Angajoqqaat tatineqartut

ANGAJOQQAANNGORLAAT meerartaamik qanoq iliorninngui tamaasa pingaartorsiutigisaqaat. Qungujoqqaarnera, oqaqqaarnera alloriaqqaarneralu persuarsiutigisaqaat. Ikinngutitik qanigisatillu meeqqamut tunngasunik oqaluttuuttarpaat assinginillu isiginnaartittarlugit. Meeqqaminnik asanninnerat paatsuugassaanngilluinnartarpoq.

Ilaqutariilli ilaanni ukiut ingerlaneranni pissutsit alianarsiartortarput. Angajoqqaat oqaasii qujaginnippaluttut oqaatsinik sakkortuunik peqqarniitsunillu taarserneqartarput; asannippaluttumik eqitaarinerit kamalluni unataanernik imaluunniit timikkut attaveqanngilluinnarnermik taarserneqartarput; angajoqqaallu tulluusimaarnerat narrutsassimanermik taarserneqartarpoq. „Meerartaarsimassanngikkaluarama!“ angajoqqaarpassuit oqartarput. Ilaqutariinnilu allani pissutsit suli ajornerusarput — allaat meeraq naalungiarsuunermini asanninnermik misigitinneqarneq ajorpoq. Sukkununa ajortoqartoq? Asanninneruna sumut pisimasoq?

Soorunami meeqqat sukkut ajortoqarnera namminneerlutik paasisinnaaneq ajorpaat. Tamannali namminneq inerniliinissaminnut akornutigineq ajorpaat. Immaqa meeraq qamuuna ima eqqarsartarpoq: ’Anaanap ataatallu asanngilaannga immaqa uanga ajorama. Immaqa naalanngippallaaqigama.’ Taamatut eqqarsarnini immaqa meeqqap aalajangiulluinnassavaa — inuunermini assigiinngitsorpassuartigut ajoqutigisinnaasaminik.

Ilumoortorli tassaavoq angajoqqaat meeqqaminnut asanninnermik pisariaqartitaannik ersersitsiviginnittannginnerat assigiinngitsorpassuarnik pissuteqarsinnaammat. Miserratigineqarsinnaanngilaq ullumikkut angajoqqaat sakkortoorujussuarmik tatineqarmata; immaqa arlalitsigut ullumikkut aatsaat taama sakkortutigisumik. Angajoqqaat ajornartorsiutinik aaqqiiniarnissaminnut piareersimannginnertik immaqa angajoqqaatut pisussaaffimminnut tutseqqajaasinnaasarpaat. Silatuumik ussatitoqaqarpoq ima: „Ilisimassasullip inoqutini qunusiarigunigit imminut sianiitsunngortissaaq.“ — Nalunaajaasup oqaasii 7:7.

’Ullussani kingullerni ajornartunik nalliuttoqassaaq’

Ukiut takorluukkat aningaasatigut ajornartorsiorfiunngitsut, kaannersuaqarfiunngitsut, panernersuaqarfiunngitsut imaluunniit sorsunneqarfiunngitsut — ukiuni hundredelinni makkunani pissutsit taama innissaat amerlasuut ilimagisimagaluarpaat. Piviusunngorsimanngillalli. Nalitsinni silarsuaq ukiuni hundredelinni siullerni Biibilimik allaqataasup siulittuutaanut naapertuunneruvoq. Taanna siulittuisimavoq nalitsinni ’ullussani kingullerni ajornartunik nalliuttoqartassasoq’. (2 Timûtiuse 3:1-5) Qularnanngitsumik angajoqqaat amerlanersaat nangaanatik oqaatsinut taakkununnga isumaqataajumassapput.

Meeraqarnerup akisunerujussua angajoqqaanngorlaat ilarpassuisa uissuummissutigisarpaat. Amerlasuutigut angajoqqaat marluullutik suliffeqartariaqartarput pilersuisinnaajumallutik. Nakorsaatinut, atisanut, meeqqerivimmut kiisalu nerisassanut ineqarnermullu aningaasartuutit pissutigalugit angajoqqaat akiligassarpassuarnit artorsinneqartutut misigilersinnaasarput. Aningaasatigut pissutsit Biibilimik atuartartunik eqqaasitsipput siulittuummik sarĸúmersitat-ni eqqaaneqartumik. Tassani piffissaq inuit ullormut aningaasarsiatik tamannguisa atorlugit ullormut pisariaqartitaminnik pissarsiniartarfigisaat eqqartorneqarpoq. — sarĸúmersitat 6:6.

Angajoqqaat tatineqarnerannik meeqqat paasinninnissaat naatsorsuutigineqarsinnaanngilaq. Meeqqammi pissusissamisoortumik asanninnermik soqutigineqarnissaminnillu pisariaqartitaqarput. Atisat mutit kingulliit, pinngussat elektronikkimullu tunngasut eqqarsaatigalugit ussassaarutinit kammalaatiminnillu sunnerneqarnerat pissutaalluni angajoqqaaminnut piumasarpassuaqalersinnaasarput.

Tatineqarneq alla angajoqqaanut tuttartoq, sulilu annertusiartorsorinartoq, tassaavoq naalasseriinneq. Soqutiginarpoq Biibilimi siulittuutigineqarsimammat ukiuni ajornakusoortuni makkunani meeqqat angajoqqaaminnut naalanngittarnerat siammarsimajumaartoq. (2 Timûtiuse 3:2) Meeqqat naalanngeriartarnerat nutaajunngikkaluarpoq. Angajoqqaallu meeqqap nalannginnera pinerlinissaanut patsisiginiarsinnaanngilaat. Ilumuunnginnerpali ullumikkut angajoqqaat avatangiisini naalasseriitsuni meeqqaminnik perorsaaniarsarimmata? Nipilersukkat nuannarineqartut kamannermik, naalasseriinnermik nikallunganermillu siuarsaasarput; tv-kkut isiginnaagassiani angajoqqaat sianiitsutut meeqqallu ilisimasaqarnerusutut saqqummiunneqartarput; filmini nakuuserneq atorneqaqaaq — tamakkua tamarmik meeqqanik sunniiuartarput, tamakkuninngalu ilaarsilerpata angajoqqaat oqimaatsorujussuarmik artukkerneqassapput.

’Asanniuitsut’

Itsarli siulittuut allaat ullumikkut ilaqutariinni ajornartorsiutinik annertunerulissutaasumik ilaqarpoq. Siulittuummi oqaatigineqarpoq inuppassuit ’asanniuitsuujumaartut’. (2 Timûtiuse 3:3) Asaqatigiinneq ilaqutariinnik ataqatigiissitsisarpoq. Allaat Biibilimi siulittuutinik qularinnittorujussuit nassuerutigisariaqartarpaat ilaqutariittut inuuneq ullumikkut nakkaakkaluttuinnartoq. Nunarsuaq tamakkerlugu aappariit avittut amerliartuinnarput. Inuiaqatigiit ilarpassuini ilaqutariit kisimiittumik pilersuisullit ilaqutassariillu ilaqutariinnit nalinginnaasunit nalinginnaanerupput. Pilersuisut kisimiittut angajoqqaassallu unamminiarnartunik imaannaanngitsunik, meeqqanut asanninnermik pisariaqartitaannik ersersitsiviginninnissaminnik ajornakusoornerulersitsisunik, amerlasuutigut naapitassaqartarput.

Tamakkorpassuit saniatigut angajoqqaat ilarpassui alliartorsimapput angerlarsimaffimmi asanninnermik immannguaannaq ersersitsiviusartumi imaluunniit ersersitsiviusanngilluinnartumi — angerlarsimaffimmi allasiorneq avinnerlu pissutigalugit avissaarsimasumi; angerlarsimaffimmi misigittaassutsip uumissuinerullu atuuffigisaanni; immaqalu allaat angerlarsimaffimmi oqaatsikkut, misigissutsikkut, timikkut imaluunniit kinguaassiuutitigut atornerluinerup ulluinnarni atuuffigisaanni. Angerlarsimaffimmi taama ittumi peroriartorsimasut immaqa inersimasunngornerminni suli tamanna naalliuutigisarpaat. Kisitsisit atorlugit nassuiaasiat aarleritsannartumik takutitsipput; angajoqqaat meeraagallaramik atornerlunneqartarsimasut namminneq meeqqaminnik aamma atornerlueqqajaasarput. Biibilip nalaani juutit ima ussateqarsimapput: „Siuaasatik paarnartortarsimammata kinguaavi kigulluttunngorput.“ — Hesekiel 18:2.

Guutilli innuttani oqarfigisimavai pinngitsoorani taamaattariaqanngitsoq. (Hesekiel 18:3) Angajoqqaat annertuumik tatineqarnerat meeqqaminnik ajortumik pinninnissaannik pinngitsoorani kinguneqartariaqarpa? Naamerluinnaq. Meeraqaruit siulianilu taaneqareersunik sorsugassaqaruit, qaqugumulluunniillu ataataalluartunngussanerlutit imaluunniit anaanaalluartunngussanerlutit eqqarsaatigisarukku, taava nikalloqinak. Kisitsisit atorlugit nassuiaasiat kisitsisitarinngilaatsit. Siornagut inuunerisimasat siunissannut pinngitsoorani aalajangiisuusariaqanngilaq.

Biibilimi uppernarsaaffigineqarpugut allanngornissaq ajornanngitsoq, tamannalu atuakkami Healthy Parenting-imi ima tikkuarneqarpoq: „Angajoqqaavit iliuuserisimasaannit allaanerusumik iliuuseqarnissat ilungersuutiginngikkukku meeraagallaravit periaasiusimasut, kissaatigigaluarukku kissaatiginngikkaluarukkuluunniit, nangeqqissavatit. Periaasitoqaq unitsinniarlugu paasilluartariaqarpat periaatsit pitsaanngitsut suut malinnerlugit, qanorlu allanngortinnissaat ilinniarlugu.“

Aap, periaasitoqqap ajortup unitsinnissaa ajornanngilaq, taamaalilluni nammineq qitornarisanik pinerliisalernissaq pinngitsoortillugu. Akornutissallu ullumikkut angajoqqaajunermik ajornakusoortitsisut anigornissaat ilinniarneqarsinnaavoq. Qanoq ililluni? Angajoqqaajulluarnissamut najoqqutassat pitsaanerpaat tutsuiginarnerpaallu sumi nanineqarsinnaappat? Allaaserisami tulliuttumi tamakku sammineqassapput.

[Qupp. 6-mi assiliartaq]

Angajoqqaat tatineqarnerminni meeqqaminnik asanninnertik oqaatigissallugu puiortarpaat

[Qupp. 7-mi assiliartaq]

Angajoqqaat meeqqatik asanninnermik pisariaqartitaannik tunisariaqarpaat