Рахаб тыңшыларды жасырып қойды

Иерихон қаласына келген исраилдік екі тыңшы Рахаб есімді әйелдің үйіне тоқтайды. Мұны Иерихонның патшасы біліп қойып, оның үйіне сарбаздарын жібереді. Бірақ Рахаб екі тыңшыны шатырда жасырып қояды. Ал келген сарбаздарға тыңшылар басқа жолмен кетті деп айтады. Олар кеткен соң, екі тыңшыға: “Мен Ехобаның сендерге көмектесетінін және осы жерді жаулап алатындарыңды білемін. Сондықтан сендерге көмектесіп жатырмын. Отбасымды аман алып қаламыз деп маған уәде беріңдерші”,— дейді.

Олар былай деп жауап берді: “Сенің үйіңде бірде-бір адам жапа шекпейді. Терезеңе қызыл арқан байлап қой. Сонда отбасыңа ешкім тиіспейді”.

Бұдан кейін Рахаб екі тыңшыны арқанмен терезеден түсіріп жіберді. Олар Ешуаға қайтып бармас бұрын үш күн тауда жасырынды. Тыңшылар қосқа оралған соң, исраилдіктер Иордан өзенінен өтіп, елді жаулап алуға дайындалды. Иерихон олар жаулап алайын деп жатқан бірінші қала еді. Ехоба исраилдіктерге алты күн бойы күніне бір рет қаланы айналып жүруді тапсырды. Ал жетінші күні оны жеті рет айналып шығу керек болды. Сонда діни қызметкерлер керней тартып, сарбаздар болса бар дауыстарымен айғайлау керек еді. Олар солай еткенде, қаланың қабырғалары қирап қалды! Бірақ қабырғада орналасқан Рахабтың үйіне еш зақым келмеді. Ехобаға сенім артқандықтан Рахаб пен отбасы аман қалды.