Bangogo “Disu Sambu na Disu” Ke Tendula Inki?

Mvutu ya Biblia

Nsiku “disu sambu na disu” vandaka na kati ya Nsiku yina Nzambi pesaka Moize na kupesa bana ya Izraele. Yezu vutukilaka yo na disolo yina yandi salaka na zulu ya ngumba. (Matayo 5:38; Kubasika 21:24, 25; Kulonga 19:21) Yo vandaka kutendula nde kana bo ke pesa muntu ndola sambu na kima ya mbi yina yandi salaka, ndola yina fwete vanda kiteso mosi ti mambu yina yandi me sala.a

Bo vandaka kusadila yo kana muntu me lwadisa muntu ya nkaka na luzolo yonso. Sambu na ndola yina muntu ya me sala mpidina fwete baka, Nisku ya Moize vandaka kutuba nde: “Kubuka sambu na kubuka, disu sambu na disu, dinu sambu na dinu, bo ta pesa yandi mpasi ya mutindu mosi ti yina yandi pesaka muntu ya nkaka.”—Levi 24:20.

Sambu na nki Nzambi pesaka nsiku “disu sambu na disu”?

Nsiku “disu sambu na disu” vandaka ve kupesa muntu nswa ya kusala muntu ya nkaka kima yina yandi me sala yandi. Kansi Nzambi pesaka yo sambu na kusadisa bazuzi na kuzenga mambu na mutindu ya me fwana, sambu bo vanda ve nku mingi to bo bika makambu kaka mpidina.

Katula yo, bo pesaka yo mpi sambu na kukanga muntu yina ke zola kuvutula mbi nzila ya kuvutula mbi. Nsiku vandaka kutendula nde: “Bantu yina me bikala [disongidila bantu yina vandaka kumona mutindu bo ke sadila lunungu ya Nzambi] ta wa mambu yai mpi ta wa boma, ebuna bo ta salaka diaka ve ata fioti diambu ya mbi ya mutindu yai na kati na beno.”—Kulonga 19:20.

Keti Bakristu fwete sadila mpi nsiku “disu sambu na disu”?

Ve. Nsiku yai vandaka na kati ya bansiku yina Nzambi pesaka Moize. Bansiku yina Nzambi pesaka Moize manaka ngala ntangu Yezu pesaka kimenga ya luzingu na yandi.—Baroma 10:4.

Kansi nsiku yina ke sadisa beto na kuzaba mbote-mbote mutindu Nzambi ke tadilaka mambu. Mu mbandu, yo ke monisaka nde Nzambi ke zolaka lunungu. (Nkunga 89:14) Yo ke monisaka mpi nde sambu na Nzambi, muntu yina me sala mbi fwete baka ndola “na kiteso yina me fwana.”—Yeremia 30:11.

Bangindu ya luvunu sambu na nsiku “disu sambu na disu”

Ngindu ya luvunu: Nsiku “disu sambu na disu” vandaka nsiku mosi ya nku.

Diambu ya kieleka: Nsiku yai vandaka kupesa ve bazuzi nswa ya kusadila lunungu na mutindu ya kuluta ndilu. Kansi, ntangu bazuzi vandaka kusadila yo na mutindu ya mbote, bo vandaka kupesa muntu yina me sala mbi ndola kaka na nima ya kutadila mbote-mbote mutindu mambu salamaka mpi kuzenga kana muntu yango salaka kibeni mambu yina na luzolo yonso (Kubasika 21:28-30; Kutanga 35:22-25) Nsiku “disu sambu na disu” vandaka kusadisa bazuzi na kupesa ve ndola ya kuluta ngolo.

Ngindu ya luvunu: Nsiku “disu sambu na disu” vandaka kupesa bantu nswa ya kusala kaka mbi kukonda nsuka.

Diambu ya kieleka: Nsiku ya Moize vandaka kutuba nde: “Nge fwete vutula ve mbi to kubumbila bana ya bantu na nge kimbeni na ntima.” (Levi 19:18) Nsiku yina vandaka ve kupesa bantu nswa ya kuvutula mbi, kansi na kutudila Nzambi ntima mpi na kutula ntima na mambu ya kusambisa yina Nzambi yidikaka sambu na kuyidika mambu ya mbi kana yo me salama.—Kulonga 32:35.

Yezu me sungika ngindu mosi ya mbi

Yezu zabaka nde bantu ya nkaka vandaka ve kutendula nsiku “disu sambu na disu” mbote. Yandi vutulaka bo na nzila ntangu yandi tubaka nde: “Beno waka bo tubaka nde: ‘Disu sambu na disu mpi dinu sambu na dinu.’ Kansi mono ke tubila beno nde: Beno nwana ve ti muntu yina kele muntu ya mbi, kansi konso muntu yina ke bula nge mbata na ditama ya kitata, pesa yandi mpi ditama yina ya nkaka.”—Matayo 5:38, 39.

Tadila bangogo “beno waka bo tubaka nde.” Bangogo yina ke monisa nde mbala ya nkaka Yezu vandaka kutubila bamfumu ya nkaka ya mabundu ya Bayuda yina vandaka kupusa bantu na kuvutula mbi na mbi. Adam Clarke muntu mosi ya mayele ya ke tadilaka mambu ya Biblia sonikaka nde: “Yo ke monana nde Bayuda sadilaka nsiku yai [disu sambu na disu] . . . bonso kikuma ya kupesa bantu nzila ya kukangila bantu kimbeni mpi ya kusala mambu na nku.” Mutindu bamfumu ya mabundu ya Bayuda vandaka kusala mpidina, bo vandaka kupesa Nsiku ya Nzambi ntendula mosi ya mbi.—Marko 7:13.

Kansi Yezu monisaka na pwelele yonso nde ngindu yina vandaka na Nsiku yina ya Nzambi vandaka ngindu ya vandaka kumonisa nde Nzambi kele zola. Yandi tubaka nde: “‘Nge fwete zola Yehowa Nzambi na nge . . .’ Yai nsiku ya kuluta nene mpi ya ntete. Ya zole, ya me fwanana ti yo, yo yai: ‘Nge fwete zola nkweno na nge bonso nge mosi.’ Nsiku yonso . . . me simbama na bansiku yai zole.” (Matayo 22:37-40) Yezu longaka nde zola kele kikalulu yina fwete sadisa bantu na kuzaba balongoki na yandi ya kieleka, kansi ve nzala ya kuvutula mbi na mbi.—Yoane 13:34, 35.

a Yo kele nsiku na mambu ya kusambisa. Bo vandaka mpi kubinga yo nsiku ya talion. Bo vandaka kusadila nsiku yango na babwala ya nkaka na ntangu ya ntama.