Шайтан Ібіліс шынымен бар ма?

Киелі кітаптың жауабы

Иә, Шайтан Ібіліс шынымен бар. Ол — зұлым болып, Құдайға қарсы шыққан періште және “осы дүниенің билеушісі” (Жохан 14:30; Ефестіктерге 6:11, 12). Киелі кітап оның қандай екенін мына атау-сипаттармен көрсетеді:

• Шайтан. Бұл “қарсылас” дегенді білдіреді (Әйүп 1:6).

• Ібіліс. Бұл “жалақор” дегенді білдіреді (Аян 12:9).

• Жылан. Киелі кітапта бұл сөз кейде “алдаушы” дегенді білдіреді (Қорынттықтарға 2-хат 11:3).

• Азғырушы, не Әзәзіл (Матай 4:3).

• Өтірікші (Жохан 8:44).

Шайтан жай ғана жамандық емес

Кейбіреулер Шайтан Ібілісті адамдардың бойындағы жамандық деп ойлайды. Бірақ Киелі кітаптан бұл олай емес екенін көреміз. Онда Құдайдың Шайтанмен сөйлескені жазылған. Құдай Тағала мінсіз әрі кемелді, сондықтан ол өз бойындағы жамандықпен сөйлесті деу ақылға қонымсыз (Мұсаның 5-жазбасы 32:4; Әйүп 2:1—6). Сонымен қатар Киелі кітапта Шайтанның күнәдан пәк таза болған Иса пайғамбарды азғырғаны жазылған (Матай 4:8—10; Жоханның 1-хаты 3:5). Демек, Шайтан шынымен бар, әрі ол — жай ғана жамандықтың бейнесі емес.

Көп адамдар Шайтан Ібілістің бар екеніне сенбей жатады. Бұған таңғалмау керек, себебі Киелі кітапта Шайтан өз мақсатына жету үшін алдамшылықты қолданатыны айтылған (Салоникалықтарға 2-хат 2:9, 10). Оның адамдарды адастыру үшін қолданатын ең күшті қулығының бірі — өзінің жоқ екеніне сендіру (Қорынттықтарға 2-хат 4:4).

Шайтан туралы тағы бір жаңсақ пікір

Жаңсақ пікір: Шайтан Құдайға қызмет қылады. Құдай оны адамдарды сынап, соттау үшін қолданады.

Шындық: Шайтан — Құдайдың қызметшісі емес, қайта, дұшпаны. Ол Құдайға қызмет ететін адамдарға қарсылық көрсетіп, жала жабады (Петірдің 1-хаты 5:8; Аян 12:10).