Bangiufula ya Batangi

Inki ntangu baguvernema ta tuba nde “ngemba mpi lutaninu”?

Mutindu beto me katuka kutubila yo na “Bangiufula ya Batangi” na Nzozulu ya Nkengi ya novembre 2025, ntama mingi ve Yehowa ta tula na bantima ya “bibongo kumi” (baguvernema yonso) ‘ngindu na yandi,’ disongidila nde baguvernema ta pesa ngolo mpi kiyeka na bo na “mbisi . . . ya mfinda ya mbwaki ya ngolo.” Mbisi yango kele Nations Unies. Bo ke bingaka mpi mbisi yai nde “kifwani ya mbisi ya mfinda.” (Kus. 13:14, 15; 17:3, 16, 17) Na nima, ‘bibongo yina kumi’ mpi mbisi yai ya mfinda ya bo me pesa kiyeka ta fwa mabundu yonso ya luvunu na ntoto ya mvimba. Ebuna, keti baguvernema ta tuba nde “ngemba mpi lutaninu”a na ntwala to na nima nde bo fwa mabundu yonso ya luvunu?​—1 Bate. 5:3.

Na bunkufi, beto me zaba mpenza ve nki ntangu baguvernema ta tuba nde “ngemba mpi lutaninu.” Kana beto me zaba mambu yonso ya fioti-fioti, yo ta vanda diaka ve mfunu nde beto landa kukengila. Kansi, Yezu vandaka kusonga balongoki na yandi mbala na mbala nde bo fwete “landa kukengila.” (Mat. 24:42; 25:13; 26:41) Sesepi yai, beto tadila mbote-mbote mambu yina Yehowa sadisaka ntumwa Polo na kusonikila Bakristu ya Tesalonika.

Polo sonikaka nde: “Na ntangu bo ta tuba nde, ‘Ngemba mpi lutaninu!’ ebuna kaka na ntangu yina lufwa ta kwisila bo na kintulumukina.” (1 Bate. 5:2, 3) Mbala mingi, mikanda na beto ke tubaka nde baguvernema ta tuba nde “ngemba mpi lutaninu” ntangu fioti na ntwala nde mpasi ya nene kuyantika. Mpasi yango ta yantika ntangu bo ta fwa Babilone ya Nene, disongidila mabundu yonso ya luvunu. Beto vandaka mpi kutuba nde ntangu baguvernema ta tuba nde “ngemba mpi lutaninu,” pana beto ta zaba nde mpasi ya nene ke zola kuyantika.

Kansi, na nima ya kutadila mbote-mbote mambu yai, yo ke monana nde yo kele mpi ti kima ya nkaka yina beto fwete vila ve. Mbala ya nkaka, baguvernema ta tuba nde “ngemba mpi lutaninu” na nima ya ntangu yina bo ta fwa mabundu ya luvunu. Sambu na nki yo lenda vanda mpidina? Beto tadila mwa bangiufula yai ya ke landa.

Inki mabundu ya luvunu me salaka na bitumba yina me salamaka na ntoto? Biblia ke tuba nde: “Na kati na yandi [“nkento ya nene ya ndumba,” Babilone ya Nene] bo monaka menga ya . . . bantu yonso yina bo me fwaka na ntoto.” (Kus. 17:1, 5; 18:24) Banda ntama, mabundu ya luvunu ke pesaka maboko na bitumba mpi ke salaka nde mubulu kubasika mpi nkutu nde bantu mingi kufwa. Yo ke monisa mpenza nde mabundu yango ke vandaka ve na kisina ya ngemba mpi ya lutaninu, kansi ya bitumba mpi ya mubulu. Yo yina, baguvernema lenda tuba nde “ngemba mpi lutaninu” na nima ya ntangu yina bo ta fwa Babilone ya Nene. Kansi beto me zaba ve mbote-mbote kana yo ta salama mpidina to ve.

Inki ta salama na nima ya ntangu yina baguvernema ta tuba nde “ngemba mpi lutaninu”? Polo ke tuba nde: “Ebuna kaka na ntangu yina lufwa ta kwisila bo na kintulumukina.” (1 Bate. 5:3) Kana baguvernema kutuba nde “ngemba mpi lutaninu” na ntwala nde bo fwa mabundu ya luvunu, pana yo ta lomba nde mwa ntangu kuluta na ntwala nde Yehowa kufwa baguvernema yango. Sambu na nki? Sambu baguvernema fwete fwa ntete mabundu ya luvunu. Kansi sambu Polo ke tuba nde Yehowa ta fwa baguvernema “kaka na ntangu yina” mpi “na kintulumukina,” yo ke monana nde baguvernema lenda tuba nde “ngemba mpi lutaninu” na nima ya ntangu yina bo ta fwa mabundu ya luvunu.

Inki bansadi ya Yehowa ta sala ntangu mambu yai ta salama? Polo ke tuba nde: “Kansi beno bampangi, beno kele ve na mpimpa, sambu mwini kubasikila beno na kintulumukina mutindu yo ke basikilaka miyibi.” (1 Bate. 5:4) Beto yindula fioti: Kana baguvernema me tuba nde “ngemba mpi lutaninu” na nima ya ntangu yina bo ta fwa mabundu ya luvunu, pana bansadi ya Yehowa ta zaba nde kubika fioti yandi ta fwa baguvernema yonso na ntoto. Kansi sambu na baguvernema yango, lufwa ta kwisila bo bonso muyibi, disongidila na kintulumukina sambu bo ta yindula nde bo me tula dezia ngemba na ntoto.

Ebuna, nki beto fwete vila ve? Beto fwete vila ve nde ntama ve, “bibongo kumi” ti mbisi ya mfinda yina baguvernema ta pesa kiyeka ta fwa mabundu yonso ya luvunu. Mpasi ya nene ta yantika na ntangu yina. Beto fwete vila mpi ve nde na ntangu mosi mpidina, baguvernema ta tuba nde “ngemba mpi lutaninu.” Kansi nki kele ntangu yango yina? Beto me bakisa yo na mitindu zole. Ya ntete: Bo lenda tuba nde “ngemba mpi lutaninu” na ntwala nde bo fwa mabundu yonso ya luvunu. Ya zole: Bo lenda tuba yo na nima ya ntangu yina bo ta fwa mabundu ya luvunu. Yo ke lomba kaka nde beto kinga sambu na kumona mambu yina ta salama. Mbala mingi, beto ke bakisaka mbote-mbote baprofesi ya Biblia na ntangu yo ke lungana to na nima ya kulungana na yo.​—Fwanisa ti Yoane 12:16.

Na ntwala nde mambu yai kusalama, kima ya kuluta mfunu sambu na beto kele kukangama kaka na Nzambi kansi ve kuzaba ntangu yina baguvernema ta tuba nde “ngemba mpi lutaninu.” Beto fwete ‘kangula meso mpi kutanina mabanza na beto’ sambu beto vanda ya kuyilama, yo vanda mambu yango kusalama nki mutindu.​—1 Bate. 5:6.