Bafile ya Kulobila Bambisi na Ntangu ya Ntama

Balongoki ya nkaka ya Yezu vandaka balobi-mbisi. (Mar. 1:​16-20) Bo vandaka kusadila bafile to babukondi sambu na kuloba bambisi na Nzadi-Mungwa ya Galilea.

Bo vandaka kusadila bansinga sambu na kusala bafile yango mpi bo vandaka kukangisa-kangisa bansinga yango mpi kubika yo ti mabulu mingi ya fioti-fioti. Bo vandaka kusala bafile na kutadila nene ya bambisi yina bo ta loba. Bafile ya fioti vandaka ti matadi ya fioti-fioti ya kukangisa na bansinga na yo mpi yo vandaka kusala nde bafile yango kudinda na masa sambu na kukanga bambisi. Kansi bafile ya nene vandaka ti bima ya kilo ya kukangisa na bansongi na yo ya nsi mpi mabaya ya fioti-fioti ya kukangisa na zulu.

Bafile vandaka ntalu mingi mpi kuyidika yo vandaka kulomba bisalu ya ngolo sambu matadi yina ke vandaka na masa to bambisi ya nene vandaka kubebisa yo to nkutu kupasula yo. (Luka 5:6) Biblia ke tubila Yakobo mpi Yoane yina vandaka ‘kuyidika babukondi na bo.’ Mbala ya nkaka bo vandaka kusadila sindani ya nene ti nsinga sambu na kuyidika yo. (Mat. 4:21) Yo ke monana nde balobi-mbisi vandaka kuyidika bafile na bo konso mbala na nima ya kuloba. Luka ke tubila mpi balobi-mbisi yina “vandaka kuyobisa babukondi na bo” sambu na kukatula bitobi-tobi to mvindu. (Luka 5:2) Na nima, balobi-mbisi vandaka kuyanika bafile yango sambu yo kawuka mpi yo beba ve.—Ezek. 47:10.

Yezu lombaka bantu yina zabaka mbote kuloba bambisi na kukuma “balobi-bantu.”—Mar. 1:17