Bamvutu na Bangiufula ya Biblia / Dibuta / Keti Biblia Lenda Sadisa Mono na Kuvanda ti Dibuta ya Kiese?

Mvutu ya Biblia

Ee. Yai kele bandongidila yina kele na Biblia mpi ya me sadisaka dezia bamilio ya bantu na kuvanda ti dibuta ya kiese:

1. Sonikisa makwela na leta. Lusilu ya makwela yina bantu ke salaka na leta kele mfunu sambu na kuvanda ti dibuta ya kiese.​—Matayo 19:4-6.

2. Monisa zola mpi luzitu. Yo ke tendula kusadila nkwelani na nge mambu na mutindu yina nge ke zolaka nde bo sadila nge mambu.​—Matayo 7:12; Baefezo 5:25, 33.

3. Buya bangogo ya mbi. Tuba na mawete, ata nkwelani na nge me tuba to yandi me sala kima mosi ya me pesa nge mpasi. (Baefezo 4:31, 32) Na Bingana 15:1, Biblia ke tuba nde: “Mvutu ya pima ke manisaka nganzi, kansi ngogo ya nku ke tedimisaka makasi.”

4. Kangama kaka na nkwelani na nge. Mambu ya me tala zola mpi kuvukisa nitu, nge fwete monisa yo kaka na nkwelani na nge. (Matayo 5:28) Biblia ke tuba nde: “Bika makwela kuvanda ya lukumu na meso ya bantu yonso, mpi mbeto ya makwela kuvanda kukonda mvindu.”​—Baebreo 13:4.

5. Longa bana na nge na zola. Kukanga ve meso na mambu ya mbi kansi kuvanda mpi ve makambu ngolo.​—Bingana 29:15; Bakolosai 3:21.