Bantu Mingi Ketubaka Nde Bo Ke Na Lukwikilu

NKENTO mosi na Brésil tubaka na kyese yonso nde: “Yezu ke muntu mosi ya kuyituka! Yandi ke muntu ya kuluta mbote!” Ee, muntu lenda tula ntembe ve nde zina ya Yezu ke na ngolo mingi. Tuka ntama, bantu kendimaka mpasi ti lufwa sambu na Yezu.

Ntumwa Piere ti Yoane longaka ‘na zina ya Yesu’ na Yeruzalemi. Yo yina, bo kangaka bo mpi bo bulaka bo fimbu. Kansi, bo “katukaka na Kimvuka ya Bayuda na kiese yonso, sambu Nzambi monaka nde bo me fwana na kumona nsoni sambu na zina ya Yesu.”​—⁠Bisalu 5:​28, 41.

Antipasi ke Mukristu yankaka ya zolaka zina ya Yezu na mvu-nkama ya ntete. Na mukanda ya Kusonga, mukanda ya nsuka ya Biblia, Yezu ketuba nde: “Bo fwaka temwe na mono ya kieleka, Antipasi, na bwala na beno, kuna ya Satana ke vandaka.” (Kusonga 2:13) Antipasi ti Bakristu yankaka ya Pergame buyaka na kuyambula lukwikilu na bo na Kristu. Antipasi kangamaka na zina ya Yezu ata yo lombaka nde yandi futa luzingu na yandi.

Kiteso ya bamvula makumi tanu na nima, na mvu 155 T.B., Mukristu mosi, zina na yandi Polikarpe, kutanaka mpi ti mpasi ya mutindu mosi. Bo songaka yandi na kufinga Kristu. Yandi vutulaka nde: “Mono mesadila yandi bamvula makumi nana na sambanu, Yandi mesalaka mono mbi ve. Inki mutindu mono lenda finga Ntotila na mono ya megulusaka mono?” Sambu yandi zolaka ve kubuya Kristu, bo kangisaka yandi na nti, ye bo yokaka yandi.

Bantumwa, Antipasi, ti bantu yankaka ndimaka lufwa, sambu yo monika pwelele nde bo ke batemwe ya Kristu! Ebuna bantu ya bubu yai?

Zina ya Yezu Bubu Yai

Tii bubu yai, zina ya Yezu kele kaka na kupusa bantu. Na Amerika ya Sudi, mabundu ya kesadila zina ya Yezu mebutuka mingi na bamvula yai. Ata na tubabwala ya fyoti, nge fwete kuta nzo-nzambi mosi ya ba Pantekotiste. Kansi, na politiki mpi, bisika na bo ke na kukuma mingi. Mu mbandu, na Brésil, bisika 31 na parlema kele sambu na badepite ya kebasika na mabundu.

Bilumbu yai, dibundu mosi ya mpa mebasika dyaka na États-Unis na zina ya Yezu. Bantu ya dibundu yango ketubaka nde bo kele Bantu ya Kezitisaka Lusilu. Zulunalu Time tubaka na 1997 nde, na balukutakanu na bo ya 1991, bantu kuvandaka 4200. Na 1996, bo kumaka milio mosi na ndambu. Bo ke na nkunga mosi ya bo keyimbaka nde: “Kununga na mono ke na Yezu, yandi kele Ngulusi na mono ya mvula na mvula.”

Kansi, mawi ya bantu kemonisaka sambu na Yezu, yonso ke ya kyeleka ve. Bamingi kele na kunwana dyaka bitumba na zina na yandi. Bo mefwaka Bayuda, ti bantu ya kendimaka ve Biblia. Bo menyokulaka bayina ketulaka ntembe, ti kuyoka bo na banti. Yonso yai, bo ke sala yo na zina ya Yezu. Dyaka, na bilumbu yai, kulonga malongi ya Nzambi mekuma mumbongo mosi ya nene. Bima yai yonso kele mutindu mosi ya mbi mpi ya nsoni ya kubebisa zina ya Yezu ti kisika na yo ya kyeleka mpenza!

Dyaka, yo kebasisa bangyufula yai ya mfunu: Kutula lukwikilu na zina ya Yezu ketendula kibeni nki? Ye ngindu ya Bambangi ya Yehowa ke nde nki na dyambu yango? Disolo ya kelanda tapesa mvutu na bangyufula yai.