Ntoto ya Mvimba Ta Kuma na Ngemba Ntama Ve

Konso muntu ke zolaka kuzinga na nsi-ntoto mosi ya ngemba. Banda ntama kibeni, bantwadisi ya ntoto ke salaka bikesa sambu na kumanisa bitumba mpi ntoto kuvanda na ngemba. Bantangu ya nkaka, yo me simbaka kansi sambu na ntangu fioti mpamba. Kansi na nima, bantu ke yantikaka diaka kunwana. Keti ngemba ta kotaka kibeni na ntoto? Ee. Sambu na kuzaba mutindu ntoto ya mvimba ta kuma na ngemba, tala mambu Yezu ta sala mpi mambu yina yandi longaka.

Mambu yina Yezu ta sala

Biblia ke songa beto mambu yina Yezu ta sala ntama ve sambu na kutula ngemba na ntoto.

• “Bo ta bingaka [Yezu]. . . Mfumu ya Ngemba. Luyalu na yandi ta yalamuka mpi ta vanda na ngemba kukonda nsuka.” (Yezaya 9:6, 7) Yezu kele Mfumu ya Kimfumu ya Nzambi. Yandi ta sala nde ntoto kuvanda na ngemba ya kukonda nsuka.

• “Yandi ta gulusa nsukami yina ke dila sambu na kulomba lusadisu . . . konso muntu yina me konda nsadisi.” (Nkunga 72:12-14) Yezu ta sadila kiyeka na yandi sambu bo sadila bantu yonso mambu ya mbote. Mpidina bitumba ta vanda diaka ve. Mubulu mpi mpasi ta vanda diaka ve.

• “Dikanda mosi ta nunga ve mbele ya bitumba sambu na kunwanisa dikanda ya nkaka, bo ta longuka mpi diaka ve bitumba.” (Yezaya 2:4) Ntangu Yezu ta yala ntoto, bantu yonso ta longuka mutindu ya kuzinga nga ngemba na kisika ya kunwana.

Sambu na kuzaba mambu yina Yezu ta sala sambu na kukotisa ngemba na ntoto na bilumbu ke kwisa mpi mutindu nge lenda zinga mvula na mvula na ntoto, tala video Kimfumu ya Nzambi Kele Inki?

Mambu yina Yezu longaka

Bubu yai dezia, mambu yina Yezu longaka ke sadisa bamilio ya bantu na kuzinga na ngemba. Yezu salaka diskure mosi na zulu ya ngumba. Na diskure yango, yandi longaka bansiku ya Biblia yina ke sadisaka bantu na kuzinga konso kilumbu na ngemba. Beto tadila mwa bambandu yai.

• “Kiese na bantu yina ke tulaka ngemba.” (Matayo 5:9) Yezu longaka balongoki na yandi nde bo fwete vanda ve na mavwanga ti bantu ya nkaka mpi nde bo fwete vanda bantu yina ke tulaka ngemba.

• “Ntete, tula ngemba ti mpangi na nge, na nima ntangu nge ta vutuka, pesa dikabu na nge.” (Matayo 5:23, 24) Yezu songaka balongoki na yandi nde bo fwete manisaka makambu nswalu. Yandi longaka bo nde kana bo ke zola kuvanda ti kinduku ya mbote ti Nzambi, bo fwete zinga na ngemba ti bantu ya nkaka.

• “Beno bika kusambisa sambu bo sambisa beno ve.” (Matayo 7:1) Yezu tubaka nde beto fwete vanda ve makambu ngolo ntangu beto ke sambisa bankaka to kulomba bo na kusala mambu yina beto mosi, beto ke salaka ve. Kusala mpidina ke nataka mavwanga. Yezu longaka nde na kisika ya kutuba mbi sambu na bantu ya nkaka, beto fwete “landa na kulolula” mambu ya mbi yina bo ke sala beto.—Luka 6:37.

Na ntoto ya mvimba, bantu ke sadila mambu yina Yezu longaka. Yo vanda na bisika yina mavwanga mpi bitumba ke salama, bantu ke longuka mutindu bo lenda manisa mavwanga kukonda makasi, mutindu bo lenda lolula bankaka, mpi mutindu bo lenda monisa nde bo ke zolaka bantu ya nkaka kana bo ke sadila bo mambu ya mbi.

Sambu na kuzaba mutindu mambu yina Yezu longaka me sadisaka bantu ya nkaka na kuzinga na ngemba, tanga disolo “Mutindu Nge Lenda Vanda na Ngemba Ata Bitumba mpi Mubulu Ke Salama.”