Batoko, Yehowa Tavila Ve Kisalu na Beno!
“Nzambi ke salaka bantu mbi ve, kansi yandi ke salaka bo mbote. Yandi ta vila ve kuzola ya ntima yina ya beno ke songaka yandi na bisalu ya beno salaka ti ya beno ke sala diaka na bampangi na beno bakristo.”—BAEBREO 6:10.
1. Inki mutindu mukanda ya Biblia ya Baebreo mpi ya Malashi kemonisa nde Yehowa kebakaka kisalu na nge na valere?
KETI nge mesalaka dezia kima mosi ya mbote sambu na nduku mosi kansi yandi monisaka ve ntonda ntangu yandi bakaka yo? Yo lenda vanda mpasi mingi kana muntu memona kima ya nge sadilaka yandi mpamba, to kuluta dyaka, yandi mevila yo kibeni. Kansi, yo kele luswaswanu kibeni ntangu beto kesadilaka Yehowa na ntima na beto ya mvimba! Biblia ketuba nde: “Nzambi ke salaka bantu mbi ve, kansi yandi ke salaka bo mbote. Yandi ta vila ve kuzola ya ntima yina ya beno ke songaka yandi na bisalu ya beno salaka ti ya beno ke sala diaka na bampangi na beno bakristo.” (Baebreo 6:10) Yindula nki dyambu yai ketendula. Yehowa tamona yo bonso yandi mekonda lunungu to yandi mesumuka kana yandi vila mambu yina nge salaka mpi yina nge kelanda na kusala na kisalu na yandi. Yandi kele mpenza Nzambi ya ntonda!—Malashi 3:10.
2. Inki kekumisaka kusadila Yehowa kima mosi ya sipesiali?
2 Nge kele na dibaku mosi ya nene ya kusambila mpi kusadila Nzambi yai ya mezaba kupesa ntonda. Sambu bampangi na nge Bakristu kele kaka bamilio sambanu na kati ya bamiliare sambanu ya bantu ya kele na ntoto ya mvimba, ya kyeleka, nge kele ti dibaku mosi ya nene yina bantu yankaka kele na yo ve. Dyaka, mutindu nge kewidikilaka mpi nge kendimaka nsangu ya mbote kele nzikisa ya kemonisa nde Yehowa ketudilaka nge dikebi. Nkutu, Yezu kutubaka nde: “Ata muntu mosi ve lenda kwisa na mono kana Tata yina tindaka mono me benda yandi ve.” (Yoane 6:44) Ya kyeleka, Yehowa kesadisaka muntu mosimosi na kubaka mambote ya kimenga ya Kristu.
Monisa Ntonda na Dibaku na Nge ya Nene
3. Inki mutindu bana ya Kore kumonisaka ntonda sambu na dibaku ya bo vandaka na yo ya kusadila Yehowa?
3 Mutindu disolo ya meluta kutubilaka yo, nge kele na kiyeka mosi ya nene ya kusepedisa ntima ya Yehowa. (Bingana 27:11) Yai kele dyambu mosi ya nge fwete mona ve mpamba ata fyoti. Na nkunga mosi ya kupemama, bana ya Kore kumonisaka ntonda na bo sambu na dibaku ya bo vandaka na yo ya kusadila Yehowa. Beto ketanga nde: “Kilumbu mosi na nzo na nge kele mbote kuluta bilumbu mile na kisika ya nkaka. Mbote nkutu mono telama penepene na kielo ya nzo na nge Nzambi na mono, kansi mbote ve na kuzinga na banzo ya bantu ya mbi.”—Nkunga 84:11.
4. (a) Inki lenda nata bantu yankaka na kumona lusambu ya Yehowa bonso kima mosi ya kekangaka bantu nzila? (b) Na nki mutindu Yehowa kemonisaka mpusa na yandi ya ngolo ya kumona mpi kupesa matabisi na bansadi na yandi?
4 Keti nge mpi kekudiwaka mutindu yina sambu na dibaku ya nge kele na yo ya kusadila Tata na nge ya zulu? Ya kyeleka, bantangu yankaka yo lenda monana bonso nde lusambu ya Yehowa ketula ndilu na kimpwanza na nge. Yo ke masonga nde kusadila minsiku ya Biblia na luzingu kelombaka kusala bibansa. Kansi, kyeleka kele nde konso kima yina Yehowa kelombaka nge na kusala kevandaka sambu na mambote na nge. (Nkunga 1:1-3) Dyaka, Yehowa kemonaka bikesa na nge mpi yandi kemonisaka ntonda na yandi sambu na kwikama na nge. Yo yina Polo kusonikaka nde Yehowa “ke pesaka matabisi na bantu yina ke sosaka yandi.” (Baebreo 11:6) Yehowa kesosaka mabaku ya kusala dyambu yai. Profete mosi ya lunungu na Izraele ya ntama kutubaka nde: “Mfumu Nzambi ke talaka bantu yonso ya nsi-ntoto ya mvimba sambu na kusadisa bayina me kudipesaka na yandi mpenza.”—2 Bansangu 16:9.
5. (a) Tanga mutindu mosi ya kuluta mbote na kati ya mitindu ya nge lenda monisa nde ntima na nge yonso kele na Yehowa. (b) Sambu na nki kusolula ti bantu yankaka mambu yina metala lukwikilu na nge lenda monana mpasi?
5 Mosi na kati ya mitindu ya mbote ya nge lenda monisa nde ntima na nge yonso kele na Yehowa kele kusolula ti bankaka mambu yina metala yandi. Keti nge mezwaka dezia okazio ya kusolula ti banduku na nge ya nzo-nkanda sambu na yina metala lukwikilu na nge? Ntetentete, kusala yo lenda monana mpasi, mpi ngindu kibeni ya kusala yo lenda pesa kamwa boma. Nge lenda kudiyula nde: ‘Ebuna kana bo seka mono? A kana bo tuba nde dibundu na mono kele ya luvunu?’ Yezu kundimaka nde bantu yonso ve tandima na kuwa nsangu ya Kimfumu. (Yoane 15:20) Kansi, yo ketendula ve nde na luzingu na nge ya mvimba bantu tasekaka nge mpi kubuya mambu ya nge tazabisaka bo. Bambangi mingi ya batoko mekutanaka ti bantu yina kundimaka na kuwa bo mpi nkutu banduku na bo kezitisaka bo mingi kibeni sambu na mutindu bo kekangamaka ngolo na malongi na bo.
“Yehowa Tasadisa Nge”
6, 7. (a) Inki mutindu mwana-nkento mosi ya bamvula 17 kutaka kimbangi na banduku na yandi ya nzo-nkanda? (b) Inki dilongi nge mebaka na eksperiansi ya Jennifer?
6 Kansi nki mutindu nge lenda baka kikesa ya kutuba mambu yina metala lukwikilu na nge? Keti nge lenda ve kubaka lukanu ya kutuba na masonga yonso ntangu bantu keyula nge bangyufula yina metala dibundu na nge? Tala eksperiansi ya Jennifer yina kele na bamvula 17. Yandi ketuba nde: “Mu vandaka kudya madya ya midi na nzo-nkanda. Bana-bankento yina vandaka mesa mosi ti mono yantikaka kuta masolo ya dibundu, mpi mwana-nkento mosi na kati na bo kuyulaka mono dibundu na mono.” Keti Jennifer kuwaka boma na kupesa mvutu? Yandi kendima nde: “Ee, sambu mu zabaka ve nki mbuma yo zolaka kubuta.” Ebuna nki Jennifer kusalaka? Yandi kelanda na kutuba nde: “Mu zabisaka bana-bankento yango nde mu kele Mbangi ya Yehowa. Ntete bo yitukaka. Yo monanaka bonso bo vandaka yindula nde Bambangi ya Yehowa kele bantu ya luvunu. Yo pusaka bo na kuyula mono bangyufula mingi, mpi yo sadisaka mono na kutendudila bo mbotembote mwa bangindu ya mbi yina bo vandaka na yo. Ata na nima ya kilumbu yina, bana-bankento yankaka vandaka kwisa kuyula mono ngyufula mosi mbala na mbala.”
7 Keti Jennifer kusepilaka ve mutindu yandi sadilaka dibaku yina sambu na kutubila malongi ya dibundu na yandi? Mvutu kele nde ve! Yandi ketuba nde: “Mu vandaka na kyese kibeni na nsuka ya madya ya midi. Ntangu yai bana-bankento yai mebakisaka mbotembote Bambangi ya Yehowa kele banani.” Jennifer kepesa ndongisila mosi ya kele mpasi ve na kusadila: “Kana nge kekuka ve kuta kimbangi na bana ya nzo-nkanda to na balongi, sala kisambu mosi ya nswalunswalu. Yehowa tasadisa nge. Nge tasepila na kumona nde nge mesadila mbote dibaku na nge na kuta kimbangi.”—1 Piere 3:15.
8. (a) Inki mutindu kisambu kusadisaka Nehemia ntangu yandi kutanaka ti dyambu mosi ya kintulumukina? (b) Na nzo-nkanda, inki mwa mambu yina lenda pusa nge na kusala na nsi ya ntima kisambu mosi ya nkufi na Yehowa?
8 Simba nde Jennifer kelongisila ‘kusala kisambu mosi ya nswalunswalu’ na Yehowa ntangu dibaku memonana ya kuta kimbangi na yina metala lukwikilu na nge. Yo yai kibeni dyambu ya Nehemia, yina vandaka kusala kisalu ya kutula malafu na dikopa ya Ntotila Artazeresesi, kusalaka ntangu yandi kutanaka ti dyambu mosi ya yandi vandaka kuvingila ve. Nehemia vandaka kumonika mawa-mawa sambu bo zabisaka yandi nde Bayuda vandaka kumona mpasi mpi ntangu yandi waka nde kibaka ti bakyelo ya Yeruzalemi vandaka ya kubwa. Ntotila kumonaka nde Nehemia kuvandaka ve na kyese, yo yina yandi yulaka Nehemia kikuma yandi vandilaka mutindu yina. Na ntwala ya kupesa mvutu, Nehemia kusambaka sambu na kulomba lutwadisu. Ebuna yandi lombaka na kikesa yonso nswa ya kuvutuka na Yeruzalemi sambu na kupesa lusadisu na kutunga mbanza yina kuvandaka ya kubwa. Artazeresesi kupesaka Nehemia nswa ya kusala mambu yina yandi kulombaka. (Nehemia 2:1-8) Inki dilongi yo kepesa nge? Kana nge kewaka boma ntangu nge kekutanaka ti dibaku ya kuta kimbangi ya lukwikilu na nge, kumona ve mpamba dibaku ya nge kele na yo ya kusala kisambu na ntima. Piere kusonikaka nde: “Beno katula mabanza na beno yina yonso ke yangisaka beno, ebuna beno pesa yo na Nzambi, sambu yandi muntu ke talaka mambu na beno.”—1 Piere 5:7; Nkunga 55:22.
“Vanda ya Kuyilama na Kupesa Mvutu”
9. Inki mutindu Leah yina kele na bamvula 13 kukabulaka bakopi 23 ya mukanda Les jeunes s’interrogent?
9 Tala eksperiansi yankaka. Leah yina vandaka na bamvula 13, vandaka kutanga mukanda Les jeunes s’interrogent —Réponses pratiquesa na ntangu ya madya ya midi na nzo-nkanda. Yandi ketuba nde: “Bana yankaka vandaka kutala mono, mpi ntama mingi ve kibuka ya bantu kwisaka kutelema na nima na mono mpi ketala. Bo yantikaka kuyula mono nki mukanda yango vandaka kutubila.” Na nkokila, bana-bankento iya kulombaka Leah kopi ya mukanda Les jeunes s’interrogent. Ntama mingi ve bana-bankento yai kutangaka mukanda yai ti bankaka dyaka, mpi na nima bo mpi kulombaka kopi mosi. Na nima ya mwa bamposo, Leah kukabulaka bakopi 23 ya mukanda Les jeunes s’interrogent na banduku na yandi ya nzo-nkanda mpi na banduku na bo. Keti yo vandilaka Leah pete na kutuba na luyantiku ntangu bankaka kuyulaka yandi bangyufula sambu na mukanda yina yandi vandaka kutanga? Yo vandaka pete ve! Yandi kendima nde: “Ntete mu waka boma. Kansi, mu salaka kisambu, mpi mu bakisaka nde Yehowa vandaka ti mono.”
10, 11. Inki mutindu toko mosi ya nkento ya Izraele kunungaka na kusadisa mfumu mosi ya basoda ya Siria na kulonguka mambu yina metala Yehowa, mpi nki bansoba mfumu yango kusalaka na nima?
10 Ziku Eksperiansi ya Leah keyibusa nge dyambu ya mutindu mosi yina toko mosi ya Izraele ya bo nataka na kimpika na Siria kukutanaka na yo. Namani, mfumu ya basoda ya Siria, kuvandaka ti maladi ya lepre. Mbala yankaka nkento na yandi muntu kuyantikaka kuta disolo yina kupusaka mwana-nkento yai na kutubila lukwikilu na yandi. Yandi tubaka nde: “Mbote kana mfumu na mono Namani kwenda na profete yina ke vandaka na bwala Samaria. Yandi ta belula yandi kaka na maladi na yandi.”—2 Bantotila 5:1-3.
11 Kikesa ya toko yai ya nkento kubutaka mbuma ya mbote, Namani kubakisaka nde “Nzambi ya nkaka kele ve na nsi-ntoto yonso, kaka Nzambi ya Israele.” Yandi bakaka nkutu lukanu nde yandi ‘tapesa dyaka ve makabu ya kinduku na banzambi ya nkaka, kaka na mfumu Nzambi ya Israele.’ (2 Bantotila 5:15, 17) Yo kele kyeleka nde Yehowa kusakumunaka kikesa ya mwana-nkento yai. Yandi lenda mpi yandi tasala mutindu mosi sambu na batoko ya bubu yai. Leah kukutanaka ti dyambu ya mutindu mosi. Na bilumbu yina kulandaka, banduku na yandi yankaka ya nzo-nkanda kuzabisaka yandi nde mukanda Les jeunes s’interrogent vandaka kusadisa bo na kutomisa bikalulu na bo. Leah ketuba nde: “Mu vandaka na kyese sambu mu bakisaka nde mu vandaka kusadisa bankaka na kulonguka mambu yina metala Yehowa mpi kusadisa bo na kutomisa luzingu na bo.”
12. Inki mutindu nge lenda baka kikesa na kunwanina lukwikilu na nge?
12 Nge lenda vanda ti baeksperiansi bonso yina ya Jennifer ti Leah. Landa ndongisila ya Piere, yina kusonikaka nde, sambu nge kele Mukristu, nge fwete vandaka ntangu yonso “ya kuyilama na kupesa mvutu na bantu yina ke yulaka beno sambu na kuzaba nki mutindu beno ke tulaka ntima na Nzambi. Kansi beno sala yo na malembe ti na luzitu.” (1 Piere 3:15, 16a) Inki mutindu nge lenda sala yo? Landa mbandu ya Bakristu ya mvu-nkama ya ntete yina kusalaka kisambu na Yehowa nde yandi sadisa bo na kusamuna ‘na kikesa yonso.’ (Bisalu 4:29) Vanda mpi kikesa na kusolula ti bankaka mambu yina metala malongi ya dibundu na nge. Bambuma yina yo tabuta lenda yitukisa nge mingi. Dyaka, nge tasepedisa ntima ya Yehowa.
Bakaseti Video mpi Bisalu ya Nzo-nkanda
13. Inki mabaku batoko yankaka kusadilaka na kuta kimbangi? (Tala lupangu yina kele na lutiti yai mpi yina ya lutiti 14.)
13 Batoko mingi metendudilaka banduku ya nzo-nkanda to balongi na bo lukwikilu na bo na nsadisa ya bakaseti video. Mbala mingi, bisalu yina bo kepesaka bo na nzo-nkanda mekangudilaka bo mpi dibaku ya kupesa Yehowa lukumu. Mu mbandu, longi pesaka batoko zole ya Bambangi ya Yehowa yina vandaka na bamvula 15 devware mosi na dilongi na bo ya istware ya inza na kusonika lapolo ya dibundu mosi na kati ya mabundu ya inza. Batoko yai zole kuwakanaka na kutubila Bambangi ya Yehowa na lapolo na bo, bo sadilaka mukanda Les Témoins de Jéhovah : Prédicateurs du Royaume de Dieu bonso nto ya dilongi na bo.b Bo vandaka mpi ti mukumba ya kupesa lapolo yango na minuta tanu. Na nima ya kutuba minuta tanu, longi ti bana ya nzo-nkanda kuyulaka bangyufula mingi na mpila nde bana-babakala yai zole kutubaka dyaka minuta 20. Bamposo mingi na nima, banduku na bo ya nzo-nkanda kulandaka kaka na kuyula bangyufula na yina metala Bambangi ya Yehowa!
14, 15. (a) Sambu na nki boma ya bantu kevandaka mutambu? (b) Sambu na nki nge fwete vanda na kyese sambu na kuzabisa bantu yankaka malongi ya dibundu na nge?
14 Mutindu beto memona yo na baeksperiansi ya beto metubila, nge lenda baka balusakumunu mingi na kutela bankaka mambu yina metala malongi na nge bonso Mbangi ya Yehowa. Kuyambula ve nde boma ya bantu kubotula nge dibaku mpi kyese ya kusadisa bankaka na kuzaba Yehowa. Biblia ketuba nde: “Kana nge tina bantu boma, nge ta bwa na mutambu; kansi kana nge tula ntima na Mfumu Nzambi, nge ta zinga na ngemba.”—Bingana 29:25.
15 Kuvila ve nde, nge, toko yina kele Mukristu, nge kele ti kima mosi ya nene yina banduku na nge kele na yo mfunu, kima yango kele kuvanda ti luzingu ya kuluta mbote bubu yai mpi lusilu ya luzingu ya mvula na mvula na bilumbu kekwisa. (1 Timoteo 4:8) Yo kele kyese na kumona nde, na États-Unis, kisika nge lenda yindula nde bantu kezolaka ve bo tubila bo mambu ya Nzambi to nde bo keyindulaka kaka mambu ya kinsuni, anketi mosi kumonisaka nde kiteso ya katikati ya batoko kebakaka dibundu na valere, mpi kana beto kabula bo na bimvuka tatu, kimvuka mosi ketubaka nde lukwikilu ya dibundu kele “na bupusi mosi ya kuluta nene” na luzingu na bo. Yo kele mpi mutindu mosi na bitini yankaka mingi ya inza. Ebuna, yo lenda vanda mpi nde banduku na nge ya nzo-nkanda tasepila na kuwa mambu ya nge kezola kuzabisa bo na yina metala Biblia.
Toko, Kwenda Penepene na Nzambi
16. Katula kuzabisa bankaka mambu ya metala Yehowa, inki nge lenda sala sambu na kusepedisa yandi?
16 Ya kyeleka, katula kutuba mambu yina metala Yehowa na bantu yankaka, yo kelombaka kusala mambu yankaka dyaka mingi sambu na kusepedisa yandi. Ntumwa Yoane kusonikaka nde: “Sambu, kana beto ke zolaka Nzambi, yo ke songa nde beto ke landaka bansiku na yandi. Ebuna bansiku na yandi kele mpasi ve beto na kulanda yo.” (1 Yoane 5:3) Nge tamona nde mambu yai kele ya kyeleka kana nge kwenda penepene na Yehowa. Inki mutindu nge lenda sala yo?
17. Inki mutindu nge lenda kwenda penepene na Yehowa?
17 Bakaka ntangu ya kutanga Biblia ti mikanda yina ketendulaka Biblia. Kana nge kelonguka mambu mingi ya metala Yehowa, nge tamona ve mpasi na kulemfukila yandi mpi na kusonga bankaka mambu yina metala yandi. Yezu kutubaka nde: “Muntu ya mbote ke basisaka mambu ya mbote ya yandi ke na yo mingi na ntima na yandi. . . . Sambu muntu ke tubaka mambu yina me fulukaka na ntima na yandi.” (Luka 6:45) Yo yina, fulusa ntima na nge ti mambu ya mbote. Keti nge lenda kuditudila balukanu ya kusala yo? Mbala yankaka nge lenda tomisa mutindu ya kubongisa balukutakanu ya mposo yai kekwisa. Lukanu na nge ya zole lenda vanda ya kupesa komantere ya nkufi kansi ya masonga. Ya kyeleka, yo kele mpi mfunu na kusadila mambu ya nge kelonguka.—Filipi 4:9.
18. Ata nge kekutana ti mwa kimbeni, nge lenda tula ntima na inki?
18 Ya kyeleka, balusakumunu yina kekwisaka na kusadila Yehowa kevandaka ya mvula na mvula. Yo kele kyeleka nde, bantu lenda menga to kuseka nge sambu nge kele Mbangi ya Yehowa. Kansi yindula Moize. Biblia ketuba nde “meso na yandi vandaka ke tala kaka matabisi yina kele na ntwala.” (Baebreo 11:24-26) Nge mpi lenda tula ntima nde Yehowa tapesa nge matabisi sambu na bikesa ya nge kesala na kulonguka mambu yina metala yandi mpi nge kezabisa yo na bantu yankaka. Ya kyeleka, yandi “ta vila ve [ata fyoti] kuzola ya ntima yina ya [nge] ke songaka yandi.”—Baebreo 6:10.
[Banoti na nsi ya lutiti]
a Yina Bambangi ya Yehowa mebasisaka.
b Yina Bambangi ya Yehowa mebasisaka.
Keti Nge Keyibuka?
• Sambu na nki nge lenda tula ntima nde Yehowa kebakaka kisalu na nge na valere?
• Inki bametode ya kuta kimbangi na nzo-nkanda batoko yankaka kemonaka nde yo kebutaka mbuma ya mbote?
• Inki mutindu nge lenda baka kikesa sambu na kuta kimbangi na banduku ya nzo-nkanda?
• Inki mutindu nge lenda kwenda penepene na Yehowa?
[Lupangu/Bifwanisu ya kele na lutiti 14]
Ata Bana ya Fyoti Mpenza Kekumisaka Yehowa!
Ata bana ya fyoti yina melungisa ntete ve bamvula kumi na tatu menungaka na kuta kimbangi na nzo-nkanda. Tala mwa baeksperiansi yai.
Amber, yina kele na bamvula kumi mpi ya kelongukaka na mvu-tanu vandaka kutanga mukanda mosi ya ketubila bampasi yina bantu ya Nazi kumonisaka Bayuda na Mvita ya Zole ya Inza ya Mvimba. Amber kubakaka lukanu ya kunatila longi na yandi kaseti video Les triangles violets. Longi na bo kuyitukaka mingi na kuzaba nde Bambangi ya Yehowa mpi kunyokwamaka ntangu kimfumu ya Nazi vandaka kuyala. Longi kusongaka video yango na nzo-nkanda ya mvimba.
Alexa, yina vandaka na bamvula nana, kusonikilaka nzo-nkanda na yandi mukanda, na kati na yo yandi tendulaka kikuma ya yandi vandaka kuta ve nkinsi ya Lubutuku. Longi na yandi kuyitukaka mingi kibeni na mpila nde yandi lombaka Alexa na kutanga mukanda na yandi na ndinga ya ngolo na ntwala ya bana yonso ya nzo-nkanda na yandi mpi na banzo-nkanda zole yankaka! Sambu na kusukisa, yandi tubaka nde: “Bo melongaka mono na kuzitisa bantu yankaka yina kekwikilaka na malongi ya kuswaswana ti ya mono mpi, mersi mutindu beno mendima na kuzitisa desizio na mono ya kukonda kuta nkinsi ya Lubutuku.”
Mwa ntangu fyoti na nima ya kuyantika mvu-ntete, Eric kunataka Mukanda ya Bankenda ya Biblia na nzo-nkanda mpi yandi lombaka nswa na kusonga yo na banduku na yandi. Longi na yandi kutubaka nde: “Mu ke ti ngindu mosi ya mbote, keti nge lenda tanga ve disolo mosi na nzo-nkanda?” Eric kusalaka mutindu longi kulombaka yandi. Na nima, yandi lombaka na bayina yonso vandaka na mfunu ya kopi mosi ya mukanda yina na kunangula maboko na bo. Bantu kumi na nana, ti longi, kunangulaka maboko! Ntangu yai Eric kekudiwaka kibeni nde yandi kele ti teritware na yandi mosi ya kutela kimbangi.
Whitney, yina kele na bamvula uvwa, kesepilaka na kamukanda Les Témoins de Jéhovah et l’instruction.c Yandi ketuba nde: “Konso mvula mama na mono kepesaka kamukanda yai na balongi na mono, kansi na mvula yai mono mosi muntu kusalaka yo. Kamukanda yina kupusaka longi na mono na kupesa mono ‘matabisi ya mposo yina’ sambu na kikalulu na mono ya mbote.”
[Noti na nsi ya lutiti]
c Bambangi ya Yehowa bantu mebasisaka mikanda yonso ya beto metubila.
[Lupangu/Bifwanisu ya kele na lutiti 15]
Mambu Yina Bantu Yankaka Mesadilaka Sambu na Kutubila Lukwikilu na Bo
Ntangu bo lombaka bo na kusala lapolo to kisalu mosi ya nzo-nkanda, bankaka kuponaka disolo yina kupesaka bo nzila ya kuta kimbangi
Batoko mingi mepesaka balongi na bo kaseti video mosi to mukanda mosi yina kele ti disolo mosi ya vandaka kuwakana ti dyambu mosi yina bo vandaka kulonguka na nzo-nkanda
Ntangu batoko mingi vandaka kutanga Biblia to mukanda mosi yina ketendulaka Biblia na ntangu ya kupema, batoko yankaka kukwendaka kukuta bo sambu na kuyula bo bangyufula
[Kifwanisu ya kele na lutiti 12]
Bantu yina kele na eksperiansi lenda sadisa na kulonga batoko na kusadila Yehowa