Nipilersortartup inuuneq piviusumik tulluartoq nanigaa

Nipilersortartoq tusaamasaq Tyskland Kangillermeersoq „Vågn op!“-imit apersorneqarpoq.

Hans, sooq nipilersortartunngorsimavit?

Nipilersukkanik tusarnaarneq meeraaninniilli nuannarisorujussuuara. The Shadows-ikkut aamma The Ventures-ikkut guitarimik nipilersugaat 1950-ikkut naalerneranni nuannarisorujussuuakka. Uanga aqqanilinnik ukioqarlunga guitarimik ilinniarlunga aallartippunga.

Kingorna nipilersugassiarsuarpaluttumik guitarimik nipilersorneq soqutigisarilerpara, 18-inillu ukioqarlunga tamatumunnga tunngasumik ilinnialerpunga. 1971-imi ilinniarnera naammassivara, tamatumalu kingorna nipilersornermik ilinniartitsisutut sulilerlunga. Ukiuni pingasuni inuusuttunik ilinniartitsisarpunga nipilersornermillu ilinniarfissuarmi ilinniartitsisuullunga. Aatsaat tamatuma kingorna inuussutissarsiutigalugu aliikkusersuutinik nipilersortartunngorpunga.

Guitarimik nipilersugassiara, „Verde“, nalaatsornerinnangajakkut ullut ilaanni nuannarineqarnerpaanngoriataarpoq.

Nipilersorneq ullumikkut ilinnut qanoq pingaaruteqartigaa?

Nipilersorneq nipilersukkanillu tusarnaarneq suli nuannareqaakka, sulilu tamatuminnga inuussutissarsiuteqarpugut. Maannakkulli, soorlu nalunngereerit, inuuninni allarujussuarmik salliutitaqarpunga.

Tamanna qanoq pisimava?

1977-imi januariugaa nutaamik tumerparpaartortaarpugut Valimik atilimmik. Paasigatsigu Jehovap Nalunaajaasorigaa aalajangerpugut upperisaanut akuliukkumanata, inuummi nammineq upperisani aalajangissammagu.

Ileqqussanut, tupamik atuinermut aammalu upperisarsiornikkut nalliuttorsiornernut tunngasunut taassuma isiginninnera uagut tamakkununnga isiginnittaatsitsinnit allaanerulluinnarnera nipilersoriartoqattaarluta angalanitsinni paasinasuarparput. Ullut tamangajaasa oqallissuataartarnernik tamanna kinguneqarpoq, Valillu akissagaangami Bibelimik atuisarnerata soqutiginnilersippaanga.

Tamanna sioqqullugu upperisarsiorneq qanoq isumaqarfigisimaviuk?

Guutimut uppertuaannarsimavunga aatsaalli pisariaqarluinnaraangat naalagiartarlunga. Isumaqarsimavunga aatsaat upperisarsiornermik ilisimatusarnikkut Bibeli paasineqarsinnaasoq. Palasinilli pakatsisinneqarsimavunga, ilagiillu ilaasortaaffigisama nukittuumik uppertunngortissinnaasimanngilaannga.

Valilli apeqqutikka akisinnaavai. Assersuutigalugu, Kainip nuliani sumit pisimaneraa siornatigut akissutissarsisinnaasimanngilara. Kainilli qatanngutimi arnat ilaannik nuliarsimaneranik nassuiaat naammagisimaarpara. — 1 Môrsase 4:17; 5:4.

Valip Bibelimik tunivaanga, ingerlaannarlu atualerpara. Aammattaaq atuakkat atuagassiallu Bibelimut tunngasut taassuma tunniussai atuarpakka, atuareeraangakkillu apersortaqaara. Nuliara, Birgit, ilikkakkannik nuannerluinnartunik oqaluttuuppara, nuannaarutigeqisannillu Bibelimik atuaqqissaarnitsinni peqataasalerpoq. Tassa 1977-ip naalernerani.

Qularnanngitsumik Bibelimik atuaqqissaartarnersi pissarsiaqarfigilluartarparsi?

Aap, taamaalluinnarpoq. Apeqqutit pingaaruteqartut ikinngutikkalu oqallissutigikulasarsimaqisavut Bibelimik atuaqqissaartarnitsinni akineqartarput. Ikinngutikkalu oqallittarnivut naammaginartumik inerneqartarsimanngillat tamattalu immikkut assigiinngitsunik isummersortarsimalluta.

Inuuneq pillugu eqqarsaatersortarsimaqaanga, inuit inunngortarnerput, anguniagaqarluni sulisarneq — naggataatigullu toqusarneq. Allamilli soqanngila? Inuunerup suna siunertaraa? Assersuutigalugu, inuit ilaat siusissukkut napparsimalersarput. Soorunami inuppassuit toqup kingorna inuuneqarneranik ersarinngikkaluartumik neriuuteqarniartarput, tamannali annikitsuinnarmik tuppallersaataasinnaavoq. Aammattaaq inuit, pissaanilissuit aammalu inuit akunnerminni, isumaqatigiinngissutiminnik aaqqiisinnaannginnerat malugisimavara..

Guutip oqaasiani, uagutsinnut inunnut iluaqutissanngorlugu allanneqarsimasumi, qanoq akissutissarsitigisinnaaneq paasillugu nuannerluinnartuuvoq. Neriuummik ersarinngitsumik tuninngilaatigut, neriuummilli aalajaatsumik tunngaveqarluartumillu tunilluta. Bibelimik atuaqqissaartarnerma silarsuarmi pissutsinik isumatsaatiginnikkunnaarsiinnanngilaanga, aammattaarli takutippaanga qanoq aaqqinneqarumaarnissaannik.

Valip ungasissumi najugaqarnini pissutigalugu isumagaa Gerhardimit nulianillu, ungasinngitsumi najugaqartunit, pulaarneqartarnissarput. Gerhard uattulli nipilersortartuuvoq. Immiussisarfimmi sulitillunga ilaannikkut naapittarsimavara, tupigusuutigaaralu takullugu qanoq allanngorsimatiginera.

Qanoq allanngorsimanera eqqarsaatigaajuk?

Eqqaamavara Gerhard popimik nipilersortartutut takisuunik nujaqartoq atugarliunnisumillu kiinaqartoq, ikiaroortartorpasilluni kanngunartumillu inooriaaseqarluni. Maannali allanngorluinnarsimavoq, ilisarnarunnaangajavilluni. Eqqissisimarpasippoq ingerlalluarpasillunilu, aammalu ipiippasippoq torerpasillunilu. Tamanna maluginiartorujussuuara.

Aallaqqaataaniilli sapaatip-akunneranut nalunaaquttap-akunneri pingasut sisamallu akornanniittut atortarpavut atuagaq sagdlusuíssut inûnigssamut nâgssáungitsumut sangmissoĸ ikiortigalugu Bibelimik atuaqqissaarnermut. Pujortarneq ajorlungalu, ikiaroorneq ajorlungalu kanngunartumik inooriaaseqannginnama naatsorsuutiginngilara inuuninni allannguivallaarnissara. Guutimilli ilisarsinerujartortillunga paasiartulerpara kristumiut silamiunut, Guutimit avissaarsimasunut, ilaanngitsut, tamatumalu nalunngeqatiginnissutiga sukannernerulersippaa.

Suut Jehovap Nalunaajaasuini kajungerisimavigit?

Ataatsimiinnerannut najuuteqqaaramali malugisimavara najuuttut tamarmik uanga ilagisartakkannit allaanerulluinnarnerat. Imminnut ilasseqatigiilluartarput asaqatigiippaloqalutillu, inussiarnerpaloqalutillu aaqqiagiippaseqalutik.

1978-imi Münchenimi ataatsimeersuarnermi, „Upperneq ajugaasoq“-mik qulequtaqartumi, tamanna suli maluginiarneruara. Aammattaaq tamaani najuuttut pingaartitsillutillu tusarnaaqqissaarput. Ataatsimeersuarnerup kingunitsianngua Bayernimi isiginnaartut „pissusissamissut“ illuinnartut nipilersorfigaakka. Tassani unnuup ingerlanerani isiginnaartut ilaasa aalakoortut akornanni savilersuuttoqarpoq.

Jehovap Nalunaajaasui aammattaaq allamik allaanerulluinnassuteqarput. Silarsuarmi nalinginnaasuuvoq inunnik tusaamasanik persuarsiutiginnittarneq. Siornatigut tamanut saqqummeraangama uitsatiinnaq inuit ima oqaluttaraluarput: „Ricky Kingiuna!“ Tamaanili taama pisoqanngilaq. Ativinnillu taagorneqarnera assut iluaraara. Nipilersortartutut taaguutiga, pas-inni allaqqasoq atsiornertullu atortuusoq, taamaallaat suliannut atatillugu atortarpara.

Piffissap ingerlanerani paasivara suli inuuninni arlalinnik allannguisariaqarlunga. Tamanna tikillugu nipilersorneq inuuninni pingaarnerpaasimavoq. Suut tamaasa tamatumunnga tunngatissimavakka, nuliamalu inooriaaseq tamanna sungiussimavaa. Paasilerparali nipilersorneq inuuninni pingaarnerpaasariaqanngitsoq. Anersaakkut siumukartuarpugut 1979-imilu Jehovap Nalunaajaasuisut kuisilluta.

Misilittakkatit tunngavigalugit oqaluttuarisinnaaviuk nipilersukkat qanoq inunnut sunniisinnaanerat?

Nipilersukkat misigissutsitsinnut periaatsitsinnullu sunniusinnaallutillu sakkortusisitsisinnaapput. Nipilersukkat ilaat inuummarissinartumik qasukkarnartumillu inunnut sunniuttarput isumakkullu eqqissisaasinnaallutik. Nipilersukkat taama ittut tassaasarput erinnamikkut nipigilluaqatigiissaakkat, takti rytmelu pingaarnerutinnagit.

Aammattaarli tamatuma akerlianik pisoqarsinnaavoq. Rockimik nipilersukkat qanoq tusarnaartiminnut sukasimaalersitsillutillu nakuusertitsilersinnaanerat takusareersimavara, tamannalu isiginnaartut akornanni parrunnermik kinguneqarajuttarpoq. Nipilersukkani taama ittuni rytmep sakkortulluinnartup inuit misigissutsiminnik noqitsisinnaajunnaarsittarpaat.

Nipilersukkanik toqqaaniarnermi suut eqqarsaatigisariaqarsoraagit?

Peqqissaartumik toqqaasariaqarpoq. Paasigakku nuutaatima ilaat anersaarsiornermut diaavulusiornermullu siuarsaataasinnaasut eqqaavimmut igissimavakka. Nuutit taama ittut puuisigut allagartaasigulluunniit ilisarineqarsinnaapput.

Nipilersukkat taallaasa sunniuteqarsinnaanerannik suusupaginninneq kukkuneruvoq. Taalliortartut qularnanngitsumik kikkut tamarmik nuannarisinnaasaannik taalliorniartarput. Nipilersortartoqatigiit inuusunnerusut namminneq inuttut ajornartorsiutitik taalliariniarnerusarpaat. Inuusuttoqatiminnut sakkortuumik sunniisarput, taallaallu alanngaarlugit inuusuttunit atorneqartarput. Immaqa ikiaroornartutornissamut, aalakoornissamut imaluunniit kinguaassiuutitigut kanngunartuliornissamut taallaannit kajumissaarneqartarput. Isumap tamatuma pissaanimi ilaa ullumikkut annaasimavaa, tamakkiisumik „kiffaanngissutsimik“ atuineq ajornartorsiutinik allanik pilersitsisimannguatsiarmat.

Nipilersukkat aliikkutassiat qititassiallu aammattaaq eqqunngitsumik pilerissuseqalersitsisinnaapput. Erinarsukkat immaqa imarisinnaavaat pilluarneq asanninnerlu tusarnaartut ilarpassuinit inooqatimik amigaatigisaattut isumaqarfigineqartut. Erinarsortoq erinarsugaalu ataatsitut isigineqalerajupput. Nipilersortartut nalunngisama ilaat tamanna pissutigalugu ingammik arnat akornanni nuannarineqartorujussuupput.

Eqqarsaatersuutit silarsuaannut tamatumunnga isersimagaanni nipilersortartoq pingaartinneqartorujussuanngortarpoq. Aallaqqaataani immaqa eqqaassutissatut nipilersortartup atsiornera piumaneqartarpoq. Inuilli ilaasa nipilersortartoq assigiumasamittut isigilersarpaat. Ingasattumik nuannarilersarpaat, guutisiorfittut pilerlugu. Immaqalu assingi assilialiuttarpaat, atisalersortarneratut atisalersortalerlutik isikkuatullu isikkulersorlutik, taamaalillutillu namminneq kinaassusertik tunorlinngortittarlugu. Kristumiulli eqqaamasariaqarpaat Guuti kisimi pallorfigisassaammat.

Suliat kristumiutullu pisussaaffitit qanoq ilillutit kattutsippigit?

Aningaasarsiorniarlunga nipilersoriartoqattaarlunga maanna suli angalasartuuguma inuussutissarsiutigalugu nipilersortartuunerma ingerlatiinnarnissaa nuannarinavianngikkaluarpara. Sapaatit-akunneri tulleriiaaginnarlugit angalasarallarama misigisimavara silarsuarmit tatisimaneqarnera sakkortusiartuinnartoq uangalu sanngiilliartuinnarlunga. Sapaatip-akunneranut ataatsimiittarnerit najuuffigisarnissaata aammalu kristumioqatima ilagisarnissaata qanoq pingaaruteqartiginerat paasivara. Maanna pissutsit atukkakka allanngorsimalermata ilagiinni utoqqaanertatut akisussaaffik naammassisinnaalersimavara.

Maanna angerlarsimaffinni erinniorlungalu taalliortarpunga. Immiussakka kingorna immiussisarfimmi suliarineqartarput. Katerisimaarnerni immikkut ittuni ilaannikkut nipilersortarpunga, sivikitsuinnarmillu angerlarsimaffiga qimassimasarlugu. Juullisiortut ukiortaarsiortullu, imaluunniit karnevalertut akornanni soorunami nipilersorneq ajorpunga, naak nipilersortartut allat taama ilineri aningaasarsiorfiginerpaasaraluaraat. Unnuit tamaviisa nipilersoriartaraluaruma uppernera erlinnangaartoq ajoquserluinnassagaluarpoq.

Aaqqissuussaanermik naapertuilluartumik neriuut Bibelimeersoq nanisimagakku pilluaatigeqaara, sapinngisamillu inunnut amerlanerpaanut ingerlateqqikkusullugu. Aalajangersimasumik akuttunngitsumik najugaqarfinni Naalagaaffimmik tusarliussaq illumiit illumut oqaluussissutigisarpara. Piffissamik nammineq aaqqissuussisinnaanera iluaqutigalugu ullup qeqqinnaani soqutiginnittunik Bibelimik atuaqqissaaqatiginnittarpunga. Nuliaralu nuannaarutigaarput ilaqutariit sisamanik ilaasortallit Bibelimi sallusuissummik nanisinissaannik ikiorsimagatsigik.

Siunissaq qanoq isigaajuk?

Sakkussiornikkut qaangerniunneq, kaannersuit, mingutsitsineq silarsuarmilu ajornartorsiutit allat aaqqinneqarsinnaanngitsut siornatigut eqqarsaatigigaangakkit imminut aperisarpunga inuuneq ilumut siunertaqarnersoq. Maanna allamik pissutsinut isiginnittaaseqarpunga, nalujunnaarsimavarami Guutip suut tamaasa sianigigai. Soorlu Tussiaat 37:37-mi 38-milu ersersinneqartoq Guutimik tapersersuisut „pilluarnermik siunissaqar“put, „guutiitsulli siunissaqartitaanngillat“.

sarĸúmersitat 21:4-mi allassimasut suli nuannareqaakka: ’Guutip qulliit tamaasa isaannit allarterumaarpai, toqulu peqarunnaassaaq, aliasuttoqarunnaarlunilu nilliasoqarunnaarlunilu anniartoqarunnaassaaq, siulliit peermata.’ Tassa nappaatit toqulu, aap, ’siulliit’ tamarmik, peerneqassapput. Taava nunarsuaq paratiisinngorumaarpoq eqqissisimanartoq.

Soorlu Bibelimik atuaqqissaarnerma inuunera piviusumik tulluartunngortissimagaa, taamattaaq Guutip pinngortitat tamaasa eqqissinartumik tulluarluinnartunngortikkumaarpai. — Oqaloqatigineqarpoq Hans Lingenfelder. (gD 8/8 88)

[Qupp. 27-mi assiliartaq]

Nipilersortartutut inuunera 1977-imi allanngoriartulerpoq

[Qupp. 29-mi assiliartaq]

Hans (guitarertoq qiterleq saamerleq), nuliami saniani, kristumioqatiminik ataatsimooqateqartarnini nuannaarutigaa