Tudila Mfumu ya Kuluta Nene Ntima

1. Inki bampasi ya ngolo Yobi kutanaka ti yo?

YOBI muntu ya lukwikilu, kutanaka ti bampasi mingi ya ngolo na mbala mosi. Bana na yandi fwaka, yandi vidisaka bimvwama na yandi yonso mpi yandi belaka ngolo. Bantu vandaka kuzitisa yandi diaka ve. Banduku na yandi tubaka mambu mingi ya mbi yina lembisaka yandi nitu. Nkutu nkento na yandi kumaka kudiyangisa mingi, yo yina yandi songaka Yobi nde: “Singa Nzambi mpi fwa.” (Yobi 2:9; 15:4, 5; 19:1-3) Bampasi yai ya ngolo, lendaka kupusa yandi na kutudila diaka ve Nzambi ntima mpi kuyindula nde Yehowa ke taninaka ve bantu yina ke zolaka yandi mpi ke sadilaka yandi.

2-3. Inki beto lenda kudiyula mpi nki beto ta longuka na mukanda ya Yobi?

² Bantangu ya nkaka, beto lenda kutana ti bampasi ya ngolo yina lenda sala nde beto tudila diaka ve Yehowa ntima. Beto ke zinga na “bantangu ya mpasi mpi ya nku.” (2 Tim. 3:1) Kana beto ke kutana ti mpasi na zulu ya mpasi, beto lenda kudiyangisa mingi mpi kuyindula nde beto ta kuka ve kukanga ntima. Nkutu yo lenda pusa bankaka na kudiyula kana Yehowa ke zolaka bo kibeni.

³ Kana nge me yindulaka mpi dezia mutindu yina, kulemba ve nitu. Yobi bakisaka nde Yehowa ke gulusaka bantu yina ke kangamaka kaka na yandi. Beto lenda kuma mpi kutudila Yehowa ntima mingi mpi kundima kibeni nde yandi ta sadisa beto. Beto tala malongi zole ya mfunu yina beto ta longuka na mukanda ya Yobi yina ta sadisa beto na kutudila Yehowa ntima mingi. Ya ntete, Yehowa kele Mfumu ya Kuluta Nene. Ya zole, Nzambi Nkwa-Ngolo Yonso lenda twadisa mambu ya ke salama na nsi-ntoto sambu na kulungisa lukanu na yandi mpi kutanina bansadi na yandi na kimpeve mpi na kinsuni.

SATANA KOTAKA NA KATI NA BO

4. Inki salamaka kilumbu mosi ntangu Yehowa ti bawanzio vukanaka na zulu?

⁴ Kilumbu mosi, “bana ya Nzambi ya kieleka” vukanaka na zulu na ntwala ya Yehowa. Biblia ke tuba nde: “Satana mpi kotaka na kati na bo.” (Yobi 1:6) Yo kele mbala ya ntete yina Biblia ke sadila zina ya Satana, muntu yina ke teleminaka Yehowa. Na ntangu yina, Satana vandaka diaka ve na kati ya bana ya bulemfu ya Nzambi. Yandi kumaka mbeni ya Yehowa mpi ya dibuta na yandi ya mvimba na zulu mpi na ntoto. Yehowa monisaka nde Satana vandaka diaka ve na dibuta na yandi ntangu yandi tubaka mambu yina kele na Kuyantika 3:15. Yo yina Satana kele ve na kati ya “nkento,” disongidila dibuta ya Yehowa na zulu, yina zolaka kubuta “mwana.”

5. Mambu yina salamaka na lukutakanu mosi na zulu ke longa beto nki?

⁵ Yehowa lombaka nde bo sonika mambu yina salamaka na lukutakanu yina sambu beto zaba yo. Mambu yina Satana tubaka ke monisa pwelele nde yandi kele nku mpi ke tubaka mambu ya luvunu sambu na bansadi ya Yehowa. (Yobi 1:9; tala mpi Kusonga 12:10.) Lukutakanu yina ke longa beto mpi kima mosi yina ke bwisa beto ntima: Ntangu yonso, Yehowa ke sadilaka ngolo na yandi ya kukonda nsuka sambu na kusala mambu ya mbote. Yo ke monisa mpi nde Nzambi Nkwa-Ngolo Yonso ke tulaka bandilu na mambu yina bawanzio mpi bantu lenda sala.

YEHOWA KE TULAKA BANDILU

6. Inki mutindu Yehowa monisaka nde yandi muntu vandaka kutwadisa lukutakanu yina salamaka na zulu? (Yobi 1:7, 8)

⁶ Tanga Yobi 1:7, 8. Na lukutakanu yina, Yehowa monisaka nde yandi muntu vandaka kutwadisa yo. Yandi yulaka Satana nde: “Keti nge me tula dikebi na nsadi na mono Yobi?” Ya kieleka, Yehowa zabaka mbote nde Satana vandaka ti mfunu ya kunwanisa Yobi. Beto tala mutindu Yehowa sadilaka ngolo na yandi ya kukonda nsuka sambu na kusadisa Yobi.

7. Mutindu Yobi 1:10, 11 ke monisa yo, nki satana tubaka sambu na bansadi ya Yehowa?

⁷ Tanga Yobi 1:10, 11. Yehowa kele Mfumu ya Kuluta Nene na zulu mpi na ntoto. Yandi ke sadilaka kiyeka na yandi na mutindu yina me fwana sambu na yandi. (Yer. 32:17; Dan. 4:35) Kansi Satana monisaka nde Yehowa ke sadilaka kiyeka na yandi na mutindu ya mbi. Yandi tubaka nde Nzambi ke lebaka bantu, mu mbandu Yobi, sambu na kusadila yandi. Satana monisaka mpi nde bantu ke sambilaka Nzambi kaka sambu na mambote yina yandi ke sadilaka bo. Inki Yehowa salaka?

8-9. Inki bandilu Yehowa tudilaka Satana mpi sambu na nki? (Yobi 1:12) (Tala mpi kifwanisu.)

⁸ Tanga Yobi 1:12. Yehowa pesaka Diabulu nzila ya kumonisa kana mambu yina yandi tubaka kele kieleka, kansi yandi tudilaka Diabulu bandilu. Nzambi songaka Diabulu pwelele nde: “Kusimba yandi ve na nitu!” Bawanzio yonso yina vandaka pana, waka mutindu Yehowa tudilaka Satana bandilu na ntwala nde yandi kwenda kumeka Yobi. Satana vandaka ve ti kiyeka ata fioti ya kusala mambu yina Yehowa pesaka yandi ve nswa ya kusala. Bubu yai mpi Satana kele ve ti kiyeka ya kusala mambu yina Yehowa me pesa yandi ve nswa. Yehowa sadilaka ngolo mpi kiyeka na yandi sambu na kutanina Yobi mpi lukumu na yandi mosi.

⁹ Satana mekaka Yobi kansi yandi nungaka yandi ve. Yobi landaka kukangama ngolo na Tata na yandi ya zulu. (Yobi 1:22) Ata mpidina, Satana vandaka kaka ti mfunu ya kumeka diaka Yobi.

10. Sambu na nki Yehowa pesaka Satana nswa ya kumeka diaka Yobi? (Yobi 2:2-6)

¹⁰ Tanga Yobi 2:2-6. Mbala yai Satana mekaka Yobi ngolo kuluta. Satana tubaka nde Yobi ta buya Nzambi sambu na kutanina luzingu na yandi. Sambu na kumonisa luvunu ya Diabulu, Yehowa pesaka yandi nswa ya kusimba Yobi na nitu. Kansi mbala yai diaka, Yehowa tudilaka yandi bandilu, yandi songaka Diabulu nde: “Kubaka ve luzingu na yandi!” Satana vandaka ve ata fioti ti kiyeka ya kufwa Yobi sambu Yehowa pesaka yandi ve nswa. Na mbala yai diaka, Yehowa monisaka nde yandi kele Nkwa-Ngolo Yonso sambu Satana lendaka ve kusala Yobi mambu yina Yehowa pesaka yandi ve nswa.

YEHOWA MANISAKA BAMPASI YA YOBI

11. Inki mutindu Yehowa sakumunaka Yobi? (Yobi 42:10-13)

¹¹ Tanga Yobi 42:10-13. Yo monanaka pwelele nde Yobi ta landa kaka kulemfukila Yehowa. Yo yina, Yehowa pesaka diaka ve Satana nzila ya kumeka Yobi. Yehowa manisaka bampasi ya Yobi, nsadi na yandi yina yandi vandaka kuzola mingi. Na mbala yai diaka, Diabulu vandaka ve ti kiyeka ya kusoba lukanu yina Yehowa bakaka. Yandi vandaka diaka ve ti nswa ya kumeka na pwelele yonso Yobi, nsadi ya Yehowa yina yandi ke bakaka na valere mingi.

12. Pesa mbandu ya ke monisa nde Yehowa ke sadilaka ngolo na yandi sambu kusadisa bansadi na yandi.

¹² Na bilumbu yai ya nsuka, bampangi mingi me monaka mutindu Yehowa me sadilaka ngolo na yandi sambu na kugulusa bo. Mu mbandu, na 1945 basoda ya Allemagne katulaka Bambangi ya Yehowa 230 na boloko mosi sambu na kutambusa bo na nzila mosi ya nda mpi ya kigonsa sambu bo yonso kufwa. Bampangi yango tubaka mambu yai sambu na mpasi yina bo kutanaka ti yo: “Beto me lutisa nsungi mosi ya mpasi, beto bantu ya me guluka, beto kele bonso bantu yina bo me basisa na fulu ya tiya ya ngolo kansi bo ke basika ve nsudi ya midinga. . . . Yehowa me pesa beto diaka ngolo mpi kikesa mingi.” Bo tubaka diaka nde: “Awa ya beto me guluka na dibulu ya bantambu, . . . beto kele kaka ti mfunu nde bo pesa beto nswa ya kusadila Yehowa . . . mvula na mvula. Yo ta vanda lusakumunu ya kuluta nene sambu na beto.”​—Tala mpi Daniele 3:27; 6:22.

13. Inki nge fwete ndima ntangu nge ke kutana ti bampasi? (Tala mpi bifwanisu.)

¹³ Beto mpi lenda kutana ti mambu ya mpasi mpi beto kudiwa bonso nde bo me losa beto na dibulu ya bantambu. (1 Pie. 5:8-10) Bantangu ya nkaka, beto lenda lemba mpenza nitu mpi kudiyula kana bampasi yango ta mana kibeni. Na bantangu ya mutindu yai, kuyindula mbandu ya Yobi ta sadisa beto. Beto fwete ndima kibeni nde Yehowa kele ti ngolo ya kumanisa bampasi na beto. Yandi lenda sala yo bubu yai to na nsi-ntoto ya mpa. Yandi ta fwa nsi-ntoto yai na ntangu yina yandi me tulaka mpi ntangu yango ta luta ve ata fioti.

YEHOWA KE ZOLAKA BANTU YINA KE ZOLAKA YANDI

14-15. Inki Yehowa ke zola kusala sambu na bantu yina ke zolaka yandi mpi sambu na nki? (Yobi 14:15) (Tala mpi kifwanisu.)

¹⁴ Tanga Yobi 14:15. Tata na beto ya zulu ke zolaka mingi bantu yina ke kangamaka kaka na yandi. Kana bo fwa, yandi ta futumuna bo. Yandi ta manisa mpasi yina lufwa ke nataka.​—Yez. 65:17.

¹⁵ Ata Yobi landaka kuzinga na nsi-ntoto yai ya Satana, Biblia ke tuba nde Yehowa pesaka yandi diaka sante ya mbote mpi bima mingi kuluta yina yandi vandaka ti yo ntete. Yehowa ta sakumuna yandi diaka mingi kuluta na nsi-ntoto ya mpa. Yehowa monisaka nde yandi ke zolaka nde bantu yina ke zolaka yandi kuzinga na kiese mpenza. Ya kieleka, Yehowa ta pesa bantu yonso yina ke kangamaka kaka na yandi dibaku ya kuzinga mvula na mvula na paladisu awa na ntoto. (Kus. 21:3, 4) Yehowa, Mfumu ya Kuluta Nene kele ti nzala ya ngolo ya kusala yo. Kuzaba mambu yai ke pesaka beto kikesa ntangu beto ke kutana ti bampasi.

16. Inki kele kikuma ya nkaka ya ke pusa beto na kutudila Yehowa ntima?

¹⁶ Yobi zingaka mingi mpi nsuka-nsuka, yandi fwaka. Kansi Yehowa, Mfumu ya Kuluta Nene mpi Nkwa-Ngolo Yonso, kele ngolo mingi kuluta lufwa. (Kul. 32:39) Yo yina, ata muntu mosi ve lenda kanga yandi nzila ya kufutumuna bantu yina yandi ke zolaka. Yandi ta sala yo na ntangu yina yandi me tulaka.​—Bar. 8:38, 39.

TUDILA YEHOWA NTIMA YA MVIMBA

17. Inki ke monisa nde Satana ke kukaka ve kumanisa bansadi ya Yehowa?

¹⁷ Disolo ya Yobi ke monisa kibeni nde beto fwete tudila Yehowa ntima ya mvimba. Beto kele na kiese mingi sambu Satana me kukaka ve kumanisa bansadi yonso ya Yehowa. Bubu yai bansadi ya Yehowa kele kiteso ya 9 milio, yo ke monisa mpenza nde Yehowa kele ngolo mpi yandi kele kibeni Mfumu ya Kuluta Nene. Mbala na mbala, minduki yonso yina bantu ke sadilaka sambu na kunwanisa bansadi ya Yehowa ke nungaka ve. (Yez. 54:17) Baluyalu ya ngolo mpi bamfumu ya mabundu me sosaka kukanga beto nzila ya kusambila Yehowa mpi ya kulonga nsangu ya mbote. Kansi bo me nungaka ve sambu Yehowa ke sadisaka beto. Ata kima mosi ve ta kanga beto nzila ya kulonga kieleka ya me tala Yehowa mpi kumonisa nde Satana kele muntu ya luvunu mpi ya nku. Nkutu ata lufwa mpi ta kuka ve kukanga beto nzila sambu Yehowa ta futumuna bansadi na yandi yonso ya bulemfu.​—Ozea 13:14.

18. Sambu na nki beto fwete wa ve boma ya mambu yina lenda kumina beto?

¹⁸ Kana beto ke yindula disolo ya Yobi, yo ta sadisa beto na kundima kibeni nde beto ta kanga ntima na konso mpasi yina beto lenda kutana ti yo. Na mpasi ya nene, bansadi ya Nzambi ta monana bonso nde bo kele ve na lutaninu mpi Satana ti bantu na yandi ta monana bonso nde bo kele ngolo mingi. Kansi kaka mutindu Yehowa salaka sambu na Yobi, yandi ta bika ve ata fioti nde Satana kuniokula beto kimakulu. Ntama mingi ve, Yehowa ta manisa bampasi yonso yina Satana me nataka na ntoto. Yehowa ta tula Diabulu ti bademo na boloko bamvula 1 000. (Luka 8:31; Kus. 20:1-3) Nsuka-nsuka, Yehowa ta fwa Satana ti bantu na yandi yonso. (Kus. 20:10) Mutindu Yehowa tubaka yo, bo ta niata Satana na ntu. Yandi ta fwa kimakulu.​—Kuy. 3:15; Bar. 16:20.

19. Inki mambote bantu yina ke tudilaka Yehowa ntima ya mvimba ta baka? (Tala mpi kifwanisu.)

¹⁹ Bansadi ya kieleka ya Yehowa ke vingilaka ti nzala ya ngolo ntangu yina bo ta kuma ya kukuka mpi ta zinga na kiese na nsi-ntoto ya mpa yina ke kwisa ntama ve. Luzingu ta vanda kitoko kibeni kuluta mutindu beto lenda yindula. Yehowa ke tuba nde: “Tala! Mono ke sala bima yonso ya mpa.” (Kus. 21:5) Yo ke tendula nki? Yo ta vanda mbala ya ntete yina Satana ti bademo na yandi ta kuka ve kusala bantu mbi to kupusa bo na kusala mambu ya mbi. Yo ta vanda kitoko mpenza. Basusi ya nsi-ntoto yai ta manisa nge diaka ve mpongi sambu yo ta vanda diaka ve. Bantu yina ta guluka na Armagedoni ta mona mambu mingi ya kuyituka. Bantu yina ke bela ta beluka. Diaka, lufutumuku ya bantu yina beto ke zolaka ya me fwaka, ta yantika. Beto ta kuma kuzinga mutindu Tata na beto ya zulu zolaka nde beto zinga.

20. Inki nge fwete sala?

²⁰ Na bilumbu yai ya nsuka, beto fwete kanga ntima na kikesa yonso na bampasi ya me bikala, kutudila Yehowa ntima ya mvimba mpi kupesa maboko na Kimfumu na yandi. Yo yina, beto sala yonso sambu na kumonisa nde beto ke zolaka Tata na beto ya zulu mpi nde Satana kele luvunu. Ya kieleka, beto fwete ndima kibeni nde kana beto ke landa kukangama na Yehowa, Mfumu ya Kuluta Nene, beto ta vanda ti luzingu ya kuluta mbote sambu yandi ke zola kusakumuna bansadi na yandi ya bulemfu mpi yandi ta sala yo kibeni na ntangu ya me fwana.