Сенім

Сенім деген не?

КЕЙБІР АДАМДАР НЕ ДЕЙДІ?

Көп адамның ойынша, сенімі бар адам деп растығын дәлелдейтін айғақ болмаса да, қандай да бір діни нанымды қабылдауға әзір адамды айтады. Мысалы, “мен Құдайға сенемін” дейтін кісіден: “Сіз Құдайға неліктен сенесіз?”— деп сұраса, ол: “Кішкентайымнан құлағыма құйғаны — осы”,— дейтін шығар. Осындай кездері сенімі бар адам мен нанғыш адамның арасында аса айырмашылық жоқтай көрінуі мүмкін.

КИЕЛІ КІТАП НЕ ДЕЙДІ?

“Сенім дегеніміз — негіз бар болғандықтан, үміттенгеннің жүзеге асатынына берік сену және көрінбейтін нәрселердің шын мәнінде бар екенінің айқын дәлелін көру” (Еврейлерге 11:1). “Негіз бар” деген сөз сенуге келелі себептер бар дегенді білдіреді. Демек, сенімге сезімнен я қалаудан әлдеқайда көп нәрсе кіреді. Сенім деген дәлелдерге негізделген сенімділікті білдіреді.

“Оның [Құдайдың] көзге көрінбейтін қасиеттері — мәңгілік күші мен құдайлық болмысы — дүние жаратылғаннан бері айқын. Бұларды оның жаратылыстарынан көріп, түсінуге болады, сондықтан олар Құдайды біле алмадық деп еш ақтала алмайды” (Римдіктерге 1:20).

Сенімге ие болу неліктен маңызды?

КИЕЛІ КІТАП НЕ ДЕЙДІ?

“Сенім болмаса, Құдайға ұнау мүмкін емес. Өйткені Құдайға жақындайтын әркім оның бар екеніне және өзін шын жүректен іздейтіндерге сый беретініне сену керек” (Еврейлерге 11:6).

Жоғарыда айтылғандай, көп адамға Құдайға сенуге алған тәрбиесі әсер еткен. Олар: “Бала кезімнен құлағыма құйғаны — осы”,— дейтін шығар. Алайда Құдай өзіне құлшылық ететіндерден одан да көп нәрсе күтеді. Ол өзінің тірі тұлға екеніне әрі адамзатты сүйетініне кәміл сенгенімізді қалайды. Сол үшін де Киелі жазбалар Құдайды шын жүректен іздеп, жақыннан танып-білуге шақырады.

“Құдайға жақындаңдар, сонда ол да сендерге жақындайды” (Жақып 4:8).

Сенімге қалай ие бола аламыз?

КИЕЛІ КІТАП НЕ ДЕЙДІ?

Киелі жазбаларда: “Сенім сөзді естуден туады”,— деп жазылған (Римдіктерге 10:17). Демек, Құдайға сену үшін ең алдымен Киелі кітапта ол жайында не айтылғанын естіп-білуіміз қажет (Тімөтеге 2-хат 3:16). Киелі кітаптан білім алсаңыз көптеген маңызды сұрақтарға тиянақты жауап таба аласыз. Сұрақтардың кейбірі мыналар: Құдай деген кім? Оның тірі тұлға екеніне қандай дәлел бар? Құдай шынымен менің қамымды ойлай ма? Жаратушы Иеміз болашаққа қатысты нендей нәрселерді ойластырды?

Ехоба куәгерлері сізге Киелі жазбалардан тәлім алуға көмектесе алады. Біздің jw.org/kk деген сайтта былай деп жазылған: “Ехоба куәгерлеріне Киелі кітаптан тәлім беру ұнайды, бірақ біз ешкімді өз дінімізді қабылдауға мәжбүрлемейміз. Қайта, әрбір адамның сенімге қатысты таңдау құқығын сыйлай отырып, Киелі кітап ілімдерімен таныстырамыз”.

Соңында айтарымыз, Киелі жазбалардағы сөздерді саралап-салмақтап, олардың ақиқат екеніне өзіңіз көз жеткізгенде ғана нағыз сенімге ие бола аласыз. І ғасырдағы Құдайдың қызметшілері де осылай еткен. “Олар естіген нәрселерінің растығына көздерін жеткізу үшін Жазбаларды күн сайын мұқият зерттеп, Құдай сөзін зор ықыласпен қабыл алған” (Елшілердің істері 17:11).

“Мәңгілік өмірге ие болу үшін сені, жалғыз шынайы Құдайды, және өзің жіберген Иса Мәсіхті танып-білу керек” (Жохан 17:3).