Патшалықтың азаматтарына қызметтерін атқаруды үйрету

1—3. Иса уағыз ісін қалай ілгерілетті, осы орайда қандай сұрақтар туындайды?

ИСА бүкіл Ғалилеяны аралап, екі жыл бойы уағыз айтты (Матай 9:35—38 оқыңыз). Ол қалалар мен ауылдарға барып, мәжілісханаларда тәлім берді, Патшалық туралы хабарды жариялады. Қай жерде уағыздамасын, халық ағылып келетін. Бұдан ол “жинайтын егіннің көп”, ал жұмысшылардың аз екенін көрді.

² Иса уағыз ісін ілгерілету үшін шара қолданды. Қандай шара? 12 елшісін “Құдай Патшалығы туралы уағыздауға” жіберді (Лұқа 9:1, 2). Бұған қатысты оларда біраз сұрақтар туындаған шығар. Сондықтан Иса елшілерін аттандырмас бұрын, бұл істі қалай атқаруды үйретті. Осылай көктегі Әкесіне еліктеді, өйткені кезінде Ехоба да оны үйреткен еді.

³ Осы орайда келесідей сұрақтар туындайды: Ехоба Исаға не үйретті? Ал Иса елшілеріне ше? Біз жөнінде не деуге болады? Патша өз ізбасарларына қызметтерін атқаруды үйретіп жатыр ма? Қалай үйретіп жатыр?

“Әкем не үйретсе, соны айтамын”

4. Әкесі Исаны қашан және қай жерде үйретті?

⁴ Иса Әкесінен тәлім алғанын жасырмай: “Әкем не үйретсе, соны айтамын”,— дейтін (Жох. 8:28). Ехоба оны қашан және қай жерде үйретті? Иса жаратылыс атаулының тұңғышы еді, Әкесі оны жаратқаннан кейін көп ұзамай-ақ үйрете бастаған болу керек (Қол. 1:15). Әкесімен сансыз көп жылдар бірге болған ол “Ұлы Тәлімгердің” сөздерін өз құлағымен естіп, істерін өз көзімен көрген (Ишая 30:20). Сондықтан оның қасиеттеріне, істері мен ниетіне әбден қанық еді.

5. Исаның жерде атқаратын қызметіне қатысты Әкесі нені түсіндірді?

⁵ Уақыты жеткенде Ехоба Ұлына жерде атқаратын қызметі жайлы түсіндірді. Ұлы Тәлімгер мен оның тұңғыш Ұлының қарым-қатынасы туралы айтылған пайғамбарлыққа көңіл бөлейікші (Ишая 50:4, 5 оқыңыз). Пайғамбарлықта Ехобаның оны “күн сайын оятатыны” айтылған. Мұны оқығанда, көз алдыңызға шәкіртін үйрету үшін оны күнде таңертең ұйқысынан оятатын тәлімгер келеді. Бұл сөздерге қатысты бір еңбекте: “Ехоба... былайша айтқанда, оны оқушы ұқсатып мектепке апарып, не жайында және қалай уағыздауды үйреткен”,— делінген. Сол көктегі “мектепте” Ехоба оған “не айту керектігін” де түсіндірген (Жох. 12:49). Сондай-ақ өзгелерді қалай үйрету керек екенін де айтқанa. Ал жерге келгенде, Иса алған тәлімін өз қызметін атқарғанда да, шәкірттеріне қызметтерін атқаруды үйреткенде де тиімді қолданған.

6, 7. а) Иса елшілеріне не үйретті, бұл оларды не нәрсеге дайындады? ә) Иса бүгіндегі ізбасарларын не нәрсеге үйретуде?

⁶ Сонымен, Иса елшілеріне не үйретті? Матай кітабының 10-тарауынан көретініміздей, ол қызметке қатысты нақты нұсқаулар берген. Мысалы: қай жерде уағыздау керек (5, 6-тармақтар), қандай хабар айту керек (7-тармақ), Ехобаға арқа сүйеу керек (9, 10-тармақтар), үй иесімен қалай сөйлесу керек (11—13 тармақтар), қарсылыққа қалай жауап беру керек (14, 15-тармақтар), қуғын-сүргінге ұшырағанда не істеу керек (16—23 тармақтар)b. Осындай анық нұсқаулардың арқасында елшілері бірінші ғасырда уағыз ісіне жетекшілік етуге дайын болды.

⁷ Қазіргі таңдағы жағдай қандай? Құдай Патшалығының Патшасы Иса ізбасарларына өте маңызды тапсырма беріп отыр. Атап айтқанда, оларға “Патшалық жайлы осы ізгі хабарды барлық халықтар есту үшін бүкіл жер бетінде уағыздау” тапсырылған (Мат. 24:14). Патшамыз бізді бұған үйретіп жатыр ма? Бұған еш дау жоқ! Көктегі тағында отырған Патшамыз шәкірттері қалай уағыздауды, сондай-ақ қауымдағы міндеттерін қалай атқаруды білулері үшін шара қолданды.

Уағыз ісіне үйрету

8, 9. а) Теократиялық қызмет мектебінің негізгі мақсаты қандай еді? ә) Апта ішіндегі кездесу сізге қызметте жемісті болуға қалай көмектесуде?

⁸ Ехоба біраз жылдар бойы өз халқын уағыз ісіне конгрестер, сондай-ақ қызмет кездесуі сияқты жиналыстар арқылы үйретіп келді. Ал 1940 жылдардан бастап бас басқармадағы бауырластар түрлі мектептер де ұйымдастыра бастады.

⁹ Теократиялық қызмет мектебі. Алдыңғы тараудан білгеніміздей, мұндай мектептер 1943 жылдан іске қосылды. Бұл мектептің мақсаты қауымдағылардың сөйлеу шеберлігін арттыру ғана болды ма? Әрине, жоқ. Оның басты мақсаты Құдай халқына сөйлеу қабілетін қызметте Ехобаны дәріптеу үшін қолдануға үйрету еді (Зәб. 150:6). Мектепке жазылғандардың бәрі жақсы уағыздаушы болып шығатын. Қазір біз бұған апта ішіндегі кездесуде үйренеміз.

10, 11. Бүгінде Ғалақат мектебінде кімдер оқиды және оның бағдарламасы не нәрсеге бағытталған?

¹⁰ Күзет мұнарасының Ғалақат Киелі кітап мектебі. Бүгінде бізге Күзет мұнарасының Ғалақат Киелі кітап мектебі деген атаумен белгілі білім ордасы 1943 жылдың 1 ақпанында дүйсенбі күні ашылды. О баста мектептің мақсаты ізашарлар мен басқа да толық уақытты қызметшілерді шетелдерде қызмет етуге дайындау еді. Бірақ 2011 жылдың қазан айынан бері бұл мектепте тек арнайы толық уақыт қызмет атқарып жүргендер, яғни арнайы ізашарлар, аралаушы бақылаушылар мен әйелдері, бетелдіктер не әлі бұл мектепте оқымаған миссионерлер оқиды.

¹¹ Мектеп бағдарламасы не нәрсеге бағытталған? Бұл жайлы тәжірибелі оқытушылардың бірі былай деді: “Құдай Сөзін тереңдетіп зерттеу арқылы студенттердің сенімін нығайту, жүктелетін міндеттерді атқарғанда кезігетін қиындықтармен күресуге қажетті қасиеттер дамыту. Ал бағдарламаның негізгі мақсаты — студенттердің уағыз ісіне деген ықыласын арттыра түсу” (Ефес. 4:11).

12, 13. Ғалақат мектебінің дүниежүзілік уағыз ісіне әсері қандай болды? Мысал келтіріңіз.

¹² Дүниежүзілік уағыз ісіне Ғалақат мектебі қалай әсер етті? 1943 жылдан бері бұл мектепті 8500-ден аса студент бітіріп шығыпc, 170-тен көп елде миссионер болып қызмет етуде. Олар өздері де құлшына уағыздауымен, өзгелерді де соған үйретуімен оқыған-тоқығандарын тиімді қолданған. Көп жағдайда олар жариялаушылар аз я мүлдем жоқ аймақтарда уағыз ісінде жетекшілік еткен.

¹³ Екінші дүниежүзілік соғыс кезінде Жапонияда не болғанын қарастырып көрейік. Сол жылдары елде ұйымдасқан түрде уағыздау доғарылған еді. 1949 жылдың тамызында ондағы жариялаушылардың саны онға да жетпейтін. Ал жылдың аяғына таман болса, Ғалақат мектебінің 13 түлегі белсене уағыздап жүрді. Олардың артынан тағы да миссионерлер жіберілді. Бастапқыда олар ірі қалаларда уағыздады, сосын кішігірім қалашықтарға көшіп барды. Миссионерлер талмай басқа бауырластарды да, зерттеушілерді де ізашар болуға талпындырды. Осылай аянбай еңбек еткендері мол жеміс берді. Бүгінде Жапонияда 216 000-нан аса жариялаушы бар, әрі шамамен 40 пайызы ізашар болып қызмет етедіd.

14. Ұйымның мектептері ненің айқын дәлелі? (188-беттегі “Патшалықтың азаматтарына арналған мектептер” деген қоршауды да қараңыз.)

¹⁴ Өзге мектептер. Ізашарлық қызмет мектебінің, мәсіхші ерлі-зайыптыларға арналған және салтбасты ер бауырластарға арналған мектептің түлектері рухани толыстыe, уағыз ісінде жетекшілік етуге даяр болды. Иә, Патшамыз ізбасарларын қызметтерін толықтай атқаруға дайындап жатыр. Бұның айқын дәлелі — осындай мектептер! (Тім. 2-х. 4:5)

Ер бауырластарды жауапты қызмет атқаруға үйрету

15. Жауапты міндет атқаратындар қай жағынан Исаға еліктегілері келеді?

¹⁵ Исаның Құдайдан тәлім алғаны жайлы Ишаяның пайғамбарлығы есімізде шығар. Көктегі “мектепте” Әкесі Ұлына “шаршағандарға орынды жауап беруді” үйреткен (Ишая 50:4). Иса болса алған тәлімін зая кетірмеді. Жерге келгенде, ол “бейнет шеккендер мен еңселерін ауыр жүк басқандардың” жанын сергітті (Мат. 11:28—30). Қауымда жауапты міндет атқаратындар да Исаға еліктеп, бауырластарының жанын жадыратуды қалайды. Осындай ер бауырластарға қауым мүшелеріне тиімдірек қызмет етуге көмектесу үшін түрлі мектептер ұйымдастырылды.

16, 17. Патшалық қызмет мектебінің мақсаты қандай? (Сілтемені де қараңыз.)

¹⁶ Патшалық қызмет мектебі. Мектептің алғашқы сабағы 1959 жылы 9 наурызда Саут-Лансинг қаласында (Нью-Йорк штаты) басталды. Бұл бір айлық оқуға аралаушы бақылаушылар мен қауым қызметшілері (қазір ақсақалдар кеңесінің үйлестірушілері) шақырылатын. Кейінірек мектептің бағдарламасы ағылшыннан басқа тілдерге аударыла бастады. Осылай Патшалық қызмет мектебінде бірте-бірте жержүзіндегі ер бауырластар оқи алатын болдыf.

¹⁷ 1962 жылы “Ехоба куәгерлерінің жылнамасында” Патшалық қызмет мектебінің мақсаты былай түсіндірілді: “Мына қарбалас заманда Ехоба куәгерлерінің қауымындағы бақылаушы өз өмірін дұрыс жоспарлай білетін адам болуы тиіс. Сонда ғана ол жиналыстағылардың бәріне көңіл бөліп, олар үшін бата болады. Бірақ ол есті болу керек, яғни қауымның қамын ойлаймын деп, өз отбасын ысырып тастамауға тиіс. Бүгінде төрткіл дүниедегі қауым қызметшілері үшін керемет мүмкіндік бар: олар Патшалық қызмет мектебінде бас қосып, бақылаушыларға қойылатын міндеттерді Киелі кітапта қалай жазылса, тап солай атқаруды үйренеді” (Тім. 1-х. 3:1—7; Тит. 1:5—9).

18. Патшалық қызмет мектебінің игілігін қалай бүкіл Құдай халқы көруде?

¹⁸ Патшалық қызмет мектебінің игілігін бүкіл Құдай халқы көруде. Қай жағынан? Ақсақалдар мен қызмет көмекшілері мектепте білгендерін іс жүзінде қолданғанда, бауырластары үшін Иса сияқты жігер мен жұбаныштың қайнары болады. Қамқор ақсақалдың не қызмет көмекшісінің жылы-жылы сөйлеп, мұқият тыңдағанына, үйімізге келіп, жігерлендіргеніне бәріміз де риза боламыз емес пе? (Сал. 1-х. 5:11). Иә, мұндай ер бауырластар қауым үшін нағыз бата!

19. Білім беру комитеті тағы қандай мектептердің жұмысын бақылайды және бұл мектептердің мақсаты қандай?

¹⁹ Басқа мектептер. Басқарушы кеңестің Білім беру комитеті ұйымда жауапты міндеттер атқаратын бауырластарға арналған басқа да мектептердің жұмысын бақылайды. Бұл мектептердің мақсаты — жауапты бауырластарға, атап айтқанда ақсақалдарға, аралаушы бақылаушылар мен филиал комитетінің мүшелеріне, түрлі міндеттерін мүмкіндігінше тиімді атқаруға көмектесу. Киелі кітапқа негізделген оқу бағдарламасы оларды рухани толыса түсуге, сондай-ақ өздеріне сеніп тапсырылған Ехобаның аяулы қойларын Жазбалардағы принциптерге сай бағуға талпындырады (Пет. 1-х. 5:1—3).

20. Неге Иса біз жайында “олардың бәрі Ехобадан тәлім алады” деген және біз қолдан келгенше не істеуіміз керек?

²⁰ Ізбасарлары жақсы дайындықтан өту үшін Патшаның қам жасап отырғаны айдан анық. Мұндай білім беру жолы Ехобадан бастау алған: ол Ұлын үйреткен, ал Ұлы өз ізбасарларын үйретуде. Сондықтан Иса біз жайлы: “Олардың бәрі Ехобадан тәлім алады”,— деген (Жох. 6:45; Ишая 54:13). Олай болса, ұйымның мектептерінің мейлінше пайдасын көру үшін қолдан келгеннің бәрін істейік. Сондай-ақ мынаны да ұмытпайық: мұндай білімнің мақсаты — қызметімізді толықтай атқара беру үшін рухани берік болуымызға көмектесу.