’Nipaat nunarsuarmut tamarmut tutsiupput’
TUSSIAAT 19 Davidip aallarnerpaa allaaseralugu qanoq ililluni pinngortitarsuaq kusanangaartoq Guutimut unnersiutissaasoq, kingornagullu ersersippaa Jehovap inatsisaanut, oqaaqqissaarutaanut, aalajangersagaanut eqqartuussutaanullu pingaartitsilluinnarnini. Aammattaaq apustili Paulusip tamakkuninnga tamanik pingaartitsinini ersersippaa. Tussiaammik taassuminnga issuaajutigaluni eqqarsaat tassaniittoq suliamut pingaaruteqartumut kristumiut ilumoortut suliarisaannut atassuserpaa. Taakku pillugit Paulus ima allappoq: ’Nipaat nunarsuarmut tamarmut oqaasiilu inuit najugaata isuinut tutsiupput.’ — Rûmamiut 10:18.
’Oqaasii’ tamakku ullumikkut inunnut tamanut pingaaruteqartorujussuupput inuunermik naleqaramik, tassami maani nunami aaqqissuussaanermut matumunnga ajortumut Jehovap eqqartuussutaa qanittukkut naammassineqartussaammat. (Sivfânia 2:2, 3; 3:8) Kikkut tamarmik Jehovap naalagaaffia pillugu tusagassamik nuannersumik ilinniarnissartik pisariaqartippaat. Ullumikkut sumulluunniit qiviaraanni isumaqatigiinnginneq, inatsisaatsuliorneq, pinerlunniarneq, kanngunartuliorneq aammalu ilaqutariit avissaartitersimasut takuneqarsinnaapput. Eqqissinissaq oqaloqatigiissutigineqartaraluarpoq, pissaanilissuilli sakkussiarsuarnik atortorissaaqisunik sanaartortuarsinnarput. Aammalu inuiaat amerliartuinnartut ’atomimik sakkussamaatileqatigiit’-nut ilaasortanngorarput. Nunarsuarmi pissutsit tamakku Paulusip Timoteusimut allakkami aappaanni kapitali 3 versit 1-imiit 5 ilanngullugu ’ullussat kingulliit’ pillugit eqqartugaanut naapertuulluinnarput.
Guuti akuleruppat kikkut annaanneqassappat, qanorlu ilillutik? Jûîtdle 2:23 issuaaffigiitigalugu Paulus toqqaannartumik ima akivoq: „Kinaluunniimmi Jehovap aqqanik torlorfiginnittoq annakkumaarpoq.“ (Rûmamiut 10:13, NV) Kisiannimi qanoq ilillutik inuit nunarsuaq tamakkerlugu ’Jehovap aqqa torlorfigisinnaavaat’ amerlanerit Guuti Jehovamik ateqartoq tusarsimanngippassulluunniit? Inuit Guutip aqqanik tusarsimanngitsut qanoq ililluni ikiorneqarsinnaappat? Paulusip oqarneratut oqaluussisussanik orninneqartariaqarput. — Rûmamiut 10:14-16.
Uagut nuannaarutigisinnaavarput Jehovap nalunaajaasuni aallartissimammagit inuit ilisimatinniarlugit Guutip naalagaaffiata qanillineranik aammalu Guutimik erneranillu, Jesus Kristusimik, ilisarinnikkunik annaanneqarsinnaasut naassaanngitsumillu inuulerlutik. (Isaia 43:10, 12; Lúkarse 21:25, 26, 31; Juánase 17:3) Tusagassaq nuannersoq tamanna maanna nunarsuaq tamakkerlugu oqaluussissutigineqarpoq.
Inuit millionilikkuutaat tusarliussaq tamanna qisuariarfigereersimavaat, tamannalu erserpoq inuit 9.201.071-it 1. aprili 1988-imi Jesusip toquanik eqqaaniaalluni nalliuttorsiorneq silarsuarmi tamarmi najuuffigisimammassuk. Ukiumi oqaluussiffiusumi qaangiuttumi inuit 3.592.654-it silarsuaq tamakkerlugu Naalagaaffimmik oqaluussissutiginninnermut peqataasimapput, Jehovamullu kiffat nutaat 239.268-it kuisissimapput — ukiumit siulianit 3,6 procentimik amerlanerullutik. Amerliartornermut tamatumunnga ajoqersuiartortitat aalajaatsut annertuumik tunngaviliisimapput. Ukiunili kingullerni oqaluussisartut najukkaminniittut pioneritut anersaaqarnertik allisarsimavaat aammalu ulluinnarni ’nalunaarummik ajunngitsumik oqaluutiginninnermikkut’ ’tusakkaminnik upperinninnertik’ takutissimallugu. Ukiup ingerlanerani oqaluussisartut agguaqatigiissillugu 455.561-it pioneritut sulisimapput, 4,4 procentimik amerleriarsimallutik. Tamatuma kinguneranik nalunaaquttap akunneri 785.521.697-it oqaluussinermut atorneqarsimapput, ukiut arfinillit matuma siornatigornit marloriaammik amerlanerullutik. (wD 1/1 89)