Biibili qanoq oqarpa?

UFO-t tassaappat Guutip oqariartortitai?

UKIUT hundredellit 20-ssaat qaangiukkiartortillugu nunarsuarmilu pissutsit ajorsiartuinnartillugit, avataarsuani timmisunut suussusersineqanngitsunut (UFO-nut) avataarsuarmiunullu tamakkunani inuttaanerarneqartunut upperneq annertusiartuinnarpoq. UFO-t tassaannaappat inuit uppertikkuminartut uukapaatinniarlugit salluliuutit?

Inuit UFO-nik avataarsuarmiunilluunniit takunnissimanerartut ilaat inuinnaapput unneqqarissut, allaat ilinniarluarsimasut, soorlu professorit ilisimatuullu. Taakkua qularinngilluinnarpaat avataarsuarmioqartoq inunnik isiginnaarlutillu ilaannikkut attaveqarfiginnittartunik. Allaat tapersersoqatigeeqarpoq avataarsuanit pulaartoqarsimanerartunik siunnersuisinnaasunik.a

Avataarsuarmiut annaassiniarnerat

Tassaanerminnik avataarsuarmiut inuttut timilersimasut, qularutiginninngitsut amerliartuinnartut ilaat atuakkami Aliens Among Us-imi Ruth Montgomery-p apersorpai. Taakkua ilaat siulittuipput ukiumi 2000-imi ’inngilit naalakkallu piareersarsimasaannik avataarsuani pisoqarumaartoq’. Ilaat isumaqarput avataarsuarmiut UFO-t atorlugit naasut uumasullu assigiinngitsut katersorlugillu sernissorumaaraat, imaluunniit UFO-t atorlugit inuit millionilikkuutaat nunarsuup aserornissaanit qimarngunneqarumaartut. Aseruinersuunngooq tamatuma kingorna inuit nunarsuarmut utertinneqassapput „ukiut nutaat aaqqissuussaanerlu nutaaq“ anersaakkut paasinnillutik pilersissallugu. Angut inuusuttoq Coloradomi USA-miittumi najugalik peqatigiinnut „Alien Youth,“-mik imminnut taagortunut ilaasortaasoq ilumoorsaarluinnarluni Iteritsi!-mut ima oqarsimavoq: „Siuaasatsinnit avataarsuaneersunit [annanniutinut] pisinneqarnissarput ikinngutikkalu utaqqivarput.“

Avataarsuaneersuunerartut ilaat ikittut Guutimit siulersorneqarsimanerarput, allallu oqarput Guuti oqaloqatigisarlugu qanoq ilillutik inunnik ikiuisinnaanerminnik siunnersoqqullutik. Avataarsuarmiut ulloriarsuarnit allaneersut atorlugit silarsuarmi ajunaarnersuaqarnissaanit Guutip inunnik annaassissamaarnerarneqarnera ilumoorpa?

Guutip inunnik attaveqateqarnera

Oqaluttuarisaanermi siusissukkut Guutip inuit attaveqatigisalereersimavai. Biibilimi oqaluttuarineqarpoq Adam Evalu, Noa, Abraham allallu Guutip oqaloqatigisarsimagai.b (1 Moses 3:8-10; 6:13; 15:1) Sinnattut, nipit takorruuisitsinerillu atorlugit Guutip piumasaa tusarliunneqarsimavoq Biibililu allatsinneqarsimaluni. Biibililli allanneqarnera naammassereermat Guutip inunnut toqqaannartumik nalunaartarnissaa pisariaqarsimava? Naamik, Biibilimimi oqaatigineqarpoq Allakkat Illernartut ’inuk Guutip pigisaa inerilluartittaraat ajunngitsuliornernullu tamanut piginnaanngorsartaraat’. (2 Timûtiuse 3:17) Biibilimi ersersinneqarpoq ulluni ajornakusoortuni makkunani Guutip oqaasia siunersiorneqartariaqartoq. Taamaakkaluartorli nunarsuarmiuunngitsoq aqqutigalugu Guutimit toqqaannartumik nalunaarfigitittoqarsinnaava imaluunniit ilitsersortittoqarsinnaava? Naamik, apustilimi Paulus ima oqarsimavoq: ’Uagulluunniit nammineq inngililluunniit qilammit iivangkiiliumik oqaluutigisatta anngiginngisaanik oqaluffigigaluarpasi, taanna perloqqunarsili.’ — Galâsiamiut 1:8.

„Avataarsuarmiut“ siulittuutaat qanittukkut nunarsuarmi allanngornersuaqarnissaa pillugu Biibilimi siulittuutigineqartunut naapertuussorinarsinnaapput, taakkuali oqaatigaat aniguinissaq pinngortitanik tigussaasunik tunngaveqassasoq. Isumannaatsumut piniarluni avataarsualiartaammut allamulluunniit qimaanissaq Biibilimi kajumissaarutigineqanngilaq. Oqaatigineqarporli imermi kuisinnikkut takutinneqartumik tunniulluinnarsimalluni Guutimut attaveqarnikkut taamaallaat sernissugaasoqarsinnaasoq. (1 Pîtruse 3:21; naleqqiuguk Tussiaat 91:7; Matîuse 28:19, 20; Juánase 17:3.) Jesusilu oqarsimavoq ’naggatissamut aalajangersoq annakkumaartoq’. — Matîuse 24:13.

Allassimaffinni tamakkunani erseqqissarneqannginnerpa aniguisinnaassagaanni Guutimut qanimut attaveqartariaqartoq, qimarnguimmut tigussaasumut qimaanani? Nunarsuarmiuunngitsunik oqaluttuat inunnut aniguissutaasinnaanngillat, akerlianilli Guutip taakkununnga piumasaqaataanit naassaanngitsumik iluaqutaasussanit allamut saasaarillutik.

Kikkunukua Guutip aniguinissamut ilitsersuussutaanit inunnik allamut saasaariniarsarisut, tamannali ilutigalugu Guutimit aallartitaanerarlutik? Ed Conroy atuakkiamini Report on Communion-imi ima allassimavoq: „Ufologit [UFO-nik ilisimatusartut] ilumoorussisut tarnip inuiaqatigiillu pissusiinik ilisimatuussitsimik ilisimasaqartut ilisimatusarnerminnut akuutittarpaat aliortukkat, anersaat, tarnersornerit, upperisarsiornikkut takorruukkat anersaapiluttullu isigineqartut. Ufologit ilarpassui inuillu avataarsuaneersuunerartut oqartarput allamukassagaangamik avataarsualiartaatinik pisariaqartitsigajunnatik. Avataarsuarmiunngooq takussaanatik angalasinnaapput avataarsuarliartaatillu atunngikkaluarlugit nunarsuarmi sumiluunniit takussaalersinnaallutik.

Biibilimi mianersoqqussutigineqarpoq Satanip inngilipiluisalu inunnik tammartitsinissartik aalajangiusimagaat. Pissutsit ernumatsannartut neriuutaarunnartullu inuit atugaat atorluarniarpaat aaqqiissutissanillu pilerinartunik ilumuunngitsunilli saqqummiussisarlutik. (2 Korintumiut 11:14) Biibilimi ima mianersoqqussuteqarpoq: ’Ullussani kingullerni ilaat uppernermik tunussiumaarput anersaat tammartitsisut anersaapiluillu ajoqersuineri najoqqutariniarlugit.’ — 1 Timûtiuse 4:1.

Taamaattumik „avataarsuanit tikeraat“ siunnersuutillu suulluunniit tappavanngaanneersuunerarneqartut itigartittariaqarput, qanorluunniit pitsaarpasitsigigaluarpata. Guutip oqaasianut taarsiullugu „avataarsuarmiut“ siunnersuutaannik malinnikkumasut pinngitsooratik tammartitaassapput — ulluni ajornakusoortuni makkunani ajorluinnartumik kukkullutik. (gE 8/7 96)

[Quppernerup ataani ilanngussaq]