Pilliutigisat pilluaqquneqangaarnartut

’Asasannguara Lynette!

Allaffigilaalerpakkit qutsaviginiarlutit paniugavit pitsaasoq asannittorlu. Anaanaarukkuit ilinnut artornassaqaaq, ikinngutiga, kisianni allat ikiussavaatsit, ataatavillu paarilluassavaatit. Qatanngutitit nukarliit ikiorniarigit — nalunngilaralu ikiorumaaritit — taamaalillutillu annertoqqutigiartuinnassavaatsit. Asasannguara, uannut iliuuserisimasatit tamaasa pillugit aammalu niviarsiaraagavit pitsaasoq naalattorlu, uannut isumakulutsitsisimanngisaannartoq, qutsaviginiarpakkit. Jehova qinnuigaara eqqaamajumaaraanga aammalu silarsuarmi nutaassami takoqqikkumaartugut.

Asanningaartumik inuulluarit, anaanat.’

JANUARIMI 1963-imi anaanaga kræftimik toqummat uanga 13-iinnarnik ukioqarpunga. Toqunissi qaammatinik pingasunik sioqqullugu qatanngutikkalu nukarliit oqaluttuuppaatigut qanoq pisoqarneranik. Qanoq napparsimatiginini isertuunniarsimanngimmagu qujamasuutigaara, inussiarnersumik tamatuminnga nassuiaassimammatigut aammalu sapinngisani tamaat pissutsit atukkatta allanngornissaannut piareersaassimammatigut.

Naak siniffimmi innangagaluarluni anaanama nerisassiornermik ilinniartissimavaanga, tamatigullu taassuminnga siulersorneqarlunga nerisassiortarpunga. Aammattaaq ilitsersuuppaanga qanoq maskiinamik mersortassasunga, qanoq ilaquttama nujaannik killuisassasunga, qanoq nerisassamaasiortassasunga, allarpassuarnillu. Nassuiaappaanga nammineq peerukkuni qatanngutima mikinerit ikiorniarneranni arlaannik pilliuteqartariaqartassasunga.

Eqqaamavara tupigusuutigalugu qanoq anaanaga eqqissisimallunilu paasinnippasitsigisoq. Maanna paasisimavara tamanna pissuteqartoq makititaanissamik neriorsuummik upperinnilluinnarneranik. Toquneranit ullualunnguit qaangiuttut anaanama toqutinnani allagarisimasaanik uagut niviarsiaqqat tamatta immikkut ataatama tunivaatigut. Uannut allagarisimasaata ilaa qulaani issuarneqarpoq. Takorloorsinnaagunarparsi allakkat atuarakkit qiasunga, kisianni naak taama ukiukitsigigaluarlunga allagai anersaakkut nakussatsissutigaakka. Tamatuma kingorna qaammatialunnguit qaangiutiinnartut Jehovamut tunniulluinnarpunga, 1963-imilu augustimi kuisillunga.

Uppissuseqalerpunga

Angajoqqaakka 1956-imi, nunaannarmi naasorissaasup illuanit illoqarfimmut Sydneymut nuunnitta aappaaguani, Jehovap Nalunaajaasunngorsimapput. Kisianni sapaatikkut atuarfimmi Bibelimi oqaluttuanik oqaluttuariaaseq pissutigalugu ajoraluartumik uanga nalornisumik guutiitsorpaluttumillu isumaqalerpunga. Eqqarsaatinni Bibeli oqaluttualiaannarnut ilumuunngitsunut naligitilerpara. Allaat Guuti eqqarsaatersuutaannartut isigilerpara. Kisianni Jehovap Nalunaajaasuisa peqqusersuinnerat malugiartuaalerpara, eqqarsaatigilerparalu taakkua aammalu anaanama Bibeli upperippassuk taava asuliinnaasimanavianngitsoq.

Aqqanilinnik ukioqartunga ilagiit atuagaq „Ske din vilje på jorden“, (’Peqqusat nunami pili’) Bibelimi Dânialip agdlagai-nik versikkaarlugit samminnittoq, atuaqqissaaqatigiissutigisalerpaat. Siulittuutit tamakkualu annikitsualuttaannut allaat eqquussimaneri tupigusuutigalugit maluginiartorujussuuakka. Ilagiit ataatsimiinnerisa ilaanni ersersinneqarpoq Bibeli ilisimatuussutsikkut paasisanut ilumoortunut naapertuuttuusoq. Nalorninera qaangeriartulerpara, Guutimillu upperinnikkiartuaalerpunga.

Pilliutit allat

Maanna ilaqutariit iluanni isumagisassaqarnerulerama aammalu qatanngutikka mikinerit ikiortariaqalerakkit anaanama oqarsimaneratut uannut oqitsuinnaanngilaq. Inuusuttuunerma ilarujussua asuliinnarpoq. Kisianni tamatumunnga taartaavoq uagut niviarsiaqqat pingasut immitsinnut qanittuararsuanngornerput, aammalu ataatama uannik nipaatsumik tatiginninnera. Kisianni kingorna allatut ittumik pilliuteqartariaqarsimavunga.

Atuartuunerma nalaani nipilersorneq isiginnaartitsinerlu nuannarisorujussuanngorpakka. Ilaquttakka nipilersornermik nuannarisaqartuupput, uagullu meeqqat noqartilimmik pattallutalu, erinarsorlutalu, qitillutalu tusarnaartitsisuusaartarpugut qasulluinnarnissarput tikillugu. Arfineq- marlunnik ukioqarlungali atuarfimmi isiginnaartitsinermi pingaarnertut inuttaasalerpunga. Ilinniartitsisut kajumissaarpaannga isiginnaartitsisartunngorniat atuarfiannut qinnuteqaqqullunga. Uangali erinarsuutitta ilaata oqaasertaa niaqqunniitippara: „Piginnaanivut [Jehovamut] atorsinnaavavut.“ Taamaattumik tamatumunnga naaggaarpunga, naak tamanna oqitsuinnaanngikkaluartoq.

Aammattaaq atuarneq nuannareqaara, taamaattumik karakterigissaaqaanga. Ilinniarnertuutut ilinniagaqarnissara pinnagu piffissara tamaat oqaluussinermut atorniarlugu aalajangerama atuarfiup siunnersuisartuanukaqquneqarpunga. „Ajoraluaqaaq taama annertutigisoq asuliinnassammat,“ nakorsanngorniaqqoreeraluarlungalu taama oqarpoq. Kisianni aalajangernera tamanna peqqissimissutiginngisaannarsimavara.

Atuarfimmi atuartuujunnaareernerma kingorna ukioq ataaseq affarlu pisortat allaffeqarfiata qarasaasiaqarfittaani sulivunga. Soraarniuteqarama neqeroorfigineqaraluarpunga akissarsiama marloriaataanik akissarsiaqalernissannik aammalu suliffigisanni qullersatut sulilernissannik. Neqeroorut ussernartorsiornaraluaqaaq, ingammik niviarsiamut 17-inik ukiulimmut! Kisianni aalajangernera aalajangiusimajuaannarpara 1966-imilu junip aallaqqaataani allamik atorfeqarnanga piffissaq tamaat oqaluussisartutut aallartillunga.

Suliassat nutaat

Aappaaguani specialpioneritut (pioneritut atorfinitsitatut) toqqarneqarpunga, pilluaatigeqisannillu Sydneymi ilagiinni attavigisanni oqaluussiffigisassannik tunineqarlunga. Tamatuma periarfissippaanga suli sivisunerusumik qatanngutima najornissaannut. Tamanna qujamasuutigaara, neriuutigigakkumi qatanngutima arnat katinnissaasa tungaannut ilaquttama najornissaat imaluunniit eqqaanni najugaqarnissara.

1969-imi Peakhurstimi ungasinngitsumiittumi ilagiinni Enid Bennett, ukiuni arfineq- marlunni tulliuttuni specialpionerioqatigisara, ilagalugu oqaluussiffigisassannik tunineqarpunga. Ukiut marluk qaangiummata ataataga pisariaqartitsiffiunerusumi utoqqaanertatut sulissalluni illoqarfimmut alianaatsumut, Sydneyp kujata- kitaaniittumut, Tumutimut nuuppoq. Peqatigiiffik inussiarneqaluni aammattaaq uanga Enidilu taavani oqaluussiffigisassatsinnik tunivaatigut. Tamatuma nalaani nukara nukarleq, Beverley, pionerinngorpoq, suleqatigilerlutalu.

Aliatsangaarneq

Tamatuma nalaani inuuninni alianarnerpaaq pivoq. Qatanngutiga Margaret uissianilu ilagiinnit kristumiunit anisitaapput. Tamanna artornaqaaq, tassami anaanama toqunerata kingornali Margaretilu attaveqatigiillualersimanerput maanna kipineqarpoq. Nalunngilara Jehovap eqqaamasaani anaanaga toqqissisimasumik qularnaatsumillu inissisimaffeqartoq, qatanngutimali Jehovamit iluarisaanini annaagallarpaa. Jehova ilungersortumik qinnuigisariaqarsimavara nalornisoornera anigorsinnaaqqullugu taamaalillungalu nuannaarlunga kiffartuunniassagakku, qinnutikkalu akivai.

Margaretimut attaveqarnivut tamaasa kipisariaqarsimavavut, tamannalu Jehovap aaqqissuussineranut ilumoornitta misilinneqaatigaa. Tamatuma ilaqutariit tamatta periarfissippaatigut Jehovap ajunnginnerpaamik ilisimanninneranik ilumut upperinninnitsinnik takutitsinissatsinnut. Nuannaarutigeqisatsinnik ukiut marlungajaat qaangiuttullu Margaret uinilu ilagiinnut ilanngutiteqqinneqarput. Taakkununnga attaveqarnitsinnik kipisilluinnarsimanerput qanoq pingaaruteqartigisimanersoq ilisimasimanngilarput, kingornali Margaretip ima oqaluttuuppaanga:

„Anisitaagatta illit, ataatap Beverleyllu uagutsinnut attaveqarnersi kipitilluinnarsimanngikkaluarussiuk, qularutiginngilara taama sukkatigisumik ilagiinnut ilannguteqqinniarsimanavianngikkaluarlunga. Ilaquttannut ilagiinnullu attaveerulluinnarnerma peqqissiminissannik sakkortuumik kissaateqalersippaanga. Kisimiilerama paasilerpara iliuuserisimasakka qanoq kukkulluinnartigisimasut aammalu Jehovamik tunussinera qanoq ilungersunartigisoq.“

Misigeqqipparput qanoq pilluaqqussut angitigisartoq ilaqutariit tamarmik ataatsimut Jehova kiffartuukkaangassuk. Bibelip najoqqutassiaanik ilumoorluta maleruaasimanitsigut nuannaarneq pilluarnerlu pisimasarput qujamasuutigeqaarput!

Aappariinneq angalallunilu kiffartorneq

Kingorna Alan, pioneriullunilu ilagiinni utoqqaanertatut kiffartortoq, naapippara. Novemberimi 1975-imi katippugut, qatanngutima Beverleyp katinneranit ukiup affaa qaangiuttoq. Ukiut marluk pionerioreerluta januarimi 1978-imi angalalluta kiffartornissamut kajumissaarneqarpugut, tamatumalu nassatarisussaavaa sapaatit- akunneri tamaasa ilagiinnut nutaanut ilaasortaasut anersaakkut nukittorsarniarlugit pulaartarnissaat. Queenslandip illoqarfiini Australiap timerpasinnerusortaaniittuni illoqarfiit susoqarfiorpianngitsut aammalu Melbournemi Sydneymilu pisut illoqarfimmiorpalunnerusut ilageeqatigiinni kiffartornitsinni misigisarsimavavut.

Kuffertiliinnarluni sapaatillu akunneri tamaasa inunni allani najugaqartarluni inuuneq uannut imaannaanngitsukasiusimavoq. Kisianni ima eqqarsarpunga: ’Qujamasuutigiinnartariaqarpara kufferteqaratta imalinnik. Inuppassuaqarpoq tamakkuninngaluunniit peqanngitsunik.’ Aammattaaq uannut oqitsuinnaasimanngilaq uiga unnuit tamangajaasa ilagiit iluanni suliassaminik sulissalluni peqarneq ajormat. Imminut tuppallersarpunga eqqarsarlunga aammattaaq arnarpassuaqartoq uiminnit najorneqanngikkallartariaqartartunik, amerlanertigulli tamatumunnga pissutaasoq unaanani uiisa Guutimut kiffartornerat.

Kisianni ajornartorsiut annerpaaq anigorniagarisimasara tassaavoq peqqiilliornera. Mikisunnguutillungali toqqusaakka annerisarsimavakka, nukinni naggussannilu anniarisaqartarlunga, puannut aqqutikka ajornartorsiutigisarsimallugit aammalu peqqiilliortuaannartuullunga. Tamatumunnga pissutaasoq nakorsanit nakorsanillu naasunik nakorsaasiortartunit paasineqarsinnaasimanngilaq.

Ukiut ingerlatillugit anniaatikka ajorsiartorput, aammattaarlu qitinni pukusunnilu anniarisaqartuaannalerpunga, qiiasarlunga qasoqqasaqalungalu, anillanneqartarlunga, qinersikka pullattarlutik, piffissaasukkut piffissaanngitsukkullu merianngusarlunga, aammalu nakasuloqattaartarlunga. Isumaqariartuinnarpungali tamakku inuunermi ilassaannaasut aammalu naammagalugit atortariaqarikka; taamaattumik maalaarutigineq ajorpakka.

Ilageeqatigiinnut kiffartornissatsinni oqaluussiffigisassatsinnik tunineqarnitta kinguninngua suli ajornerulerpunga. Nalunaaquttap akunnera ataaseq sinnerlugu angalareernerit tamaasa aanaartalerpunga, inginnissamalu tungaanut taamaattarlunga. Ullaa- tungai tamaasa nalunaaquttap akunnerini pingasuni illumiit- illumut angalaartarnissara pilersaarutigisimavarput, taamaattumillu eqqarsaatigisorujussuuara qanoq ilillunga tamanna naammassisinnaanerlugu. Ajornartorsiut tamanna Jehovamut qinuninni saqqummiuppara. Tamanna qanoq kinguneqarpa?

Qaammatini pingasuni ullaa-tungaani illumiit-illumut angalaarnerit tamaaviisa iseqquneqartarpunga ingeqquneqartarlungalu! Anniaatikka unimmata aammattaaq iseqquneqartarnikka unipput. Qularutiginngilluinnarpara tamanna nalaatsornerinnakkut pinngitsoq, tassami Australiamiut inuit ilisarisimanngisatik iseqquneq ajormatigik.

Peqqiilliornerulerpunga

30-it qaangerlugit ukioqarlunga ukiualunnilu ilageeqatigiinnut kiffartoreersimallunga, suli peqqiilliornerulerpunga. Ullualunni ataatsimeersuarnermi tusarnaarluaqqissaarniarsimanera sapaatit- akunnerini marlunni ilungersuutigaara. Unnummi ataatsimi pigaalaarsimaguma sapaatit- akunnerpassuini malugisimasarpara. Ullaa- tungaani oqaluussiartornissara merserisartorujussuanngorpara. Ullut tamarluinnaasa qulinnguinnartoq qasusorujussuanngoreertarpunga. Nalunaaqutaq aqqaninngoraangat ilukkut sajulersarpunga isigisaralu iserissertarluni. Ullup- qeqqalernerani alla eqqarsaatigineq ajorpara qasuersaarnissara. Taavalu ualimut pisassakka tullinnguuttaraat! Inuit allat pisassatik oqigerpaseqalugit allaallu sinnilimmik nukissaqarpasillutik suliarisarpaat. Soorli uanga taama pisinnaanngilanga?

Sanigortorujussuuvunga 42 kilonik oqimaassuseqalernissara tikillugu, nuallullungalu siniffimmi innanganngikkaangama misigisimasarpunga sukkulluunniit napparsimaleriaannaallunga. Unnuaq ingerlatiinnarlugu sinissinnaanngilanga — minnerpaamik 20-riarlunga itertarpunga nakasulunnera pissutigalugu. Kissaatiginerpaasarpara sinilernissara iteqqinngisaannarlungalu! Arlaleriarujussuarlunga Jehova ima qinnuigisarpara: „Åh, Jehova, nalunngilara qinngaqqunnarlunga, kisianni kissaatigisatuara tassaavoq peqqissinissara kiffartuunniassagakkit. Suna ajoqutiginerlugu paasiniaaninni ikiorsinnaavinga? Tamannalu ajornarpat, taava qinnuigaakkit akiuunnissannut ikioqqullunga.“

Aalajangiulluinnarsimavara piffissara tamaat oqaluussisartuunera akiuuterujussuanngikkuma taamaatinniarnagu. Taamaattumik Jehova pissutsinut maannakkut atukkannut naleqquttumik qinnuigivara. Siullermik qinnuigivara campingvognimik (illuaraasaq biilinit kalinneqartartoq) pisaarnissatsinnik, tassami misigilluinnarama kisimiilluta ineqartariaqalerluta. Qinnutiga Alanimut oqaatiginngilluinnarpara, kisianni tullianik ataatsimiigiaratta qatanngutip angutip orneriikatappaatigut campingvogniminillu neqeroorfigaluta. Taava tulliani Jehova qinnuigaara nillataarnerusumut nuutseqqulluta, aammattaaq qinnutiga tamanna kinguninnguagut akineqarpoq Sydneymi oqaluussiffissatsinnik tunineqaratta.

Uppernanngikkaluarporluunniit, kisianni Sydneymut nuunnitsinnit qaammatit marluk qaangiutinngitsulluunniit atuakkamik tunineqarpunga anniarisartakkannik nassuiaasumik! Tupaallannarporlu atuagaq taanna nakorsamit, nunap immikkoortortaani ilageeqatigiinnik kiffartuussiffigisatsinni, sulisumit allanneqarsimammat. Arlaleriaqalunga misissortereerlungalu paasivara aaga sukkukippallaartoq, aammalu arlalinnik sapigaqarlunga, ilaatigut oquk, qapuk, tipigissaatit ilaat, qitsuit, qimmit nerisassallu ilarpassui.

Qaammatini arfineq- pingasuni qasunaqisuni nerisassat sapikkama paasinissaasa aammalu ippigisaarunnissama tungaanut nakorsamit taassumannga misissugarineqarpunga. Timinni peqqissutsinnut aammalu inuuninnik isiginninninnut tamatuma qanoq sunniuteqartigissusia oqaluttuarissallugu uannut ajornakusoorpoq. Oqaluussisarnera ataatsimiittarnivullu nuannaarutigeqqilerpakka. Allatut oqaatigalugu soorluli tassa toqusunit makitinneqartunga! Erniinnaq puallariartulerpunga, sivisungaatsiartumillu uannik takunnissimanngitsut tupaallattarput takullunga qanoq allanngorsimatigisunga.

Pilluaqqussuterpassuit

Maanna anaanama toquneranit ukiut 24-t qaangiussimalerput, tupinnaannartumillu piffissaq sukkasuumik ingerlasimavoq. Qujamasuutigaara ukiuni taakkunani ukiut 21-t allamik atorfeqarnanga oqaluussisartutut atorsimagakkit! Ajornartorsiutinik sorsugassaqartarsimavunga, kisianni suna tamarmi oqitsuinnarmik ingerlasimagaluarpat immaqa taama atsigisumik Jehovap asanninneranik pingaartitsilersimanavianngikkaluarpunga.

Kingumut qiviaraangama isumaqartarpunga pilliutigisarsimasakka pilluaqqussutinut maanna pereersimasannut sanilliullugit suunnginneerarsuusut. Pilluaqqussutit ilaat tassaavoq ikinnguterpassuannut asannittunut, ingammillu ilaquttannut, attaveqarnerit erlinnangaartut. Angalalluta kiffartornerput aallartissimatsiaannaripput qatanngutinnit Margaretimit ilaatigut ima allagarsivunga:

„Qutsaviginiarpakkit allanngorneq ajoravit. Siornatigut taama oqarfigisimannginnguatsiarpakkit, ajuusaarpungalu taama oqarfigisimanngikkukkit, kisianni qutsavigaakkit sapinngisat tamaat Beverley uangalu perorsarsimagatsigut, aammalu anaanap inissisimaffigisimasaa tigusimagakku. Ullumikkut takusinnaalerpara asanninneq qanoq atsigisoq, nukiit qanoq amerlatigisut aammalu imminut tunniunneq qanoq atsigisoq pilliutigisimagitit. Ukiut tamakku eqqarsaatigisarpakka qinnutigisarlugulu pilluaqqusaanissat. Nalunngilaralu pilluaqqusaasimasutit.“

Kisianni pilluaqqussutissat suli annerusut siunissami takkuttussaapput — pingaartumik asasatta toqusimasut makititaanissaannik neriuut nuanningaartoq. Anaanap toqunissi sioqqullugu allagai atuaraangakkit suli qullilisarpunga. Taassumatullu qinusarpunga ’Jehovap eqqaamajumaaraa aammalu silarsuarmi nutaassami takoqqikkumaartugut’. — Oqaluttuarineqarpoq Lynette Siggimit. (gD 22/8 87)

[Qupp. 29-mi issuagaq]

„Nalunngilara Jehovap eqqaamasaani anaanaga toqqissisimasumik qularnaatsumillu inissisimaffeqartoq“

[Qupp. 28-mi assiliartaq]

Saamiup-tungaanit: Lynette, Margaret aamma Beverley anaanamik toqunera ukiunik pingasunik sioqqullugu

[Qupp. 31-mi assiliartaq]

Lynette uialu, Alan, Australiami kiffartortut