JW спутник арнасы интернет жоқ жерлерге жетіп жатыр

Бәріміз де JW Broadcasting®-ке шығатын ай сайынғы бағдарлама мен видеоларды асыға күтеміз. Алайда Африкадағы көптеген бауырластарымыз бұл видеоларды интернет арқылы көре алмайды. Бұған не себеп?

Африканың көп жерінде интернет жоқ. Болған күннің өзінде, оның жылдамдығы өте баяу не өте қымбат тұрады. Мысалы, Мадагаскардағы бір аудандық бақылаушы JW Broadcasting бағдарламасын жүктеп алу үшін интернет-кафеге барады. Интернет үшін ол 16 АҚШ долларын төлейді. Ал бұл кейбіреулердің бір апталық еңбекақысынан да көп!

Осындай қиындықтарға қарамастан, қазір Африкадағы миллиондаған бауырластарымыз JW Broadcasting-тегі видеоларды интернетсіз-ақ көре алады. Қалайша?

2017 жылдан бері Сахараның оңтүстігіндегі Африка елдерінің тұрғындары JW Broadcasting-ті спутник арнасы арқылы тамашалай алады. Бұл арна аптасына 7 күн, 24 сағат бойы ондағы видеоларды 16 тілде тегін көрсетеді.

JW Broadcasting-ті осылай спутник арнасы арқылы тарату үшін бауырластар бір телеарнамен келісімшартқа отырды. Бұл спутник арнасын Сахараның оңтүстігіндегі 35 Африка елдері көреді. Бұл арнаны жалға алу үшін бауырластар айына шамамен 12 000 АҚШ долларын төлейді. Ал кейде, конгресс кезінде немесе филиалға өкіл келгенде, тікелей трансляция жасау үшін бауырластар тағы бір спутник арнаны жалға алады. Көптеген адамдар, оның ішінде Куәгер емес адамдар да, JW спутник арнасын теледидар арқылы көре алады.

Бірақ бауырластардың бәрінде бірдей спутник арнасына қосылатын арнайы құрылғылар жоқ. Сондықтан бауырластар JW Broadcasting-ті спутник арнасынан көре алу үшін, 3 670-тен аса Патшалық сарайы қажетті құрылғылармен жабдықталды. Егер Патшалық сарайында теледидар не проектор болса, жөнелтумен қоса есептегенде спутникке қосылатын құрылғылардың бір жинағы 70 АҚШ доллары болады. Ал егер теледидар не проектор болмаса, барлық құрылғылардың бағасы шамамен 530 АҚШ долларын құрайды.

Бауырластар осындай арнаның болғанына өте риза. Мысалы, Камерундағы бір ақсақал былай дейді: “Бұл біздің отбасымыз үшін шөл даладағы манна сияқты”. Ал Нигерияда тұратын Одебоде деген бауырлас былай дейді: “Біз балаларымызбен аптасына үш рет спутник арнаны көреміз. Балаларым сол күндерді тағатсыздана күтіп жүреді. Тіпті басқа күндері басқа арнаны көріп отырғанда, JW арнасын қосып беруімді сұрайды”. Нигериялық Роуз деген тағы бір бауырлас былай деді: “Бұрын мен жаңалықтарды көп көруші едім. Бірақ бұл әдетімнен арылдым, өйткені қазір жаңалықтардың орнына JW спутник арнасын қараймын. Жаңалықтар көргенде мен қатты уайымдап, қан қысымым көтеріліп кететін. Ал JW арнасын көргенде, көңілім орнығып, жігерленіп қаламын! Бұл — менің сүйікті арнам, Ехобаның берген үлкен батасы”.

Мозамбиктегі бір аудандық бақылаушы ауданындағы барлық Патшалық сарайлары қажетті құрылғыларымен жабдықталғанын айтты. Ол жақтағы бауырластар Патшалық сарайына кездесуге дейін бір-екі сағат бұрын келіп, JW Broadcasting бағдарламасын көреді екен.

2019 жылы Йоханнесбургте (Оңтүстік Африка) өткен халықаралық конгресте кейбір баяндамалар, оның ішінде Басқарушы кеңестің мүшесі айтқан баяндамалар да, басқа тоғыз жерге трансляцияланды. Жергілікті бродкастинг бөлімінде қызмет ететін Спумелеле деген бауырлас былай дейді: “Бұрын осындай баяндамаларды трансляциялау үшін біз интернетті пайдаланатынбыз. Бірақ ол үшін интернет байланысы жақсы болуы керек еді және оған көп ақша төлейтінбіз. Ал JW спутник арнасы әлдеқайда тиімді әрі арзанырақ”.

Сіздердің дүниежүзілік іске дарқан көңілмен беріп жатқан садақаларыңыздың арқасында Африкадағы көптеген бауырластарымыз JW Broadcasting-ті спутник арнасы арқылы көре алады. donate.jw.org сайтындағы түрлі жолдарды пайдаланып, беріп жатқан садақаларыңызды жоғары бағалаймыз.