Bangiufula ya Batangi
Inki ntangu kisalu ya kulonga nsangu ya mbote ta suka?
Yezu tubaka nde: “Mpi bo ta samuna nsangu yai ya mbote ya Kimfumu na ntoto ya mvimba sambu na kuta kimbangi na makanda yonso, ebuna nsuka ta kwisa.” (Mat. 24:14) Ngogo ya Kigreki ya bo me balula nde “nsuka” na verse yai, na verse 6 mpi na 13 kele “teʹlos.” Yo ke ntendula nsuka ya nsi-ntoto ya Satana na Armagedoni. (Kus. 16:14, 16) Yo ke monisa nde beto ta landa kulonga nsangu ya mbote tii na ntwala nde nsuka yai kukwisa. Mambu yai ke sadisa beto na kusoba mutindu beto vandaka kuyindula ntete.
Ntete, beto vandaka kuyindula nde beto ta bika kulonga nsangu ya mbote ntangu mpasi ya nene ta yantika ntangu bo ta fwa Babilone ya nene. (Kus. 17:3, 5, 15, 16) Beto vandaka kuyindula nde mambu yai ta vanda nsuka ya “mvula ya luzolo ya mbote ya Yehowa.” Disongidila nde ntangu mpasi ya nene ta yantika, Yehowa ta pesa diaka ve bantu dibaku ya kundima nsangu ya mbote. (Yez. 61:2) Beto vandaka mpi kuyindula nde bantu yina ta guluka na mpasi ya nene kele bantu yina vandaka kusadila Yehowa na ntwala nde mpasi yango kuyantika. Beto vandaka kufwanisa bo ti Bayuda yina gulukaka ntangu bo fwaka Yeruzalemi na 607 na ntwala ya ntangu na beto. Bo tulaka bantu yango kidimbu ya kuguluka na ntwala sambu bo vandaka kusambila Yehowa mpi kumenga mambu ya mbi. (Ezek. 5:11; 9:4) Kansi mambu yai ke wakana ve ti mambu yina Yezu tubaka na Matayo 24:14, yina ke monisa nde bantu lenda zwa dibaku ya kuwa nsangu ya mbote tii na ntwala nde nsuka kukwisa na Armagedoni.
Mutindu beto me kuma kubakisa Matayo 24:14 ke sadisa beto mpi na kusoba mutindu beto ke bakisaka Kusonga 16:21, yina ke tubila nsangu yina kele bonso mvula ya nene ya matadi. Na nima ya kutadila yo mbote-mbote, beto me bakisa nde baverse yai zole ke wakana. Sambu na nki beto ke tuba mpidina? Kima ya ke sadisa beto kele mambu yina Biblia ke tubaka ya me tala mutindu bantu ke tadilaka nsangu ya Kimfumu. Ntumwa Polo sonikaka nde nsangu ya mbote “kele nsudi ya kitoko ya luzingu” sambu na “bantu yina ke guluka,” kansi yo kele “nsudi ya lufwa” to nsangu ya mbi sambu na bambeni ya Nzambi. (2 Bak. 2:15, 16) Bambeni ya Nzambi ke mengaka nsangu ya mbote ya Kimfumu, sambu yo ke monisaka nde nsi-ntoto yai kele mbi, Satana muntu ke yalaka yo mpi yo ta fwa ntama ve.—Yoa. 7:7; 1 Yoa. 2:17; 5:19.
Kuvila mpi ve nde “mvula ya nene ya matadi” yina Kusonga 16:21 ke tubila ta vanda ya “kuluta ngolo kibeni.” Mbala ya nkaka yo ke tendula nde na mpasi ya nene beto ta longa mingi nsangu ya mbote ti kikesa mingi kuluta mpi yo ta sala nde zina ya Nzambi kuzabana na mutindu yina yo me zabanaka ntete ve. (Ezek. 39:7) Keti na ntangu yina, disongidila na nima ya ntangu yina bo ta fwa Babilone ya Nene, bantu ya nkaka ta sepela ti nsangu ya mbote kaka mutindu bo ke sepelaka ti nsudi ya kitoko? Yo lenda vanda mutindu yina. Mbala ya nkaka bo lenda yibuka to kulonguka nde Bambangi ya Yehowa vandaka kutubila dezia banda ntama nde bo ta fwa mabundu ya luvunu mpi bo ta bakisa nde bo ke mona bo mosi mutindu yo ke lungana.
Mambu yai ke wakana kibeni ti mambu yina salamaka na Ezipte na nima ya Bandola Kumi. Na nima ya ntangu yina Yehowa ‘sambisaka banzambi yonso ya Ezipte mpi pesaka bo ndola, . . . kimvuka mosi ya nene ya bantu ya mutindu na mutindu’ yina vandaka ve bantu ya Izraele, vukanaka ti bo. (Kub. 12:12, 37, 38) Mbala ya nkaka bo landaka bantu ya Izraele ntangu bo monaka mutindu mambu yina Moize tubaka sambu na Bandola Kumi lunganaka kibeni.
Konso muntu yina ta landa Yehowa na nima ya lufwa ya Babilone ya Nene ta vanda ti dibaku ya kusadisa bampangi ya Yezu yina ta vanda awa na ntoto. (Mat. 25:34-36, 40) Ya kieleka, bantu ta vanda diaka ve ti dibaku ya kukuma mameme ya Yehowa ntangu fioti na ntwala nde Armagedoni kuyantika, disongidila ntangu Bakristu yina bo me tulaka mafuta yina ta vanda awa na ntoto ta mata na zulu.
Nsoba yai ya mpa ke monisa kibeni zola ya Yehowa mpi kikalulu na yandi ya kuwila bantu mawa. Ya kieleka, Yehowa “ke zola ve nde ata muntu mosi kufwa kansi yandi ke zola nde bantu yonso kubalula ntima”—2 Pie. 3:9.