annorassanik ippinnaatsunik ittoorajullutik piitaajuillutillu nutsalluunniit perlaasat kuultilu sapanngarissulluunniit atisalluunniit akisuut assuutigeqqunagit’. Aammattaaq Peter ima unnersuussisimavoq: ’Pinnersaaseritsi qallermik pinnasi, nutsanik perlaajanik kuultilersornermillu atisaqarnermilluuniit pinnasi.’ — 1 Timûtiuse 2:9; 1 Pîtruse 3:3.

Peterip Paulusillu ersersinniarpaa kristumiut arnat angutillu pinnersartassanngitsut? Naagga. Biibilip angutit arnallu aalajaatsut pinnersaatinik uulianillu pinnersaatinik tipigissaatinillu atortut allaatigai. Ester kunngimut Ahasverusimut (Xerxes) isertinnani uuliat tipigissaatillit atorlugit tagiartortillunilu sivisuumik pinnersartissimavoq. Josefillu ilupaassiat kusanartut atorsimavai kuultinillu ujameqarsimalluni. — 1 Moses 41:42; 2 Moses 32:2, 3; Ester 2:7, 12, 15.

Oqaatsip ’piitaajuillutik’ Paulusip atugaata unnersuussutip qanoq isumaqarneranik paasitippaatigut. Allaqqaarfiani griikerit oqaasiat isumaqarpoq ingasaassinaveersaartoq imminullu nangarsinnaasoq. Pilimanianngitsuusariaqarpoq ingasaassisumillu imminut malugeqqusaartuunani. Biibilimik nutsikkat allat oqaatsit „mianersortoq“, „silatusaartoq“-lu atorpaat. Kristumiut utoqqaanertat pissutsimik tamatuminnga ineriartortitsinissaat piumasaqaataavoq. — 1 Timûtiuse 3:2.

Biibilimi atisalersoriaatsitsikkut qallikkullu pikisimanikkut ’ippinnaatsooqqulluta’ ’peqqutuujorpasinngitsooqqullutalu’ peqquneqaratta, ingasaassilluni allanik ajuallatsitsinissamut namminerlu ilagiillu kristumiut tusaamasaanerannik ajoqusiisinnaanermut mianersoqquneqarpugut. Qallikkut pinnersarsimanikkut malugeqqusaarnatik Guutimik mianerinnittut, peqqissumik isumallit ’inummik isertukkamik uummatip pianik, anersaap piuaatsup sallaatsup pianik aserujuitsumik’ pingaartitsissapput. Peterilu nangippoq: ’Taannami Guutimut erlinnaqimmat.’ — 1 Pîtruse 3:4.

Kristumiut ’silamiunut isiginnaagassiaalersimapput’. Allanit qanoq isigineqarnerlutik eqqumaffigisariaqarpaat, ingammik nutaarsiassamik nuannersumik oqaluusseqquneqarsimanerat eqqarsaatigalugu. (1 Korintumiut 4:9; Matîuse 24:14) Taamaattumik sumilluunniit, aamma isikkuminnut tunngasunik, tusarliussamut inuunermut pisariaqarluinnartumik oqaluussissutigisaminnik allanut tusarliiniarnerminni allamut saasaarisinnaasut akueriumanngilaat. — 2 Korintumiut 4:2.

Atisalersoriaatsit qallikkullu pikisimanerit sumiiffimmiit sumiiffimmut assigiinngitsorujussuusarput, silatusaartumilli qinersisinnaavugut Biibilimi ersarissunik silatusaartunillu najoqqutassaqaratta. Killissani najoqqutassiat tamakkua iluanniittuni Guutitta asannittup tamatta atisalersoriaatsikkut qallikkullu pikisimanikkut nammineq iluarinerusatsinnik iliorsinnaatippaatigut. (gE 8/8 98)

[Quppernerup ataani ilanngussaq]