Bambisi Me Kuma Fioti na Kutadila Mingi Yina yo Vandaka Bamvula 50 Me Luta​—Inki Biblia Ke Tuba?

Na Kitatu 9 octobre 2024, kimvuka mosi (Fonds mondial pour la nature) basisaka rapore mosi ya ke tubila mambu ya mpasi yina ke kumina bambisi sambu na mambu yina bantu ke sala. Rapore yango ke pesa mpasi. Yo ke monisa nde “na bamvula 50 ya me luta (1970-2020), ntalu ya bambisi me kulumuka tii na kiteso ya mbisi mosi na kisika ya bambisi iya na kutadila mingi ya bambisi yina vandaka ntete.” Rapore yango ke kebisa nde: “Beto lenda tuba kukonda kulutisa ndilu nde, mambu yina ta salama na bamvula tanu ya ke kwisa ta monisa kana luzingu ta vanda inki mutindu na Ntoto.”

Yo me fwana nde bantu kuwa mpasi sambu na barapore ya mutindu yai. Beto ke zolaka ntoto na beto yai. Yo kele kitoko. Beto ke zolaka ve ata fioti kumona mutindu bambisi ke niokwama. Beto ke kudiwa mutindu yina sambu Nzambi pesaka beto mukumba ya kukeba bambisi.​—Kuyantika 1:27, 28; Bingana 12:10.

Nge lenda kudiyula nde, ‘Keti beto ta kuka kutanina bambisi yina kele awa na ntoto? Inki Biblia ke tuba?’

Kivuvu sambu na bilumbu ke kwisa

Yo vanda beto sala inki sambu na kutanina bambisi, Nzambi mpamba muntu lenda tanina yo. Na Kusonga 11:18, Biblia ke tuba nde Nzambi ta ‘bebisa bantu yina ke bebisaka ntoto.’ Verse yai ke longa beto mambu zole:

1. 1. Nzambi ta kanga kimakulu bantu yina ke bebisa ntoto to ke fwa yo nzila.

2. 2. Nzambi ta yidika mambu ntama ve. Beto me zaba yo nki mutindu? Sambu bubu yai, kingosa mosi kele. Bantu ta fwa bambisi mingi kuluta na bilumbu ya me luta.

Inki Nzambi ta sala sambu na kumanisa mambu yai? Yandi ta sadila luyalu na yandi ya kele na zulu to Kimfumu na yandi, sambu na kuyala ntoto ya mvimba. (Matayo 6:10) Luyalu yina ta pesa bantu malongi mpi formasio yina bo kele ti yo mfunu sambu na kukeba bambisi ya kele na ntoto mpi kutanina yo.​—Yezaya 11:9.