Иса Мәсіх шын мәнінде кім?

ИСА МӘСІХТІҢa б. з. 33 жылының көктемінде Иерусалимге келгені неліктен халыққа мұншалықты әсер етті? Өйткені қала тұрғындарының көбісі Иса мен оның таңғажайып істері жайлы естіп, бір-біріне айтып жүрген болатын (Жохан 12:17—19). Алайда олар араларындағы бұл пайғамбардың бүкіл дүниеге, тіпті біздің күнімізге дейін ықпалы зор болатынын білмеген де еді!

Исаның адамзат тарихына тигізген әсерінің қаншалықты күшті болғанын көрсететін бірнеше мысал қарастырайық.

• Көп елде жыл санау Иса туылды деп есептелетін жылдан басталады.

• Дүниежүзінің үштен бір бөлігін құрайтын екі миллиардтай адам өздерін мәсіхшіміз деп атайды.

• Миллиардтан астам сенушісі бар ислам дінінде Исаны “Ыбырайымнан, Нұхтан және Мұсадан үлкен пайғамбар” деп үйретеді.

• Исаның айтқан дана сөздері, түрлі нұсқасымен болса да, көп халыққа танымал. Солардың бірнеше мысалын келтірейік:

  “Қайыр бергенде, оң қолыңның не істеп жатқанын сол қолың білмесін” (МАТАЙ 6:3);

  “Алғаннан гөрі берген бақытты” (ЕЛШІЛЕРДІҢ ІСТЕРІ 20:35);

  “Ешкім екі қожайынға бірдей құл бола алмайды” (МАТАЙ 6:24);

  “Інжу-маржандарыңды шошқалардың алдына лақтырмаңдар” (МАТАЙ 7:6);

  “Барлық істе басқалар өздеріңе қалай істесін десеңдер, сендер де оларға солай істеңдер” (МАТАЙ 7:12);

  “Иә” дегендерің “иә”, ал “жоқ” дегендерің “жоқ” болсын” (МАТАЙ 5:37).

Исаның адамзатқа тигізген әсерінің зор болғаны сөзсіз. Алайда әр халықтың ол туралы өз түсінігі мен нанымы бар. Олай болса, сіз “Иса Мәсіх шын мәнінде кім?” деп ойларсыз. Киелі кітап қана оның қайдан келгенін, қалай өмір сүргенін, неліктен өлгенін түсіндіреді. Осы жайлы шындықтарды білу қазіргі өміріңіз бен болашағыңыз үшін өте маңызды.