Inki Biblia Ke Tuba na Yina Me Tala Kuvutula Mbi na Mbi?

Mvutu ya Biblia

Ata bantangu ya nkaka muntu lenda vanda ti bikuma ya kuvutula mbi na mbi, kikalulu yina ke wakana ve ti mambu yai ya Biblia ke tuba: “Kutuba ve nde: ‘Mono ta sala yandi kaka mutindu yandi me sala mono; mono ta vutudila yandi mbi.’” (Bingana 24:29, noti na nsi ya lutiti) Biblia kele ti bandongisila yina me sadisaka bantu mingi na kuvanda diaka ve ti nzala ya kuvutula mbi na mbi.

Disolo yai ta tubila:

Sambu na nki yo kele mbi na kuvutula mbi na mbi?

Kana muntu mosi me lwadisa nge to yandi me sala nge kima mosi ya mbi, nge lenda wa makasi mpi kusosa nde yandi baka ndola sambu na mbi yina yandi me sala. Kansi kuvutula mbi na mbi ke wakana ve ata fioti ti nsiku yina kele na Biblia. Sambu na nki?

Kana muntu ke sosa kuvutula mbi na mbi, Nzambi ke sepelaka ve. Yehowaa ke tuba na Biblia nde: “Mono muntu ke vutulaka mbi; mono muntu ta pesa ndola.” (Baroma 12:19.) Biblia ke lombaka bantu yina bo me sala mbi na kusala yonso sambu na kumanisa makambu na ngemba, na kisika ya kusosa kuvutula mbi na mbi. (Baroma 12:18) Kansi, inki nge lenda sala kana mpila ya kuyidika makambu na ngemba kele diaka ve? Biblia ke siamisa beto na kutudila Yehowa ntima sambu yandi muntu ta yidika mbi yina bo me sala beto.—Nkunga 42:10, 11.

Inki mutindu Nzambi ke pesaka bantu yina ke salaka mbi ndola?

Bubu yai, Nzambi ke pesa bamfumu ya leta nzila ya kupesa bantu yina ke sala mbi ndola. (Baroma 13:1-4) Na ntangu ya me fwana, yandi ta sambisa bantu yina ke salaka mambu ya nku mpi yandi ta katula bampasi kimakulu.—Yezaya 11:4.

Inki nge lenda sala sambu na kubuya kuvutula mbi na mbi?

Kusala ve mambu na nsi ya makasi. (Bingana 17:27) Mbala mingi bantu yina ke salaka mambu na nsi ya makasi, ke waka mpasi mingi na ntima na nima sambu na mambu yina bo me sala. Kansi bantu yina ke bakaka ntangu ya kuyindula na ntwala ya kusala mambu, mbala mingi bo ke bakaka balukanu ya mbote.—Bingana 29:11.
Sosa kubakisa mambu. (Bingana 18:13) Muntu yina bo me sala mbi fwete kudiyula nde: “Keti yo kele ti bikuma yina mono me zaba ve ya lenda monisa sambu na nki muntu yina me sala mono mbi salaka mutindu yina? Keti na ntangu yai, yandi ke kutana ti bampasi? Keti mbala ya nkaka, yandi me zaba ve kima ya yandi salaka?” Bantangu ya nkaka, beto ke yindulaka nde muntu mosi me sala beto mbi na luzolo. Kansi na masonga yonso, yandi salaka yo ve na luzolo.

Mambu yina bantu ya nkaka ke yindulaka na yina me tala kuvutula mbi na mbi

Ngindu ya bantu: Biblia ke pesaka beto nzila ya kuvutula mbi na mbi sambu yo ke tubaka nde “disu sambu na disu.”—Levi 24:20, Bible en Kituba.

Diambu ya kieleka: Lukanu ya nsiku “disu sambu na disu” yina Nzambi pesaka bantu ya Izraele vandaka ve ya kuvutula mbi na mbi. Na bunkufi, Nzambi pesaka nsiku yina na bazuzi sambu yo sadisa bo na kupesa muntu yina me sala mbi ndola na kutadila nene ya mbi yina yandi me sala.b—Kulonga 19:15-21.

Ngindu ya luvunu: Mutindu Biblia ke buyisaka beto na kuvutula mbi na mbi, beto lenda sala ve ata kima kana bantu ke nwanisa beto.

Diambu ya kieleka: Kana muntu ke nwanisa beto, beto kele ti nswa ya kusala kima to ya kusosa nde bamfumu ya leta kusadisa beto. Kansi, Biblia ke lomba beto ve na kunwana yo vanda inki mutindu.—Bingana 17:14.

a Yehowa kele zina ya Nzambi mutindu Biblia ke monisa beto.

b Sambu na kuzaba mambu mingi na yina me tala nsiku yai, tanga disolo “Bangogo ‘Disu Sambu na Disu’ Ke Tendula Inki?”