BANGIUFULA YA BATANGI

Inki bakuwakana zole ntumwa Polo tubilaka na Bagalatia 4:24?

Ntumwa Polo tubilaka kuwakana yina Abrahami vandaka ti yo na Sara mpi Agare. Ntumwa Polo tubaka nde: ‘Mambu yai lenda vanda ti ntendula ya kifwani; sambu bankento yai ke tendula bakuwakana zole.’ (Bag. 4:​22-24.) Ntete beto vandaka kuyindula nde bakuwakana yai zole vandaka kuwakana ya Nsiku mpi kuwakana ya mpa. Kansi na nima ya kulonguka diaka mbote-mbote baverse yai, beto me bakisa nde yo ke tendula kima ya nkaka. Yo ke monana nde Polo vandaka kutubila ve kuwakana ya mpa, kansi kuwakana ya Abrahami. Beto tadila mwa bikuma ya ke ndimisa yo.a

Polo fwanisaka Agare ti Ngumba ya Sinai. (Bag. 4:25) Agare vandaka kutendula kuwakana ya Nsiku yina Yehowa pesaka Moize na Ngumba ya Sinai na mvula 1513 na ntwala ya ntangu na beto. (Kub. 19:​5, 6) Mutindu Bayuda vandaka bantu ya kukonda kukuka, bo lendaka ve kulemfukila Nsiku ya Moize na mutindu ya kukuka. Yo yina, ntembe kele ve nde yo sadisaka bo na kubakisa nde bo vandaka bampika ya disumu. Kuwakana yai lendaka kusadisa dikanda ya Izraele na kuzaba Mesia mpi nde yandi mpamba muntu ta lemfukila Nsiku na mutindu ya kukuka. Kimenga ya Yezu katulaka bantu yonso na kimpika ya disumu mpi ya lufwa. (Bag. 3:​19, 24, 25) Na nima ya kulungisa lukanu ya Nzambi, Nsiku vandaka diaka ve na mfunu.—Bar. 10:4.

Polo swaswanisaka Agare ti Sara “nkento yina kele na kimpwanza” mpi yina butaka mwana “na nzila ya lusilu.” (Bag. 4:23) Lusilu yango vandaka kuwakana ya Abrahami. (Bag. 3:29; 4:​28, 30) Yehowa tubaka sambu na kuwakana yina na Kuyantika 22:18 nde: “Na nzila ya mwana na nge makanda yonso ya ntoto ta kudibakila lusakumunu sambu nge me wa ndinga na mono.”

Kuwakana yina Nzambi salaka ti Abrahami tubilaka mpi mambu ya nkaka sambu na lusilu yina Yehowa salaka na Edeni. (Kuy. 3:15) Yo tubilaka na ntwala nde “mwana” yango ta butuka na dikanda ya Abrahami. Polo tubaka nde “mwana” yango ke tadila ntete-ntete Yezu Kristu. Kansi yo ke tadila mpi “bantu ya Kristu,” disongidila Bakristu 144 000 yina bo me tulaka mafuta yina ta yala ti Yezu na Kimfumu na yandi. (Bag. 3:​16, 29; Kus. 14:​1-3) Kulungana ya mambu yina Nzambi silaka Abrahami ta natila bantu yina ke ndimaka mpi ke lemfukilaka Yezu balusakumunu mingi.

Sambu na nki Polo sadilaka ‘ntendula yai ya kifwani’? Polo monisaka nde kana Bayuda na bilumbu na yandi kulanda kaka kulemfuka na Nsiku ya Moize, bo ta vanda bampika bonso Agare. Kansi kana bo ndima Yezu Kristu, ‘mwana’ ya ntete-ntete ya Abrahami, bo ta vanda ti kimpwanza bonso Sara mpi bo ta katuka na kimpika ya disumu mpi ya lufwa. (Yoa. 8:​32-34) Kansi kana bo kwikila ve na Yezu, Nsiku zolaka ve kulungisa lukanu na yo ya ntete, disongidila kunata bo na Yezu.

Bakristu mingi ya Galatia yina Polo sonikilaka mikanda vandaka ve Bayuda mpi bo vandaka ve ata fioti na nsi ya Nsiku ya Moize. Bakristu ya nkaka ya Bayuda vandaka kuzola kaka nde Bakristu yina kele ve Bayuda kulemfukila Nsiku mpi nde bo sala bo luyotisu mutindu Nsiku yango vandaka kulomba. Polo monisaka nde yo ta vanda buzoba kana bo ndima diaka kukuma na “kimpika” ya Nsiku sambu bo me bakaka dezia “kimpwanza” mpi me kumaka bantu ya Kristu.—Bag. 5:​1, 10-14.