Inki Lenda Sadisa Beto na Kubakisa Bambandu Yina Kele na Biblia?

Biblia ke sadilaka bambandu mingi mpi yo ke vandaka mpasi sambu na bantu ya nkaka na kubakisa bambandu yango. (Mat. 13:13) Inki lenda sadisa nge na kubakisa mbote-mbote bambandu ya kele na Biblia? Sala mambu yai:

• Sosa kubakisa mbote-mbote nki bo ke tubila mpi nki mutindu bo me fwanisa yo. Mu mbandu, Kusonga 3:3 ke fwanisa kukwisa ya Yezu (kima ya bo ke tubila) bonso muyibi (mbandu ya bo ke fwanisa ti yo).

• Sosa kubakisa kuwakana yina kele na kati na yo. Sosa kuzaba sambu na nki bo me fwanisa kima mosi ya bo ke tubila ti mbandu mosi mpi nki kuwakana kele na kati na yo.

• Sosa kuzaba kana nge me bakisa mbote-mbote bambandu yina Biblia ke sadila. Bantangu ya nkaka muntu lenda bakisa ve mbote-mbote mbandu yina Biblia me sadila. Na mbandu ya beto me katuka kutubila, Yezu ta kwisa ve sambu na kuyiba kima mosi kansi yo ke monisa nde yandi ta kwisa na kintulumukina, disongidila na ntangu yina bantu ke yindula ve.