Qanoq qaqugulu suliffissaaleqineqarunnaassava?

PINNGORTITSISINI assigalugu inuk sulinermigut nuannaarutissarsisinnaavoq; sulinerlu eqqortumik tassaanerarneqarpoq „Guutip tunissutaa“. (Nalunaajaasup oqaasii 3:12, 13; Juánase 5:17) Suliap soqutiginartup nuannaalersissinnaavaatigut misigitissinnaallutalu iluaqutaasugut atorfissaqartinneqartugullu. Kialuunniimmi suliffini nuannarisorsuunngikkaluaruniulluunniit annaarusunneq ajorpaa. Sulineq akissarsiorfiunermi saniatigut ulluinnarni inuunermik aaqqissuussaatitsisarpoq kinaassutsimillu misigititsisarluni. Taamaattumik tupinnarpallaanngilaq ’suliffissaaleqisut kissaatiginerpaasartagaat tassaammat suliffissarsinissaq’.

Suliffissarsiorneq

Soorlu paasereeripput suliffissaqarniarneq aaqqikkuminaassinnaaqaaq. Taamaattumik suliffissarsioriaatsit amerlaqaat. Pisinnaatitaasut tamarmik suliffissaaleqisunut tapersiissutinik pisinnaapput. Nunallu ilaanni suliffissarsiuussisarfimmukartoqarsinnaavoq arlaatigullu ikiorsiissutinik tunineqarluni. Allat namminneerlutik suliffimmik pilersitsisarput. Tamatumanili mianersortariaqarpoq. Namminersortut aallartitsigaangamik amerlasuutigut aningaasarpassuarnik atuisariaqartarput, aningaasartuutillu matussutissinnissaat ajornakusoorsinnaasarpoq. Aammattaaq akileraartarnermut akileraarusiisarnermullu inatsisit iserfigilluartariaqarput, tamannalu immini suliaavoq annertooq, tamakkulu maleruarlugit. — Rûmamiut 13:1-7; Evfisumiut 4:28.

Ilaat suliffissarsiuussinermik suliaqalersimapput, aaqqissuullugu ataavartunngortillugulu. Allat suliffeqarfinnut sulisussarsiortunut qinnuteqarsimapput aviisinulluunniit allagarsiisimallutik. Aviisit ilaat aqqutigalugit akeqanngitsumik suliffissarsiortoqarsinnaavoq. Iteritsi! tamatumunnga tunngasunik iluaqutaasunik atoriaannaasunillu siunnersuuteqartarsimavoq, inuusuttunut utoqqaanerusunullu.a — Takukkit quppermi 11-mi ilanngussat.

Naleqqussarnissamut suliassanillu assigiinngitsunik suliaqarnissamut, immaqa allaat nuannarivallaanngisaraluamik suliaqarnissamut, piumassuseqartariaqarpoq. Immikkut ilisimasallit oqartarput suliffissarsiorluni oqaloqateqarnermi apeqqutigineqartartut siulliit ilagigaat siornatigut sumik suliaqarsimaneq qanorlu sivisutigisumik suliffeqanngissimaneq. Suliffeqarnermik sungiusimannikkunnaarsimanermut takussutaasinnaasoqarpat sulisitsisumut takussutissaalluanngilaq.

Atuartuuneq atorluarsimagaanni assigiinngitsunillu piginnaaneqalissutigisimallugu, suliffissarsinissamut periarfissat pitsaanerusarput. Alberto Majocchi, aningaasaqarniarnermut tunngasunik ilinniartitsisoq, oqarpoq: „Sulisartut ilinniagaqarsimanngitsut suliffissaaleqinermik eqqorneqarnerusarput.“

Misigissutsikkut annertoqqusersorneqarnissap pingaassusia

Isumalluarnissaq pingaartorujussuuvoq. Isumalluarneq suliffissarsinissamut aalajangiisuusinnaavoq. Suliffissaaleqisut misigissutsikkut annertoqqusersorneqarneq qujamasuutigisarpaat, immikkoornialinnginnissamut ilaguutiinnalinnginnissamullu illersuutigisaramikku. Aamma imminut ataqqinermik pigiinnarnissaanut iluaqutigisarpaat, imminummi ataqqineq suliffilinnut imminut naleqqiunnikkut annaaneqarsinnaasarmat.

Naammattusaarinissaq ajornakusoorsinnaavoq. Stefano oqarpoq: „Isumakulungaarama piffissalluunniit pitsaasumik atornissaa ajornakusoortippara.“ Francescolu oqarpoq: „Sunut tamanut naalarulungaarama qanimut ikinngutima ilaat kukkunersiortalerpakka.“ Tamatumani ilaquttanit tapersersorneqarnissaq atorfissaqartinneqarpoq. Isertitakillineq ilaqutariinnut ilaasut tamarmik naleqqussarfigisariaqarpaat, atuinerlu appartinneqartariaqarpoq. Franco, suliffeqarfimmi ataatsimi ukiuni 23-ni sulereerluni 43-nik ukioqarluni soraarsitaasimasoq, oqarpoq: „Soraarsitaagamali nuliara isumalluartumik pissuseqartuaannarsimavoq, assullu qiimmassaasarsimalluni.“ Armandop ingammik nuliani qujamasuffigaa ’ileqqaallaqqissutut pisiniartarmat’. — Ussatit 31:10-31; Matîuse 6:19-22; Juánase 6:12; 1 Timûtiuse 6:8-10.

Biibilimi najoqqutassiat isumalluartumik anersaaqartuaannarnissatsinnut pingaarnerillu puiunnginnissaannut iluaqutigisinnaavavut. Inuit qulaani eqqartorneqartut, Iteritsi!-mit apersorneqartut, Biibilimi tuppallersaatissarsisarsimapput. Tamanna Guutimut qaninnerulissutigisimavaat. (Tussiaat 34:11; 37:25; 55:23; Filípimiut 4:6, 7) Jehova Guutimut attaveqarneq tamanit pingaarnerpaavoq, taannami ima neriorsuivoq: ’Iperassanngilakkit qimassanatillu.’ — Eprîarit 13:5.

Suliffissaaleqisut suliffissaaleqinngitsullu tamarmik Guutip oqaasiani kajumissaarneqarput inuttut pissutsinik ulluinnarni iluaqutaasunik ineriartortitsinissaannik. Jehovap nalunaajaasuisa sulisussatut unneqqarissutut piumaneqartarnerat pingaartinneqarnerallu nalaatsornerinnaanngilaq. Tassami eqiasuinnissamik unneqqarinnissamillu, eqiasunnissamiunngitsoq, Biibilip unnersuussutai maleruarpaat. — Ussatit 13:4; 22:29; 1 Tásalûníkamiut 4:10-12; 2 Tásalûníkamiut 3:10-12.

Suliffissaaleqinersuaqarunnaassaaq

Suliffissanik amigaateqarnermut pissutaasoq tunngaviusoq tassaavoq inuup namminissarsiussusia piumatussusialu. Soorlu Biibilimi allassimasoq: ’Inuit ilaat inoqatiminnut ajoqutaasumik pissaaneqarpallaarput.’ — Nalunaajaasup oqaasii 8:9.

Suliffissaaleqinermik ajornartorsiut — aamma ajornartorsiutit allat — qanittukkut aaqqinneqassapput, silarsuummi matuma inuisalu pissaaneqarumatuut ’ullussaanni kingullerni’ inuuvugut. (2 Timûtiuse 3:1-3) Silarsuarmik nutaarluinnarmik pisariaqartitsineqarpoq. Aap, silarsuarmik inuiaqatigiinnik naapertuilluartunik, naalakkersuinerup naapertuilluartup ataani piumatooqanngiffiusumi inuullutillu sulisinnaasunik, inulimmik pisariaqartitsineqarpoq. (1 Korintumiut 6:9, 10; 2 Pîtruse 3:13) Taamaattuminguna Jesusip inuit ilinniartissimagai Guutip naalagaaffiata tikiunnissaanik piumasaatalu nunarsuarmi maani pinissaanik qinusarnissaannik. — Matîuse 6:10.

Naalagaaffiup tamatuma sunniutissai qanorlu ililluni inuiaat ajornartorsiutaannik annernik atuukkunnaarsitsinissaa Biibilimi siulittuutaasumik ima allaatigineqarput: „Illuliorumaarput namminneq inigisassaminnik viinnequtinillu ikkussuillutik inerititai nerisassaminnik. Illuliussanngillat allamiut inissaannik ikkussuissanatillu takornartat nerisassaannik, . . . qinikkamalu inerissammatigit namminneq suliamik inerititaat. Sulilussinnassanngillat qitorniussanatillu tassanngaannaq toqusussanik.“ (Jesaja 65:21-23) Suliffissaaleqinersuaq qanittukkut naassaanngitsussamut atuukkunnaarluinnartinneqassaaq. Guutip aaqqiissutissaa pillugu paasisaqarnerorusukkuit Jehovap nalunaajaasuisa najukkanniittut attaveqarfiginissaannut tikilluaqqusaavutit. (gE 8/3 96)

[Quppernerup ataani ilanngussaq]

[Qupp. 11-mi ungalusaq]

Angerlarsimaffimmi suliffinnik pilersitsineq

• Meeqqanik paarsineq

• Atisanik mersorneq, allanngortiterineq iluarsaassinerlu

• Nioqqutissiortunik akortimut sullissineq

• Iffiorneq nerisassiornerlu

• Ilupaqusikkanik mersorneq, nissiaaneq (nissikullattaaneq), qilattaaneq (nuersaaneq), qilersuineq, marriorneq allanillu assassorneq

• Pequtinik kiffiaaneq

• Naatsorsuuserineq, maskiinamik allanneq, qarasaasiakkut kiffartuussineq

• Oqarasuaammik paarsineq

• Nujalerineq

• Uumasuutinik isumaginninneq aneerussinerlu

• Parnaarsaatinik iluarsaassineq matuersaasiornerlu (angerlarsimaffimmi sannavik)

• Tamakkuninnga sullissinissamik neqeroorutit amerlasuutigut pisiniarfinni akeqanngitsumik najukkamiluunniit aviisimi akikitsumik allagarsiissutigineqarsinnaasarput.

[Qupp. 11-mi ungalusaq]

Angerlarsimaffiup avataani suliffinnik pilersitsineq

• Illumik paarsineq (inuit feeriarneranni angerlarsimaffiinik nakkutiginninneq)

• Eqqiaaneq: pisiniarfinnik, allaffinnik, inuit angerlarsimaffiinik (immaqa sanasoqareernerani, ikuallattoqareernerani nuuttoqareerneraniluunniit); sunilluunniit sulineq (allat angerlarsimaffiini); igalaanik qillersaaneq (pisiniarfinni angerlarsimaffinnilu)

• Iluarsaassinerit immikkut akuerineqaqqaarfiusariaqanngitsut (atuakkanik atorniartarfinni nammineq iluarsaassinermut tunngasunik atuagarpassuaqarpoq)

• Tamalaanik sulisartoq: illup silataanik sallilikkersuineq; sikaaviliorneq matuliornerlu; illup silataani isersimaartarfiliorneq(?); qalipaaneq; ungaluugalersuineq; qalialersuineq

• Allaffinnik, aningaaserivinnik, pisiniarfinnik, naatsiivinnik torsuusarsuarnillu pequtinik inissitsiterineq, tamakkunanilu naasunik paarsineq

• Pigisanik nakkutilliineq: viceværtitut takusaasartutulluunniit sulineq (ilaannikkut ineqartitaaneq suliffimmut ilaasarpoq)

• Natersuarnik ikkussuineq eqqiaanerlu

• Assiliineq (inunnik pisunillu)

• Akisineq: elektrikerimit sullinneqarnermut biilimik iluarsaassineq, illumi atortup iluarsaanneqarneranut mersorneq il. il.

[Qupp. 10-mi assiliartaq]

„Qinikkama assammik suliaat tamakkiisumik atussavaat.“ — Jesaja 65:22, NV.