Keti Nge Ke Yibuka?
Keti nge tangaka na dikebi yonso masolo ya Banzozulu ya Nkengi ya mvula yai? Tala kana nge lenda pesa bamvutu na bangiufula yai:
Sambu na nki beto ke pesaka Yehowa nkembo?
Beto ke pesaka Yehowa nkembo sambu beto ke zitisaka yandi mingi mpi ke zolaka yandi mingi. Beto ke pesaka mpi Yehowa nkembo sambu beto ke zolaka nde bantu kuzaba yandi.—w25.01, lutiti 3.
Kana muntu mosi me tuba to me sala kima mosi ya me pesa beto mpasi, nki mutindu beto lenda monisa nde beto me lolula yandi na ntima ya mvimba?
Beto ke salaka ve bonso nde mambu ya mbi yina bo me sadila beto me pesa beto ve mpasi; kansi, kana beto ke kangila ve bantu makasi, beto ta bika ve nde ntima na beto kupusa beto na kusadila bo mambu ya mbi.—w25.02, balutiti 15-16.
Sambu na nki Marko kele mbandu ya mbote sambu na bampangi-babakala ya baleke?
Marko ndimaka kudipesa na kisalu ya Yehowa mpi kusadisa bantu. Ntangu Marko kutanaka ti diambu mosi ya mpasi, ntembe kele ve nde yo yangisaka yandi mpi yo pesaka yandi mpasi mingi. Kansi yandi bikaka ve nde yo lembisa yandi nitu. Nkutu yandi kumaka nduku ya ngolo ya Polo mpi ya bampangi ya nkaka ya kuyela na kimpeve.—w25.04, lutiti 27.
Yezu zolaka kutuba nki ntangu yandi tubaka na kisambu nde: “Mono me zabisaka bo zina na nge”? (Yoane 17:26)
Balongoki ya Yezu zabaka dezia zina ya Nzambi. Kansi Yezu sadisaka balongoki na yandi na kuzaba mbote-mbote kibeni kimuntu ya Yehowa, disongidila mambu yina Yehowa ke kana kusala sambu na ntoto mpi sambu na bantu, mambu yina yandi me salaka, yina yandi ta sala mpi bikalulu na yandi.—w25.05, balutiti 20-21.
Kana beto kele bantu ya kudikulumusa, nki beto fwete ndima?
Beto fwete ndima nde beto me zaba ve mambu ya nkaka. Mu mbandu, beto ke zabaka ve ntangu yina nsuka ta kwisa to mutindu Yehowa lenda sadisa beto na ntangu yango. Beto ke zabaka mpi ve mambu yina ta salama mbasi. Diaka, beto lenda bakisa ve mbote-mbote mutindu Yehowa ke zabaka beto.— w25.06, balutiti 15-18.
Inki beto lenda sala sambu na kubaka mambote na disolo mosi to na diskure ya bantu yonso?
Beto lenda kudiyula nde: ‘Inki bangindu bo me sadila sambu na kusadisa bantu na kundima dilongi yai ya Biblia? Keti yo kele ti mbandu mosi ya mbote yina beto lenda sadila ntangu beto ke longa muntu mosi dilongi yai? Dilongi yai lenda sepedisa nani mpi nki ntangu beto lenda songa yandi yo?’—w25.07, lutiti 19.
Mutindu Nzambi lolulaka Davidi ke longa beto nki?
Ata Davidi salaka masumu ya nene, Yehowa lolulaka yandi ntangu yandi balulaka ntima na masonga yonso. (1 Bant. 9:4, 5) Ntangu Yehowa ke lolulaka beto, yandi ke vilaka kibeni masumu na beto, disongidila yandi ta pesa beto diaka ve ndola sambu na yo na bilumbu ke kwisa.—w25.08, lutiti 17.
Inki nge lenda sala kana longoki mosi ya Biblia ke bakisa ve kima mosi?
Kana yandi ke bakisa ve kima mosi ata nge me tendudila yandi yo mbote-mbote na Biblia, beno lenda luta yo mpi kuvutukila yo na nima.—w25.09, lutiti 24.
Biblia ke tubaka nde disumu kele ti ‘kiyeka yina ke kusaka.’ (Baeb. 3:13) Yo ke tendula nki?
Disumu to kukonda kukuka lenda pusa beto na kusala mambu ya mbi. Yo lenda pusa beto mpi na kukuma ti badute, mu mbandu kupusa beto na kuyindula nde Yehowa ke zolaka beto ve.—w25.10, lutiti 16.
Inki mambu tatu lenda sadisa beto na kusamba Yehowa na ntima ya mvimba?
(1) Beto lenda yindula mingi bikalulu ya Yehowa. (2) Beto lenda yindula mambu yina beto ke kutana ti yo mpi kusonga yo Yehowa, mu mbandu beto lenda lomba yandi na kusadisa beto na kulolula muntu mosi. (3) Beto fwete samba ve zulu-zulu. Yo ta sadisa beto na kusonga Yehowa mambu mingi yina kele na ntima na beto.—w25.10, balutiti 19-20.
Inki mutindu beto lenda sadisa minunu?
Beto lenda kwenda kutala minunu to kubinga bo na telefone. Beto lenda fidisa bo mpi na opitale. Diaka, beto lenda longa mpi ti bo nsangu ya mbote na mitindu mingi.—w25.11, balutiti 6-7.
Inki beno lenda sala sambu na kusala makwela yina ta pesa Yehowa lukumu?
Beno zitisa bansiku ya Leta sambu na makwela. Beno sala yonso sambu makwela na beno kumonisa bikalulu ya mbuma ya mpeve santu ya Nzambi. Beno vanda ya kudikulumusa na mutindu na beno ya kulwata mpi beno sala yonso sambu na kulanda ve bakutime yina ke wakana ve ti Biblia. Beno solula mbote ntangu beno ke yidika makwela.—w25.12, balutiti 21-24.