Адамдардың Топан судан аман қалуы

ЖЕР БЕТІНДЕ адамдар көбейген сайын, зұлымдық та кең етек жая бастады. Сол кездегі жалғыз әділ адам Енох Құдайдың зұлым адамдарды жоятынын ескертумен болды. Бірақ зұлымдық одан бетер көбейіп, тіпті ушыға түсті. Кейбір періштелер Ехобаға қарсы шықты: олар өздеріне тиесілі орындарын тастап, жерге түсті де, адам кейпіне еніп, қыздарға үйлене бастады. Олардан бұзақы алыптар туды. Нәтижесінде, дүниеде зорлық-зомбылық пен қантөгіс одан сайын көбейді. Жердегі жаратылыстарының осыншалықты бұзылғаны Құдайдың жанына қатты батты.

Енох өлген соң жер бетінде тағы бір әділ адам өмір сүрді. Ол Нұх пайғамбар еді. Оның бүкіл отбасы Құдайға ұнамды болуға тырысты. Құдай зұлым дүниені жойып, Нұх пайғамбарды және жануарларды аман алып қалуды шешті. Ол Нұхқа қорап тәрізді үлкен кеме соғуды тапсырды. Пайғамбардың отбасы және түрлі жануарлар осы кеменің ішіне кіріп, дүниежүзілік Топан судан аман қалу тиіс-тін. Нұх Құдайдың тілін алды. Ол 50—60 жылдай кеме соқты және әділдікті уағыздады (Петірдің 2-хаты 2:5). Нұх жерді Топан су басатынын айтумен болды, алайда адамдар оны тыңдамады. Уақыты келгенде Нұх пен оның отбасы жануарларды кемеге кіргізіп, өздері де кірді, сосын, Құдай есікті жапты. Бірнеше күннен соң жауын жауа бастады.

Қырық күн, қырық түн бойы жаңбыр шелектеп құйып, бүкіл жер бетін су басты. Зұлымдардың бәрі суға батып өлді. Бірнеше айдан кейін су тартыла бастады да, кеме таудың төбесіне тоқтады. Жалпы алғанда, Нұх отбасымен бірге кеменің ішінде толық бір жыл болды. Кемеден шыққан соң, ол Ехобаға арнап құрбандық шалды. Құдай бұдан былай жер бетіндегі тіршілік атаулыны Топан су жіберіп жоймауды уәде етті. Сонда осының белгісі ретінде көкте кемпірқосақ пайда болды.

Топан судан кейін Құдай адамдарға жаңа нұсқаулар берді. Енді оларға жануарлардың етін жеуге рұқсат етілді. Бірақ алдымен олардың қанын ағызу керек еді. Сондай-ақ Құдай Нұхтың ұрпақтарына жер бетіне тарап кетуді бұйырды. Алайда олардың кейбірі Нымродтың қол астына бірігіп, Бабыл қаласында зәулім мұнара соға бастады. Осылайша Құдайдың бұйрығына қарсы шықты. Алайда Құдай олардың тілдерін шатастырып жібергендіктен, жоспарлары жүзеге аспай қалды. Бірін-бірі түсіне алмаған олар жер-жерге бытырап кетті.

Жаратылыс 6—11 тарауларға және Яһуда 14, 15-тармақтарға негізделген.