Meeqqamut inunngorsimanngitsumut anaanaasup allagai

ARNAAVUNGA 37-nik ukiulik, ueqarpunga pingasunillu asasannik qitornaqarlunga. Ukiut 16-it matuma siorna igaffiup nerriviani innangatillunga kinaassusillip kimilluunniit ilisarisimaneqalinngisaannartussanngortup inuunera kipineqartippara.

Kinaassusilik taanna taamaallaat qaammatini pingasuni affarmilu piusimavoq. Isumaqarpungalu taassuma ikinngutituaa tassaasimassasoq Jehova Guuti. (Tussiaat 139:13-16) Meeraq taanna allanit tamanit kissaatigisaannginnguatsiarpoq.

Taamani, ukiut 16-it matuma siorna, ilinniarnertuut ilinniarfissuanni ilinniarpunga, ullup affaani suliffeqarlunga illoqarfissuarmilu USA-p kitaata sineriaaniittumi kisimiillunga najugaqarlunga. „Sunngorsimasorpassuit“ akornanni „sunngornissara“ eqqarsaatersuutigisarpara.

Siunissannut pilersaaruteqaqaanga, meeraqarnissaralu inooriaaserisannut naleqqutinngilluinnarpoq. Naartuersinnissara naartutitsisima siunnersuutigaa, arlaannarpulluunniillu allamik periarfissaqarsinnaaneranik eqqartuinngilaq. Qanoq iliuuseriligarput — tarnermik uumassusilimmik toqutsilernerput — eqqarsaatiginngilaraluunniit. Ataasiaannarlungaluunniit eqqarsaatiginngilara Guuti tamatumunnga qanoq isiginninnersoq. — 2 Môrsase 21:22, 23; Rûmamiut 14:12.

Taamanikkut naartuersinneq inatsisitigut akuerisaanngilaq. Nakorsarli inatsisinik unioqqutitsilluni naartuiisartoq naartutitsisima pissarsiaraa.

Taamaattumik ikinngutima inaani innangavunga inooriaatsinnik „akornusiisoq“ angummut uanga ilisarisimanngisannut peersinniarlugu. Taama iliornerma qanorpiaq oqaatigisariaqarnera akueriumanngilara, taamaattumillu isumakkut annikilliuutiginagu. Timikkulli ajoqutissarsiffigaara. Ninngattoortoqalerpunga ulluni pingasuni kissarneqarujussuaatigisannik. Nakorsamit pissusissamisoortumik suliarineqareernerma kingorna ajoqutissarsinanga iluarsivunga.

Taamaassoraara. Taama ajortigisumik iliuuseqarsinnaanngortillunga uummatima taama manngertissimaneranut suup sunniussimanera kia ilisimanerpaa?

Amiilaarnartoq tamanna siornatigut inuuninni pisimasoq uinnut oqaluttuarisimanngilara. (Ukiorpassuit tamatuma kingorna aatsaat naapikkatta.) Tamatuminnga oqaluttuutissallugu sumut iluaqutaassanersoq naluara. Sallusuissut ilinnialerakku (ukiut qulit sinnillit matuma siorna) Jehova qinnuigisimavara ajortuliarisimasarpassuannik, aammalu meerassama suli inunngorsimanngitsup toqussimaneranik, isumakkeerfigeqqullunga. Jesusip pilliutaa iluaqutigalugu ajortikka matoorlugit Guutip uannik naakkinnittuliorfiginninnissaa qularinngilara. Guutip oqaasiani, Bibelimi, ilikkakkakka naapertorlugit inuulernerma kingorna taama ingasatsigisunik ajortuliortarunnaarpunga. Immaqali imminut isumakkeerfiginngisaannassaanga. — 1 Juánase 1:7.

Qitornara qaammatinik arlalialunnik utoqqaassuseqartoq, imaluunniit arfinilinnik ukioqartoq, imaluunniit 20-nik ukioqartoq, toqussimagaluarukku Guutip aaqqissuussaani nutaami makititaanissaanik neriuutissaqassagaluarpungami. (Lúkarse 23:43; sarĸúmersitat 20:12, 13) Meerarli taanna inunngunngisaannarpoq anersaartulinngisaannarlunilu. Uumassusilik taanna toquppara uummaqqinnissamillu periarfissarisinnaasai tamaasa aserorlugit. Pereersut allanngortinneqarsinnaanngillat.

Ukiulli ingerlatillugit tamanna isumakkut anniaatigikulajartuinnarpara. Ukiuni tamakkunani tamani eqqarsaatigiumasarsimanngilara. Eqqarsaatinni takkukkaangat puiorniarsarisarsimavara. Eqqarsaatikkut allamut sanguniarsaripallattarsimavunga. Maannali taamaaliorsinnaajunnaarpunga. Pisuusutut misigisimajuarneq uummatikkut annernaqaaq. Meeraq taanna asaneqarnissamik periarfissaqalinngisaannartussanngortinneqarpoq. Immaqa sumi arlaanni meeraqarpoq taamatut periarfissinneqarumaartumik.

Tamakkuninnga, ukiorpassuarni toqqorsimasimasannik, tamanik allaaserinninninnut tamanna pissutaavoq. Naartuersinnissaminik eqqarsaateqartup immaqa allakkat uku atuassagaluarunigit immaqa isummaminik allannguissutigissavai taamaalilluni naartunini ingerlatiinnassallugu. Meeraq naartorisat inuunissaanik asaneqalernissaanillu periarfissiguk. Tuusintilikkuutaanik inuppassuaqarpoq meerarsiartaarusoqisunik. Naartut inuutiinnarukku kingorna tarnivit nalunngeqatiginnissutaanik pillarneqarnavianngilatit, aammalu nammineq meeqqamik toqutsisimanermik misigisimalernissaraluit pinngitsuussavat. Immaqa aallaqqaammut imminut pisuutittutut misigisimassanngilatit, kisianni kingorna taama misigisimalissaqqaarputit. Imminullu pisuutittutut misigisimaneq qaangiutinngisaannarpoq. — Isaia 1:18; 55:6, 7. (gD 8/12 86)

Peqqissimingaarluni

Meeqqamut inunngorsimanngitsumut anaanaasoq