Сауалдар жәшігі

◼ Отбасылық зерттеуге жұмсалған уақытты ай сайынғы есепке ата-ананың екеуі де жаза ма?

Балаларға ‘ақылмен жөн сілтеп, Иемізбен жүргендерге лайықты тәрбиелеу’ ең алдымен, әкелердің міндеті болғанымен, бала тәрбиесіне ата-ананың екеуі де атсалысады (Ефес. 6:4 сілт.). Киелі кітапта балаларға арналған: “Балам әкеңнің тәрбиесін тыңда, шешең берген тәлімнен де бас тартпа!”— деген сөздер бар (Нақ. с. 1:8). Құдай Сөзін отбасы болып зерттеу ата-ана тәрбиесінің маңызды бір бөлігі болып табылады.

Бұрын шомылдыру рәсімінен өтпеген балаларымен бірге отбасылық зерттеуді өткізуге ата-ананың екеуі де қатысқанымен, оған жұмсалған уақытты сабақты жүргізген адам ғана жазатын. Алайда бұған қатысты өзгерту ендірілді. Егер отбасымен зерттеу кезінде балаларға тәлім беруге ата-ананың екеуі де атсалысатын болса, олардың екеуі де аптасына бір сағаттан жазып қоюына болады. Әрине, әдетте ата-аналар балаларына тәлім беруге бұдан да көп уақыт жұмсайды. Балаларын тәрбиелеу үшін ата-ананың екеуі де үнемі күш салып отырулары қажет (Заң. қ. 6:6—9). Бірақ ай сайынғы есепке, ең алдымен, танапта жасалған істер жазылуы керек. Сол себепті зерттеуге бір сағаттан көп уақыт жұмсалса да, әрі отбасылық зерттеу аптасына бірнеше мәрте және әр баламен жеке өткізілсе де, ата-аналар аптасына бір ғана сағаттан жазып отырулары керек. Мұндайда зерттеу сабағы туралы есепті оны жүргізген әке не шеше ғана тапсырады. Ол айына бір зерттеу сабағын, ал әр аптаға бір қайта баруды жазады.