Oqaatsit sakkortuut ’anersaamik sequmisitsisarput’

„Sianiik!“a Arnap Japanimiup oqaaseq taanna eqqaamavallaaqaa — meeraagallarami taamatut oqarfigineqakulasarsimaqigami. Kimit? Atuaqatiminit? Qatanngutiminit? Naamik, angajoqqaaminit. Arnaq oqarpoq: „Taamanikkut nikallungakulasaqaanga; oqalorujuunneqaraangama aliasuttaqaanga.“

Angutip USA-meersup eqqaamavaa meeraagallarami ataatami angerlarnissaanut qunullunilu annilaangasarsimalluni. „Biilimik tikiuppallattarnera suli tusaqqoortarpara,“ angut oqaluttuarpoq, „taavalu siooraammerujussuartarpunga. Najaga toqqortarpoq. Ataata ingasattumik peqqissaarniartuuvoq, naviiginnavittarpaatigullu suliassavunngooq tamaasa naammaginanngitsumik suliarisaratsigik.“

Angutip taassuma aleqaa ima oqaluttuarpoq: „Eqqaamasaqanngilanga ataatap anaanallu uagutsinnik eqitaarinerannik, kunissinerannik imaluunniit oqarnerannik ’Asavakkit’ imaluunniit ’Tulluusimaarutigaakkit’. Meerarlu oqaatsimik ’Asavakkit’-mik tusanngisaannartoq misigisarpoq oqarfigineqartarluni ’Uumigaakkit’ — inuunermini ullut tamaasa.“

IMMAQA inuit ilaat isumaqassapput meeraanermit eqqaamasat taama ittut soqutaavallaanngitsut. Oqaatsinilli inussiarniitsunik sakkortuunillu oqaluffigineqarneq ajortumillu pineqarneq meeqqanut nalinginnaavoq. Tamakkununnga tunngasut tusagassiuutitigut qassiiliuutigineqarneq ajorput imaluunniit tv-kkut uisanartuliarineqassanatik. Ajoqusiineq takussaaneq ajorpoq. Ullulli tamaasa angajoqqaat meeqqatik taamatut piuartarpatigik ajoquseerujussuarneqassaaq meeqqap inunerata sinneranut sunniuteqartussamik.

1951-imi angajoqqaat eqimattat meeqqaminnut tallimanik ukiulinnut pissusilersortarnerat misissuiffigineqarpoq. Misissuisimaneq tamanna 1990-imi nanginneqarpoq, qujanartumillu taamanikkut misissuiffigineqarsimasut meeraat maanna utoqqasaanngulersut ilarpassui misissuisunit pissarsiarineqarput. Perorsarneqarsimanerisa kingunerisaasa sivisuumik sunniuteqarsimasut paasiniarneqarnissaat siunertarineqarpoq. Misissueqqinnermi paasineqarpoq qitornat maannakkut ajornartorsiornerpaasut, misigissutsikkut artorsaateqartut, aapparminnik, ikinngutiminnik suleqatiminnillu peqateqaruminaatsitsisut pinngitsooratik tassaasariaqanngitsut piitsunik angajoqqaallit, pisuunik angajoqqaallit imaluunniit ajornartorsiortunik angajoqqaallit. Tassaappulli qanilliuminaatsunik misigittaatsunillu, asanninnermillu immannguaannaq ersersitsisartunik imaluunniit asanninnermik ersersitsineq ajorluinnartunik, angajoqqaallit.

Inerniliineq tamanna oqaatsit ukiut 2000-ingajaat matuma siorna allanneqarsimasut ilumuussusiannik uppernarsaaqataavoq: ’Angajoqqaat ukorsii, qitornasi uumitsatseqinasigik [nikalloqqunagit, NV].’ (Kulorsamiut 3:21) Oqaatsikkut misigissutsikkullu angajoqqaat tungaannit pinerliineq tassaalluinnarpoq meeqqanik uumitsatsillunilu nikallortitsisinnaasoq.

Atuagaq Growing Up Sad naapertussagaanni ukiorpassuunngitsut matuma siorna meeqqat eqqarsaatimikkut artorsaateqarsinnaanerat nakorsat assortorsimavaat. Piffissarli misilittakkallu allamik takutitsisimapput. Atuakkamik tamatuminnga allattut oqaatigaat meeqqat eqqarsaatimikkut artorsaateqarsinnaanerat assortorneqarunnaarsimasoq, meeqqallugooq taamaattarnerat qaqutigoortooqqajanngilaq. Amerlanertigut pissutaavoq angajoqqaaminnit tunuartinneqartarnerat ajortumillu pineqartarnerat. Atuakkiortut ima nassuiaapput: „Angajoqqaat ilaasa meerartik isornartorsiortuartarpaat nikassartuartarlugulu. Allat meeqqaminnut attaveqanngilluinnartarput; angajoqqaat meeqqamut asanninnertik oqaatiginngisaannarpaat. . . . Tamanna ingammik meeqqanut taama ittunik angajoqqaalinnut ajorluinnartumik kinguneqartarpoq. Asanninnermi meeqqamut — aammami inersimasumut — seqernup erngullu naasumut pingaaruteqarnerattut pingaartigaaq.“

Angajoqqaat asanninnerat, ammasumik paatsuugassaanngitsumik ersersinneqartarlunilu oqaatigineqartarpat, meeqqat ilumoortumik pingaarutilimmik ilikkagaqassapput: Asaneqarnissaminnut qinngaqqunnaratik; naleqarlutik. Immaqa inuit ilaasa tamatuma meeqqanik pingaakujuttunngortitsinissaa annilaanngatigissavaat. Tamannali tamatumani annilaanngatigisariaqanngilaq, taamaanngimmammi. Tamanna pillugu atuakkiortoq ima allassimavoq: „Meeqqavit nammineq naleqassutsiminik naliliinera qanoq ittunik ikinnguteqalernissaanut, allanik peqateqarsinnaanissaanut, qanoq ittumik aappassarsiornissaanut qanorlu atsigisumik naammassisaqarnissaanut sunniuteqartarpoq.“ Nammineq naleqassutsip oqimaaqatigiissumik namminissarsiunngitsumillu isiginissaata pingaaruteqassusia Biibilimi ersersinneqarpoq, inatsisimmi pingaarnerup tullia ima nipeqarpoq: ’Tullit ilittut asassavat.’ — Matîuse 22:38, 39.

Takorlooruminaappoq angajoqqaat pissusissamisoortut meeqqap nammineq nalilittut misigineratut pingaartigisumik qajannartigisumillu aseruerusussinnaanissaat. Taamaakkaluartorli sooq tamanna taama nalinginnaatigaa? Qanorlu ililluni pinngitsoortinniarneqarsinnaava?

[Quppernerup ataani ilanngussaq]