Nsangu ya Kele na Ndinga ya Nzambi—Kivuvu Sambu na Bayina Me Tinaka Babwala na Bo

Konso mvula, bamilio ya bantu ke tinaka babwala na bo sambu bo landa kuvanda na luzingu. Keti yo kele mpi mutindu yai sambu na nge? Kana mpidina, kuvila ve nde yo kele ti muntu mosi ya lenda sadisa nge. Muntu yango kele Nzambi. Yandi ke tuba nde nge ta vanda ti luzingu mosi ya mbote kibeni. Nge lenda longuka mambu yai na Biblia.

Christos Stylianides yina vandaka komisere ya Kimvuka ya Eropa (Commissaire de l’union européenne)a ke tuba nde: “Bantu yina me tinaka babwala na bo mpi bayina bo me nataka kisika ya nkaka ke vandaka kaka ve ti mfunu nde beto sadisa bo nswalu-nswalu, kansi mpi . . . ya kivuvu sambu na bilumbu ke kwisa.”b Bantu yina kele ti kivuvu ke tadilaka kukonda mpasi bilumbu ke kwisa na mutindu ya mbote. Katula kivuvu, bantu yina me tinaka babwala na bo ke vandaka mpi ti mfunu ya kikesa sambu bo kanga ntima na mutindu bo ke kudiwa sambu na mambu yina bo me kutanaka ti yo.

Emmanuel ke zingaka na Haïti. Yandi ke tuba nde: “Ntangu yo lombaka nde mono tina insi na beto mpi mono bika dibuta na mono kuna, mono kudiwaka kibeni mbi mpi mono ndimaka ve nde mono ta kuka kukanga ntima. Mono vandaka kuwa boma, mono vandaka na mawa mpi mono vandaka kudiyangisa mingi.”

Keti nge ke kudiwa mpi bonso Emmanuel? Kana nge me bikaka bwala na beno, yo kele mfunu nde bo pesa nge kikesa mpi nge vanda ti kivuvu.Inki mutindu Biblia Ndinga ya Nzambi lenda sadisa nge?

Kikesa ya Ndinga ya Nzambi Ke Pesa

Biblia ke tuba nde: “Yehowac . . . ke zolaka munzenza.”—Kulonga 10:17, 18.

Biblia ke tuba nde: “Yehowa kele pene-pene ya bantu yonso yina ke bingaka yandi.”—Nkunga 145:18.

Biblia ke tuba nde: “Ngindu lenda kwisila ve ata fioti Nzambi ya kieleka na kusala mambu na nku yonso . . . Nkwa-Ngolo Yonso ke sambisaka ve mambu na mutindu ya mbi.”—Yobi 34:10, 12.

Yo ke tendula nde Nzambi ve muntu ke sala nde nge mona mpasi. Yandi ke pesa nge ve ndola, yandi ke meka nge mpi ve mpila nge ke mona mpasi na luzingu.

Kivuvu ya Ndinga ya Nzambi Ke Pesa

Biblia ke tuba mambu yina Nzambi ta sala sambu na beto na bilumbu ke kwisa. Tala mutindu kivuvu yango ke sadisa bantu yina me tinaka banzo na bo.

Biblia ke tuba nde: ‘Nzambi ta katula mansanga yonso na meso na bo, lufwa ta vandaka diaka ve; mawa, bidilu, mpi mpasi ta vandaka diaka ve.’—Kusonga 21:4.

Yo ke tendula nde beto ta mona diaka ve mpasi. Nzambi ke tuba nde yandi ta manisa bampasi yonso yina ke sala nde nge konda kivuvu bubu yai.

Karla ke zingaka na Salvador. Yandi ke tuba nde: “Kubika fioti, Nzambi ta manisa kukonda lunungu mpi mambu ya mbi ya ke salama kisika beto kele. Kivuvu yina ke sadisaka mono na kubika ve kuyindula kilumbu yina bampasi yonso ta mana.”

Biblia ke tuba nde: “Mambu ya ntama ta kwisa ve na mabanza, yo ta kwisa mpi ve na ntima.”—Yezaya 65:17.

Yo ke tendula nde beto ta niokwama diaka ve sambu na mambu ya mpasi yina beto ke yibukaka. Nzambi ta sala yonso na mpila nde nge kudiyangisa diaka ve, sambu nge ta yibuka diaka ve mambu ya mbi yina kuminaka nge na ntangu ya ntama.

Natalia yina ke zingaka na Ukraine. Yandi ke tuba nde: “Biblia ke tuba nde beto ta yibuka diaka ve mambu ya mpasi mpi bima yina beto me vidisaka. Kivuvu yina ke sadisaka mono na kukanga ntima sambu mono me zaba nde mambu yonso ta soba.”

Biblia ke tuba nde: “Nzambi ya zulu ta tula kimfumu mosi yina ta . . . bedisa mpi ta sukisa bimfumu yina yonso.”—Daniele 2:44.

Yo ke tendula nde kimfumu mosi ya kukuka mpi ya kele na zulu ta yala ntoto ya mvimba. Ntama ve, Nzambi ta katula bimfumu yonso ya bantu mpi yandi ta tula kimfumu na yandi yina ke yala na zulu. Kimfumu yina ta nata ngemba ya masonga mpi lutaninu ya masonga na ntoto. Yo ta sala mpi nde bo sadila bantu yonso mambu mbote mpi ata muntu mosi ve kukonda kima.—Mika 4:3, 4.

Mustafa ke zingaka na Moyen-Orient. Yandi ke tuba nde: “Kuzaba nde mambu bonso kumonisa bantu ya nkaka mpasi, kusadila ve bantu mambu mutindu mosi, kubakila bantu bangindu, mpi kupona-pona ta mana ntama ve disongodila nde, kubika fioti Kimfumu ya Yehowa ta manisa bampasi yai yonso, ke pesaka mono kikesa.”

Mayele ya Ndinga ya Nzambi Ke Pesa

Mayele ya ke sadisaka bantu na luzingu yina kele na Biblia lenda sadisa nge na kundima mambu yina kuminaka nge. Yo lenda sadisa nge mpi na kukanga ntima mutindu luzingu na nge me soba, yo vanda mpila nge me vidisa bima na nge. Tala mutindu baverse yai ya Biblia ke natila bantu yina me tinaka babwala na bo mambote:

Biblia ke tuba nde: “Ata ntangu muntu kele ti bima mingi, luzingu na yandi ke katukaka ve na bima yina yandi kele ti yo.”—Luka 12:15.

Mutindu verse yai lenda sadisa nge na kukanga ntima: Mbala ya nkaka nge ke waka mpasi mingi na ntima mpi nge ke waka kibeni na nitu na nge nde nge me vidisa bima. Kansi kana nge pema fioti mpi nge tadila valere ya luzingu na nge, yo lenda sadisa nge na kuvanda ti bukati-kati sambu na bima ya nge me vidisa.

Natalia ke zingaka na Ukraine. Yandi ke tuba nde: “Luzingu kele mfunu mingi kuluta bima ya kinsuni. Bantangu ya nkaka, bima ya kinsuni to mbongo lenda sadisa nge ata na kima mosi ve.”

Biblia ke tuba nde: “Kutuba ve nde, ‘Sambu na nki bilumbu ya ntama vandaka mbote kuluta bilumbu yai?’”—Longi 7:10.

Mutindu verse yai lenda sadisa nge na kukanga ntima: Mbala ya nkaka luzingu na nge me kuma diaka mpasi mingi bubu. Kansi kana nge ke fwanisa yo ve ti luzingu yina nge vandaka ntete ti yo, yo ta sadisa nge na kudiwa ve mbi mingi kuluta.

Eli ke zingaka na Rwanda. Yandi ke tuba nde: “Mono ke tadilaka mambu na mutindu ya mbote sambu mono ke ndimaka mutindu luzingu na mono me kumaka bubu.”

Biblia ke tuba nde: “Kana beto kele ti madia, mpi bilele, beto ta sepela ti bima yai.”—1 Timoteo 6:8.

Mutindu verse yai lenda sadisa nge na kukanga ntima: Sala yonso sambu na kusepela ti bima ya mfunu ya luzingu. Kana nge ke sepela ti bima yina, nge ta vanda ve ti basusi ya mingi mpi yo lenda sadisa nge na kudiyangisa ve na mabanza.

Ivan ke zingaka na Ukraine. Yandi ke tuba nde: “Biblia ke sadisa mono na kutadila mambu mutindu ya nkaka, kansi ve na kutula dikebi na bima ya mono me vidisaka. Mono ti nkento na mono, beto kele na kiese mutindu beto kele na luzingu mpi na kisika ya lutaninu.”

Biblia ke tuba nde: “Yo yina, mambu yonso yina beno ke zola nde bantu kusadila beno, beno mpi beno fwete sadila bo yo.”—Matayo 7:12.

Mutindu verse yai lenda sadisa nge na kukanga ntima: Nge ta zinga mbote ti bantu ya nkaka, kana nge ke sala ngolo sambu na kuvanda ntima-nda mpi mawete. Bikesa na nge lenda sadisa mpi na kuvanda ve ti bangindu ya mbi sambu na bantu ya nkaka, mpi yo lenda sadisa bantu ya kisika yina nge ke zinga na kundima nge.

Angelo ke zingaka na Sri Lanka. Yandi ke tuba nde: “Bantu mingi ke sepelaka kana nge ke sadila bo mambu ti luzitu, mawete, mpi zola. Yo ke salaka nde nge ti bantu ya kele kisika ya nge ke zingaka kuvanda ti bangwisana ya mbote.”

Biblia ke tuba nde: “Beno zabisa Nzambi mambu ya beno ke lomba; ebuna ngemba ya Nzambi . . . ta tanina bantima na beno mpi mabanza na beno.”—Bafilipi 4:6, 7.

Mutindu verse yai lenda sadisa nge na kukanga ntima: Sala kisambu mpi songa Nzambi mutindu nge ke kudiwa. Songa yandi mpi bampusa na nge, mambu ya ke pesa nge boma mpi ya ke yangisa nge. Kusamba sambu na mambu yina lenda manisa basusi na nge, mpi kutanina nge na kudiyangisa ve kuluta ndilu sambu na luzingu na nge.

Yol ke zingaka na Soudan du Sud. Yandi ke tuba nde: “Mono ke sambaka Nzambi konso ntangu yina yo kele ti mambu ya ke yangisa mono, mpi yandi ke pesaka mono mvutu. Mambu ya mono me longukaka na Biblia me pesaka mono ngemba ya mabanza.”

Valentina ke zingaka na Ukraine. Yandi ke tuba nde: “Bandongisila ya mbote ya kele na Biblia ke sadisaka mono na kuzwa ngemba ya ntima yina mono ke vandaka ti yo mfunu, sambu na kangila diambu yai ya mpasi ntima.”

Emmanuel ke zingaka na Haïti. Yandi ke tuba nde: “Kuzaba nde Yehowa ke tuba nde luzingu ta vanda mbote kibeni ke pesa mono kikesa.”

Keti nge ta sepela kuzaba mambu mingi sambu na mambu yina Biblia ke tubaka na yina me tala kikesa mpi kivuvu, mpi sambu na nki beto lenda ndima mambu yango? Lomba nde Bambangi ya Yehowa kukwisa kutala nge. Bo ta vanda na kiese ya kusadisa nge.