Ikinngutigiiuvugut avissaartitassaanngitsut

TRACY tassaavoq qimmeq siulersortiga, labradori qernertoq qulinik ukiulik. Taannaqanngitsuuppat sumut tamaanga nikissinnaanavianngikkaluarpunga. ’Inoqusersortarpaanga’ toqqissinermillu misigitittarlunga. Tupinnanngitsumik ungagisorujussuanngorsimavara, tassaalersimavugullu ikinngutigiit avissaartitassaanngitsut.

Ilaannikkut inuit piaarinatik Tracyp kukkussutiginavianngilluinnagaanik kukkusoortarput. Assersuutigalugu, ullut ilaanni qimmeq angerlarsimatiinnarlugu ikinngutiga arnaq pisuttuaqatigaara. Nuannisarluta oqaloqatigiillualeruttorluta una soriallartoq tutinerliorlunga orluvunga. Ikinngutima puiorluinnarsimavaa tappiitsuusunga taamaattumillu aqqusernup sinaakkutaanik ilisimatinngitsoorlunga. Tracy ilagisimasuugutsigu taamatut pisoqarsimanavianngikkaluarpoq.

Ilami Tracyp annaannikuuaanga. Ilaanni aqqusinikkut ingerlatillunga lastbiili tunginnut ingerlasoq sangujoraalersimavoq. Maskiinaata nipaa tusaasinnaavara, kisianni soorunami lastbiilip suup tungaanut ingerlanera takusinnaanagu. Tracyp navianartoqarnera paasillugu nutsullunga isumannaatsumut pisipallappaanga.

Tappiitsuuvunga, takunnissinnaallungali

Sverigep kujataani 1944-mi inunngoramali tappiitsuuvunga. Meeqqat tappiitsut atuarfiannut najugaqarfiutigisumut pisinneqarpunga, tassanilu tappiitsut allattaasiannik atuarneq allannerlu ilinniarpakka. Nipilersorneq, ingammik noqartilimmik pattanneq, inuuninnut ilaalersimavoq pingaartoq. Ilinniarnertuunngorniatut atuarnera naammassigakku Göteborgip universitetiani oqaatsit nipilersornerlu ilisimatusarfigilerpakka.

Inuunerali allanngorluinnarpoq Jehovap nalunaajaasuisa marluk universitetip kollegiaanut pulaarmannga. Sivitsunngitsoq nalunaajaasut ataatsimiinnerinut orniguttalerpunga allaallu allat ilikkakkannik oqaluttuuttalerlugit. 1977-imi Jehova Guutimut tunniulluinnarsimanera takutillugu imermi kuisippunga. Timikkut tappiitsuuvunga, Guutilli oqaasianik atuaqqissaarnikkut erlinnangaartoq pissarsiaraara — anersaakkut isigisinnaassuseq.

Ullumikkut misigaanga timikkut takunnissinnaassusilinnit, anersaakkulli tappiitsuusunit, ajunnginnerusunik atugaqarlunga. (Naleqqiuguk Juánase 9:39-41.) Nuannaarutigaara qamuuna takunnissinnaassutsikkut takusinnaalereerakku Guutip silarsuassaa nutaaq, Guutip neriorsuutaa naapertorlugu tappiitsut tappissisut, nappaatit tamarmik ajorunnaarsinneqartut allaallu toqusimasut makititaasut! — Tussiaat 146:8; Jesaja 35:5, 6; apustilit suliait 24:15.

Aappaqanngitsuugaluarlunga tappiitsuugaluarlungalu Tracy ’inooqatigalugu’ ingerlalluarpunga. Suliartorninni angerlarninnilu aammalu Jehovap nalunaajaasuisa ilaattut teokratiimut tunngasunik suliaqarninni Tracyp uannik ikiuisarneranik nassuiaatilaassavakkit. (Matîuse 24:14; apustilit suliait 20:20; Eprîarit 10:25) Siullermilli Tracy pillugu oqaluttuuteqqilaassavakkit.

Immikkut sungiusagassanngortitaq

Tracy arfineq-pingasuinnarnik qaammateqartoq siulersortissatut piukkunnarnersoq paasiniarlugu misiligarneqarpoq. Paasinarsivoq eqqissisimasuullunilu ilinniartikkuminartuusoq nipituunullu tupparissuunani. Ilaqutariittut nalinginnaasumik inuuneq ilinniarniassammagu ilaqutariinni paarineqarpoq. Naammattumik utoqqaassuseqalermat qimmit siulersortissat immikkut atuarfiannut pisinneqarpoq.

Atuarfimmi tassani Tracyp qimmimut siulersortimut piumasarineqartut ilinniarpai, tassa inumminik matunut, majuartarfinnut aqqusinernullu siulersuinissaq. Aqqusinerni angallaffiulluartuni pisuinnaat aqqutaatigut ingerlanissani aqqusinertigullu ikaarnissani ilinniarpai. Aamma pisuinnaat aqqutaasa sinaasa sianiginissaat, angallattunut nalunaarutit malinnissaat akornutissallu navianartut ungaqqunnissaat ilinniarpai. Qaammatini tallimani sungiusarneqareerluni sulilernissaminut piareerpoq. Taamaalineranilu Tracymut ilisaritinneqarpunga.

Tracyp uannik ikiuinera

Ullaat tamaasa Tracyp itersartarpaanga nerukkarniassaganni. Taava suliartornissatsinnut piareertarpugut. Allaffik suliffiga angerlarsimaffinnit 20 minuttit missaanni pisuttariaavoq. Soorunami uanga aqqutaa nalunngilara, Tracylli suliassaa tassaavoq biilinut, inunnut, qulliit napasuinut allanullu apunnginnissara isumagissallugu. Allaffimmi sulitillunga Tracy allaffimma ataani utaqqisarpoq. Ullup-qeqqarnitsinni pisuttuarajuppugut.

Ullup nuannernersaa aallartittarpoq ualikkut suliffinnit angerlaraangama. Taava Tracymit siulersorneqarlunga illumiit-illumut oqaluussiartortarpunga Biibilimillu atuaqqissaaqatigisartakkannukartarlunga. Naapitatta amerlanersaat Tracymut inussiarnisaartarput. Tracy pattalaarlugulu eqitaartarpaat ilaannikkullu tamussiussassamininnguanik tunisarlugu. Aamma sapaatit-akunneri tamaasa kristumiut ataatsimiinnerinut najuuttarpugut. Ataatsimiinnerit kingornini meeqqat Tracy ilassiussallugu nuannarisaqaat, Tracyllu pattalaarneqartarnini iluarusuutigisaqaa.

Nalunngilara Tracy qimmiinnaasoq, ullut arlaanni toqujumaartoq, allamillu qimmitaartariaqarlunga siulersortissannik. Tamannali pitinnagu qanimut suleqatigiippugut immitsinnullu pinngitsoorsinnaanata. Tracy eqqanniinngikkaangat nalornilertarpunga, taannalu eqqissiveeruttarpoq siulersorsinnaanngikkaangaminga.

Paasineqarnerusariaqarpoq

Eqqumiikkaluartumik inuit ilaannikkut Tracylu avissaartinniartarpaatigut. Tracy uumasuutitut nalinnginnaalluinnartutut isigisarpaat qanimullu attaveqarnerput paasisinnaanagu. Paasisariaqarpaalli nukillaarsimasup issiavimmik assakaasulimmik pinngitsuuisinnaannginneratulli uanga Tracy pisariaqartitsigigakku. Avissaartinneqarutta assigissavaa isikka peerneqartut.

Tracyp uangalu akunnitsinni attaveqarneq avatangiisitsinnit paasineqarnerujartortillugu ajornartorsiutit ikinnerulertarput. Assersuutigalugu, issiavik assakaasulik ingerlaannaq akuerineqartarpoq, qimmilli siulersortit eqqarsaatigalugit taamaattuaannanngilaq. Inuit ilaat qimminut ersisarput, ilaallu qimminik iluarisaqanngivittarlutik.

Atuagassiaaqqami, Sverigemi isigisinnaassutsikkut innarluutillit nuna tamakkerlugu peqatigiiffiannit saqqummersinneqarsimasumi, qimmit siulersortit pillugit paasissutissat iluaqutaasorujussuupput. Tassani ilaatigut ima allassimasoqarpoq: „Qimmeq siulersorti tassaaginnanngilaq isigisinnaassutsimigut innarluutillip sumut tamaanga nikinniaraangami ikiortaa. Aammali tassaavoq ikiorti uumassusilik. . . . Tassaavoq ikinngut pakatsisitsinngisaannartoq.“

Aap, Tracy taartumi isittut ippoq, pissutsinilu maannakkut atuuttuni sapinngisamik nalinginnaasumik inuunissannut ikiortarpaanga. Qularinngilluinnarparali qanittukkut, Guutip silarsuassaani nutaami, pinngortitarsuup tupinnartortai alutornangaartut takusinnaalerumaarlugit. Taamaattumik anersaakkut isigisinnaassutsima pigiuarnissaa aalajangiusimalluinnarpara.

Massakkut Tracy saanni paloqqatillugu Napasuliaq Alapernaarsuiffik-up normuata kingulliup immiunneqarnerata tusarnaarnissaanut piareerpugut. — Oqaluttuartoq: Anne-Marie Evaldsson. (gE 22/4 97)