Atuartartut apeqqutaat

◼ Jesusip apustili Peter ima aperigamiuk: „Taakkunannga annermik asavinga?“, suna pivaa oqarami „taakkunannga“?

Makinnermi kingorna Jesus Galilæap Tasersuata eqqaaniippoq. Ima atuarpugut: „Taava nerereeramik Jesusip Simon Peter aperaa: ’Simon, Johannesip ernera, taakkunannga annermik asavinga?’ Akivaalu: ’Aap, Naalagaq, nalunngilat asagikkit.’ Oqarfigaa: ’Savaaraatikka nerlersukkit.’“ — Johannes 21:15, NV.

Grækerisuumi oqaluutip ilisarnaataata suna pineqarnersoq paasinarsisittaraluarpaa, qasseersiulli touʹtōn („taakku“) tamanut atorneqarsinnaavoq, tassa inunnut pinullu. Suna pineqarnersoq oqaaseqatigiit paasinarsisinngimmassuk Bibelimik paasiniaasartut Jesusip apeqqutaanut tamatumunnga tunngasumik ima isumaliutersuuteqarput:

1. Ajoqersukkanik ukuninnga allanik illit asanninninnit annermik uanga asavinga?

2. Ajoqersukkat ukua uannik asanninnerannit illit annermik asavinga?

3. Taakkunannga, soorlu aalisakkanit, uanga annermik asavinga?

Periarfissaasinnaasut taakku pingasut atagu sammeriartigik paasiniarlugu taakkua arlaat sorleq ilimanaateqarnerpaanersoq.

1. Soorunami kristumiut Kristus allanit tamanit annermik asasussaavaat, taamaattumillu ilimananngilaq Kristusip ima aperinissaa: ’Ajoqersukkanik illit asanninninnit uanga annermik asavinga?’ Ingammik Peterimut taama apeqquteqarnissaa ilimanaateqanngilaq, tamatuma siunitsiannguagut Peter ajoqersukkat allat arfinillit ilagalugit aalisartilluni Jesus sissamiittoq takuleramiuk tatsimut aqqarasuarsimammat nalullunilu ornillugu. Kristusillu apustilit aperimmagit imminik mamiatsaatiginnittut ilagalugit qimassaneraanni Peterip tunniusimanini ersersippaa oqarlunilu Jesusip najuinnarnissaa aalajangiusimallugu. — Juánase 6:66-69; 21:7, 8.

2. Jesusip ima aperisimanissaa ilimanarpa: ’Peter, ajoqersukkat allat uannik asanninnerannit illit annermik asavinga?’ Nassuiaasartorpassuit taama isumaqarput, tassami siusinnerusukkut Peter oqarsimavoq ajoqersukkanit allanit annermik Jesusimut ilumoorfiginnittuulluni. (Matîuse 26:33-35) Oqaatsit Johannes 21:15-imiittut taama paasisariaqassappata pisariaqassagaluarpoq Bibelimi kalaallisuunngortitami allassimasutut grækerisuuani oqaluutip ilanngunneqarsimanissaa: ’Ukua asammannga illit annermik asavinga?’ Jesusilli oqaluut taama ittoq tassani atunngilaa, oqaluutillu taama ittup atorneqartussaanera oqaaseqatigiit inissitsitersimanerisa ersersinngilaat. Aammattaaq ilimanaateqanngilaq Peterip asanninnerminik allat asanninnerannut naleqqiussinissaanik Jesusip qinnuteqarsimanissaa, tassami kia arlamik annerunera imaluunniit pingaarnerunera pillugu apustilit assortuutileraangata naveertarpai. — Mákorse 9:33-37; 10:35-44; Lúkarse 22:24-27.

3. Periarfissat pingajuat apeqqutip grækerisut oqaatigineqarneranut naapertuuppoq, tassami Peter marluk arlaannik toqqaanissaminut qinnuigineqarmat (Jesus imaluunniit „taakku“). Peterip ajoqersuganngunngikkallarami suliaa eqqarsaatigigaanni apeqqut tamanna naleqquppoq. Taanna ajoqersukkanut Jesusimik malinnilersunut siullernut ilaavoq. (Juánase 1:35-43) Jesusimulli malinninnermut piffissami tamaat atornissaanut taarsiullugu aalisartutut sulileqqissimannguatsiarpoq. Taamaattumik qaammatit arlallit tamatuma kingorna Jesusip Peter kajumissaarpaa aalisartuunini aningaasarsiorfiulluarnartoq taamaateqqullugu taarsiullugulu ’inunnik aalisartunngoqqullugu’. (Matîuse 4:18-20; Lúkarse 5:1-11) Taamaakkaluartoq Jesusip toqunerata kingorna Peterip aalisartutut sulileqqinnissani kissaatigisimavaa. Ajoqersukkat ilaannut ima oqarpoq: „Aalisarialerpunga.“ — Johannes 21:2, 3, NV.

Taamaattumik ilimanarpoq Peter aalajangivittariaqarneranik Jesusip erseqqissaavigerusussimagaa. Inuunermini suna salliutikkusuppaa — Jesusimik malinnittuuneq, imaluunniit aalisartuuneq, soorlu apeqqummi aalisakkat saavanniittut pineqartut? Aalisakkat, qassutit, umiatsiaat aalisartunillu allanik ilaqartarnini Peterip qanoq pingaartitsigai? Taakku nuannarisani tamaasa Peterip tunukkumanerpai Kristusimullu asanninnini tamatumalu nassatarisaanik Jesusip ’savaataanik’ nerlersuinissani inuunermini salliutilerlugit? — Juánase 21:17.

Kajungerisinnaasavut, soorlu suliavut soqutiginartut, silarsuarmi ilinniakkat aallartitavut, angerlarsimaffivut imaluunniit sukisaarsaatigiumanerusavut eqqarsaatigalugit tamatumunnga assingusumik immitsinnut aperisinnaavugut. Ilumoorluta imminut ima aperisariaqarpugut: ’Taakkuninnga tamanik asanninninnit annermik Jesus asavara?’ Jesusip ersersippaa apeqqummut tamatumunnga angerutta ’savaataanik’ nerlersuinitsigut tamanna takutissagipput. (wD 1/11 88)

[Qupp. 31-mi suminngaanneernera]

Pictorial Archive (Near Eastern History) Est.